Tâm bah ri aơ, bol UBND n'gor Dak Nông hŏ rđău đă lĕ n'hâm suan gay droh rklaih ăp nău kŏ kol tâm trong đă ntrơn du, yơn rnoh hvi neh kuĭh joi bô-xít dŏng an nhih máy alumin Nhân Cơ dôl tâm nô nău weh kơp tĭng nar đŏng. 

          Ntơm bah kêng dŭt năm e tât aƀaơ, ta nkuâl Dak Rlấp, n'gor Dak Nông, kŏ kol tâm trong đă ntrơn du rong neh dak Nhih máy alumin Nhân Cơ geh ta lĕ rngôch ăp ntil nău kan, ntơm bah nkual kuĭh joi tât ăp nkual ƀư bong mbrô 3 bah n'glău n'gâr bŏk gŭr mbrô 2 n'glău n'gâr bŏk n'hoch luh lôch rcha luh rsang. UBND n'gor Dak Nông hŏ njêng Rmôt pah kan gay nkra ăp nău jêr jŏt, kŏ kol tâm rnôk kan bah Công ty Nhôm Dak Nông – TKV, đơn vị mât dŏng Nhih máy alumin Nhân Cơ (way kuăl lah Rmôt 1664).

        Wa Nguyễn Quang Tứ, Kruanh UBND nkuâl Dak R’lấp, an gĭt, đah nău rđău đă lĕ n'hâm suan bah UBND n'gor n'hanh nău kan nsum lhăt bah ăp nhih pah kan dơi  kan, pah kan đă ntrơn du rong ntŭk an Nhih máy alumin Nhân Cơ dôl tĭng kơn dơi droh rklaih. Na nê̆, đah ntơm pơk ƀư bô-xít năm tâl 4 – 6 (lvang năm 2020-2022) hŏ rgŏ jă dơi 18 rnăk ndơ̆ jao neh đah rnoh hvi nklăp 15 ha; lôch jêh ndơ̆ jao neh an bong mbrô 2 n'glău n'gâr bŏk gŭr gay ƀư nkra bah pĭch rlâm. Nkuâl dôl ndrel đah ăp n'gâng kan nsrôih rhuăt glêh ăp siƀŭt an ƀư rdâk njêng 6 nkual ntŭk gŭ mhe an nuĭh ƀon lan:

       "Tơm neh gay dŏng an nhih  máy nkret njêng ri nkuâl hŏ ndơ̆ jao an TKV lah 15 ha ri tŏng gay ƀư tât nar 15/4. Aƀaơ geh pe nău kan ân ƀư lah njêng trong nchrăp nchâp đă ntrơn du 1 rnăk, mât njrăng ƀư 5 rnăk n'hanh rgŏ jă 17 rnăk ri geh 13ha đŏng ri mbra tŏng neh an nhih máy kan tât nar 1/6.  Tâl pe lah rnoh neh hôm ƀa ƀă bah ntơm ƀư năm tâl 7-8 geh 77 rnăk đah 73 ha, tâm nê geh 40 rnăk đă ntrơn du ri tĭng rnoh ngăch ƀư khay 4 dja nkuâl mbra uănh an dŏng dơi trong nchrăp 2 nkual đă ntrơn du".

        Wa Nguyễn Bá Út, Giám đốc Sở công thương Dak Nông, Groi kruanh rmôt pah kan 1644 bah UBND n'gor Dak Nông, an lah, nkô̆ nău dŭt duh ndal aƀaơ ta alumin Nhân Cơ ntŭk neh ƀư đah bong mbrô 3 n'glău n'gâr bŏk gŭr, hôm 3 rnăk mô ŭch tâm boh kơp tơm si, ndơ rdâk ƀư ta neh. n'glău n'gâr bŏk mbrô 2 Nhih máy sơch luh tơm loih mô hŏ dơi ƀư ơm tă bah hôm 11 rnăk mô hŏ ŭch ntrơn du. N'gor hŏ dăn đă UBND nkuâl Dak R’lấp ngăch tâm dâl nău đah ăp rnăk ƀon lan, mĭn uănh kơi ntop kơl tĭng quy định, n'hanh geh trong nkra lĕ n'hâm suan lơn:

        "Aƀaơ dôl rgum lơn âk tâm nău nkra gay geh tơm ndơ an nhih máy nkret njêng, ri rmôt pah kan ntrŏng bôk năp lah đăp mpăn. Yơn neh an bong mbrô 2, bong mbrô 3 ri hôm kol dŭt âk, lĕ ma nău nuĭh ƀon lan mô kan nsum gay nchih kơp ri ân geh trong nchâp đă gay kơp nchih ăp. Ntŭk dja ma mô dơi nkra ri bol ma  geh tơm neh ri jêr ma ƀư dơi đŏng, tâm ban kơt nhih máy ân rlu nchuăt đŏng".

        Mpeh nău droh rklaih ăp jêr jŏt, kŏ kol tâm rnôk kan bah Công ty Nhôm Dak Nông, tĭng wa Lê Trọng Yên, Groi kruanh UBND n'gor Dak Nông, n'gor hŏ geh ăp nău rđău đă na nê̆ an tĭng n'gâng kan, UBND nkuâl Dak Rlấp tâm ban kơt mpeh công ty nhôm Dak Nông. Ăp nhih pah kan, đơn vị ân ƀư lĕ n'hâm suan lơn, rgum âk gay ƀư lôch jêh ăp nău dơn kan dơi jao, đăp mpăn an Nhih máy alumin Nhân Cơ kan đăp mpăn, rgop khlay tâm nău hun hao wăng sa rêh jêng kon nuĭh ta ntŭk./.