Ôi 14/2, Bí thư Thành ủy Hà Nội Đinh Tiến Dũng, Kruanh UBND nkual ƀon têh Hà Nội Trần Sỹ Thanh n’hanh ăp kruanh rđău kan nkual ƀon têh hŏ  tât mpoh nhang ta lễ hội Gò Đống Đa 2024. Lễ hội nkah ndray nău lơh dơi Ngọc Hồi- Đống Đa hôm way kuăl lah Lễ hội gò Đống Đa dơi ƀư  tâm nar 5 Tết Nguyên Đán ăp năm gay nkah gĭt n’hâm suan têh kuâng bah nuĭh dăng janh ao bok Quang Trung - Nguyễn Huệ ndrel ăp kruanh mât bôk  tahen, mpôl tahen dâk lơh Tây Sơn n’hanh ƀon lan kăl e, hŏ dăng janh rdâng lơh mpôl lăp tŭn  jot, pit in neh dak bah rnoi nuĭh he.

Aơ lah  ngoăy tâm ăp lễ hội way ơm dŭt têh bah nkual ƀon têh Hà Nội, ƀư dâk rêh ăp nău n’gloh ang kăl e, nău dơi lư lam  bri bah rnoi nuĭh. Tĭng siƀŭt nchih nkah kăl e, khay năm mhe  năm Kỷ Dậu 1789, nơm geh nău rđău kan ngăch prăl  bah nuĭh dăng janh ao  bok Quang Trung, mpôl tahen dâk lơh Tây Sơn hŏ geh rơh hăn ngăch ndăn, han dăng, lơh dơi 29 rmưn tahen Mãn Thanh lăp pit in, rklaih luh kinh thành Thăng Long. Ntơm bah nê, djăt ma ăp tơ̆ khay năm mhe  tât, Lễ hội nkah ndray lơh dơi Ngọc Hồi - Đống Đa hôm dơi ƀư tay đŏng,  wăch rgum hang rmưn nuĭh ƀon lan, năch pâl nđaih tât râng, ƀư lễ, mpoh  nhang ăp nuĭh dăng janh rnoi nuĭh mpôl tahen dâk lơh Tây Sơn.