VOV4.M'nông: Kêng măng 12/3, ta Jay Quốc hội, Kruanh Quốc hội Vương Đình Huệ wơt Kruanh Tập đoàn Erax Honna Hitoshi. Kruanh Quốc hội Vương Đình Huệ lah rjăp, tâm boh têh jong jru hvi n'hanh yor ma đăp mpăn têh ndrŏng ta châu Á đah Việt Nam n'hanh Nhật Bản tâm bah ri aơ hun hao dŭt n'hâm uĕh lăng, ngăn ngăn n'hanh geh nău tam ta ăp trong kan. Tĭng Kruanh Quốc hội Vương Đình Huệ, trong rƀŏng hun hao trong nchrăp ƀư điện sinh khối n'hanh rgâl ăp trong nchrăp điện si ônh aƀaơ jêng nhih máy điện sinh khối bah Tập đoàn Erex dŭt tâm di đah trong hăn jŏ jong neh dak mpeh hun hao kloh uĕh lvang năm 2021-2030, uănh ngai 2050 bah Việt Nam ma Chính phủ mhe uănh an dŏng. Kruanh Quốc hội Vương Đình Huệ lah rjăp, Quốc hội, Chính phủ Việt Nam ŭch tĭng trong hăn dja; nkre nkoch gĭt, aƀaơ, lam trong kan luật pháp bah Việt Nam hŏ geh ăp quy định kloh, na nê̆ mpeh ăp trong kan gay nta trong dơh an ăp doanh nghiệp dak bah dih ntuh kơl ta Việt Nam. Mhe aơ nơh, Tập đoàn Erax hŏ hăn ôp uănh ta 16 n'gor, nkual ƀon têh. Nsing kalơ hăn ôp uănh, Tập đoàn mbra rdâk njêng 19 trong nchrăp kan đah 1400 MW tât năm 2035; ndrel đah nê pơk hvi trong yơng ntil tơm mhe, nhih máy geh rnoh dăng điện âk./.

Nuĭh rblang: Điểu Thân