Măng nar 29/11, tĭng mông ta ntŭk, kruanh Quốc hội Vương Đình Huệ n’hanh mpôl đại biểu gâl têh Quốc hội dak he lĕ tât ta tach ndeh păr tahen Fairbain, Thủ đô Canberra ntơm rơh tât khâl ngăn Australia tĭng nău jă bâh kruanh Hạ viện Australia Milton Dick, kruanh thượng viện Australia  Sue Lines.

Rơh tât khâl ngăn Australia bâh kruanh Quốc hội Vương Đình Huệ n’hanh mpôl đại biểu gâl têh dak he rơh aơ mbra ntop ƀư kloh ueh lơn nău tâm boh kan ndrel đah bar dak lah nsum nău tâm boh kan đah nuĭh leo kan gâl têh 2 dak lah êng, ntrôl tay lơn nău tâm boh tâm kơl đah ntŭk kan lập pháp bar dak. Nkre lah, rơh tât khâl lĕ ntop n’hao nău tâm boh bar ding ta lĕ rngôch ăp trong kan, ngăn lah nău wăng sa, tăch rgâl, ntuh kơl, ntĭm nti, mât njrăng ngih dak, rnă njrăng ta ntŭk. Ta rơh tât khâl aơ, kruanh Quốc hội Vương Đình Huệ mbra tât tâm ôp ngơi, tâm nchră nău đah nuĭh leo kan gâl têh bâh Australia; râng rơh tâm mâp tâm kơl, rơh tâm kơl ntĭm nti, tât khâl du đê̆ ngih nti đại học, tâm mâp, tâm ngơi đah ntŭk rêh jêng nuĭh Việt ta Austrlia.