Jêh rlău du pơh na nê̆ mbơh ntrong ƀư n’gâng kan ƀon lan 2 gưl ta ăp ntŭk kan hành chính mhe, kêng măng (8/7), Kruanh UBND n’gor Dak Lak Tạ Anh Tuấn lĕ tât uănh nđôi na nê̆ nu nău pah kan ta xă Krông Năng n’hanh phường Buôn Hồ. Kruanh UBND n’gor Dak Lak Tạ Anh Tuấn uănh lah prêh nău nsrôih bah gưl ủy, n’gâng kan ƀon lan xă Krông Năng n’hanh phường Buôn Hồ lĕ n’hao săk rnglăy mât uănh ngih dak, rhŏ an ƀon lan uĕh lơn.

Jêh hăn uănh, Kruanh UBND n’gor Dak Lak djôt dơn du đêt jêr jŏt, wăk kol ta bah dâng kơt: Nău tâm pă tơm prăk mbrơi ƀư khuch tât trok nău kơl; phần mềm hành chính geh rnôk hôm e wĭ boăt nthoi; trong ƀư  ntĭm prăk kaih-kế toán an gưl xă, phường mô hŏ kloh na nê̆. Wa Tuấn ntrŭt nsôr rmôt cán bộ ta Krông Năng n’hanh Buôn Hồ mât uĕh nuih n’hâm tâm rnglăp, rlet rlău jêr jŏt, ƀư tĭng uĕh ăp gưl, nău kan lĕ dơi tâm pă gưl, tâm pă nău dơi mkra.