Ta Đà Lạt, Tỉnh ủy Lâm Đồng ƀư Tâm nchră sơ kết 1 năm tĭng ƀư n’gâng kan 2 gưl. Tâm nchră dơi pơk ƀoh tât 124 xã, phường, đặc khu lam n’gor. Kruanh rđău kan n’gor Lâm Đồng rđău đă ra uănh tay, wat jêh nuĭh kan; n’hao săk blău rmôt cán bộ tâm dâng; ntrôl dăng rgâl dơh glêh siƀŭt, rgâl mbrô; n’hao dăng tâm pă gưl đah ôp uănh, groi nđôi n’hanh sŏk nău di nuih n’hâm bah ƀon lan, doanh nghiệp ƀư mâng weh nsĭt geh nău dơi tam bah n’gâng kan 2 gưl.

Lôch 1 năm an ƀư, n’gor Lâm Đồng hŏ dăp rgum ăp tŏng nuĭh kan bah n’gor jŭr tât tâm dâng. Lôch dăp rgum, ăp nhih pah kan hŭch đêt, tâm nê nhih pah kan Đảng hŭch 66,6%, mpôl mât bôk kan hŭch 61,9%; lam n’gor lôch jêh nău ntrŭnh gưl ủy, kruanh rđău kan HĐND, UBND ta 124 xã, phường, đặc khu n’hanh rgum rlău 730 cán bộ, công chức, viên chức hăn ntop kơl an tâm dâng.

Ndrel đah dăp rgum nuĭh kan, n’gor ntrôl ngăch rgâl dơh glêh siƀŭt, rgâl mbrô, koh n’hŭch nklăp 30% siƀŭt tâm nhih pah kan nơm; 100% ndơ rhŏ dŏng lăp ƀư bah ngai dơi n’glăp rgum du ntŭk. Pah kan wơt nuĭh ƀon lan, nkra nău lah phong dơi mât ƀư mbro; nô nău chính trị - rêh jêng kon nuĭh, njrăng n’gang neh dak, rnă njrăng dơi mât nâp tay.

Uănh năl mpeh rnôk an ƀư, wa Y Thanh Hà Niê Kđăm, Ủy viên Trung ương Đảng, Bí thư Tỉnh ủy Lâm Đồng lah rjăp, nău ƀư lôch jêh n’gâng kan 2 gưl lah nău dơn kan jăch ndăn, nkre jŏ jong; mô dơn gay mbluh tơm ndơ hun hao ma hôm n’hao nău tĭng jăp kan, nău way neh dak n’hanh nău dơn kan bah nuĭh mât bôk kan. Yơn lah, bah meng ăp nău dơi hŏ geh âk uănh năl sŏng nha hôm mô đêt jêr jŏt, ntul rlong, mpăng đêt ân gŭ mĭn ngăn ngăn, nkra bah đŏng.

“Bah meng ăp nău dơi hŏ geh, nuĭh kan bol hŏ đăp mpăn yơn mô hŏ wat jêh ta lĕ ma gưl n’gor n’hanh gưl xã. Nău dăp rgum cán bộ ta du đêt ntŭk hôm wĭ wĕ, du đêt ntŭk gŭ kan hôm pah pât, mô hŏ dơi tâm pă ăp tŏng. Săk blău kan rmôt cán bộ công chức mô hŏ tâm ban, lơn lah gưl xã. Du đêt nuĭh nkra nău kan hôm rbăn lhơ, mbrơi nkai. Nău tâm pă n’hanh mât dŏng nău lư đah ăp rêng kan mô hŏ mbluh soih. Nău lư nsum rhŏ dŏng an pah kan rđău đă mât bôk kan hôm mbrơi. Ntŭk ntô n’hanh nău dơi pơk joi nău lư mô hŏ tŏng an nău ŭch geh”.

Lah rđău đă ta tâm nchră, Ủy viên Trung ương Đảng, Bộ trưởng Bộ Nội vụ Đỗ Thanh Bình rnê âk nuih n’hâm lor nchrăp, lĕ n’hâm suan bah Lâm Đồng tâm trong leo ƀư mhe, lơn lah nău rgum đă cán bộ jŭr tâm dâng n’hanh ntrôl dăng tâm pă gưl, tâm pă nău dơi kan. Yơn lah, n’gor nha hôm ât rdâng đah mpet jâk tă bah ntŭk dŭt hvi lam dak đŏng, rnoh nuĭh mpưm, âk cán bộ ân pah kan ngai rnăk wâl, tâm rnôk biên chế, ndơ dŏng công nghệ n’hanh trong kơl mô hŏ ban ngăch tĭng nău ngăn geh.

Bộ trưởng Bộ Nội vụ Đỗ Thanh Bình an lah tâm let năp tay, kruanh rđău kan n’gor Lâm Đồng ân ra uănh tay, wat jêh dăp rgum nuĭh kan; n’hao săk tam rmôt cán bộ tâm dâng; ntrôl ngăch rgâl dơh glêh siƀŭt, rgâl mbrô; n’hao dăng tâm pă gưl nkre đah ôp uănh, groi nđôi n’hanh sŏk nău di nuih n’hâm bah ƀon lan, doanh nghiệp ƀư mâng weh nău tam kan bah trong ntĭt leo n’gâng kan 2 gưl.

“Bah năp hôm âk nău dơn kan jâk r’ah Lâm Đồng ân rgâl mhe tay, ngăn ngăn lơn đŏng; ntik n’hao nuih n’hâm tâm rnglăp, lor nchrăp, lĕ n’hâm suan tâm nău tĭng ƀư. Rgum droh rklaih jêr jŏt năn ngăch, wăk kol, ăp kô̆ yơn kol khan gay n’glăp n’gâng kan 2 gưl dŏng kan nar lơn ma nsĭt geh nău dơi, tŏng an nău ŭch geh hun hao ngăch n’hanh jŏ jong tâm rơh mhe. Bộ Nội vụ mbra kan nsum lhăt, năn ngăch, ndrel đah n’gor gay droh rklaih jêr  jŏt, wăk kol gay n’glăp n’gâng kan 2 gưl lăp kan nsĭt geh nău dơi lơn, ngăn ngăn lơn”.