Nkhêp geh Lễ Phật đản - Phật lịch 2567- Dương lịch 2023, ôi (31/5), mpôl pah kan bah Tỉnh ủy, HĐND, UBND, Ủy ban Mặt trận Tổ quốc Việt Nam n’gor Dak Lak hŏ tât khâl, mbah rhơn Ban trị sự Giáo hội phật giáo Việt Nam n’gor n’hanh ăp ntŭk chroh rƀŭn. Ta ăp ntŭk tât khâl, kruanh rđău kan n’gor Dak Lak nchih nkah n’hanh rnê âk ăp nău rgop bah Phật giáo đah rơh mât njrăng, rdâk njêng n’hanh hun hao neh dak n’hanh n’gor.

Ăp tăng, ni, phật tử hŏ râng ăp nău kan lam rêh jêng kon nuĭh, kơl ƀon lan geh trôk nar lơh, râng pah kan n’hŭch ach o, rdâk njêng jay tâm rŏng, lôch nê rgop ndrel đah gưl ủy đảng, n’gâng kan, tĭng ƀư geh nău dơi ăp rnoh tât kan mpeh wăng sa- rêh jêng kon nuĭh. Kruanh rđău kan n’gor Dak Lak an lah, đah nău lĕ nuih n’hâm bah ăp vị Tăng, Ni, Phật tử, Ban trị sự Giáo hội Phật giáo Việt Nam n’gor Dak Lak geh tay ăp nău rgop ngăn ngăn, ntô̆ n’hao uĕh nău way ơm rŏng dak, n’hao nău dơi tâm rnglăp, lăp rgum gay rdâk njêng n’gor nar lơn ma geh ndrŏng./.