VOV4.M’nông: Rơh rlau aơ, nau ntŭng kăl si, in neh bri geh âk ngăn tâm âk n’gor bah nkuăl Tây Nguyên. Âk rnoh neh bri geh in pit âkl ngăn lah neh ndrel bri geh jao ân ăp rmôt kan tăch rgâl ntrŭnh ƀư bôk nau kan ntuh kơl. Gay rgâl ân nâp, n’gor Lâm Đồng ndrel Dak Nông dôl rđau ăp ntŭk kan n’gâng kan, ntrŭnh ƀư âk nau kan gay ma n’hao nau săk tam bah nau mât njrăng bri, nkre nsôih ƀư ân rjăp ăp nau rklaih jăng lơi ăp nau in neh bri.

            Ntơm năm 2018 tât rnôk aơ, ntŭk kan n’gâng kan n’gor Lâm Đồng saơ ndrel rklaih rlau 1000 tơ̆ ntŭng kăl si, đah rnoh neh bri geh khuch khat rlau 223 ha. Êng n’gul năm 2022, geh 80 tơ̆, rnoh neh bri geh in tih khuch bơi tât 30% rđil năm 2021.

            Tĭng wa Nguyễn Văn Sơn, Giám đốc N’gâng kan tuch tăm ndrel hun hao ƀon lan n’gor Lâm Đồng, âk ngăn neh bri geh roh tâm rnoh neh hŏ jao ăp mrôt kan tăch rgâl yơn mô dơi geh ntrŭnh ƀư bôk nau kan, mô lah geh nau ntrŭnh mbrơi, mô geh pă rmôt ƀư nau kan mât njrăng. N’gor hŏ nsôih sŏk kân lơi 208 bôk nau kan bah ăp rmôt kan đah rnoh neh rlau 30 rbăn ha. Nkre, mĭn rjăp, tŏng dơi leo dŏng ăp nau kan mhe tâm nau kan n’hao săk tam nau kan mât njrăng bri bah ăp rmôt kan tâm nkuăl:

            ‘Rnoh neh bri geh bôk nau kan hao tât ma rhiăng ha, măt dơm ri mô geh dơi veh lĕ ôh ri ân geh kơp, kơp ri roh âk prăk ma prăk ri ntă nŭih trok? Ân geh ƀư đah nau kan máy móc gay ma geh năl dơi năm aơ dŭm âk nau tih tă geh, mhâm nau nơm tĭng uănh, dŭm âk bri geh roh ri mơ nơm dơi đă bu trok tâm dơi, mhal ma prăk ân geh nau dơi. Phung hên dôl pah kan đah VNPT gay ma ndâk du nau kan gay ma blau nau uănh n’ôi nau geh tât bah bri bah ăp rmôt kan aơ. Hôm bri bah ăp Rnâng kan mât njrăng ri nau kan tât mpeh nŭih tơm bri ri hŏ kloh ngăn hôm”.

            Lâm Đồng rnôk aơ geh rlau 522 rbăn ha bri. Êng neh bri geh jao ân ăp mrôt kan manh neh dak ma ntrŭnh ƀư nau ntuh kơl, bri bah n’gor Lâm Đồng hôm geh jao ân 27 rmôt kan tơm bri Ngih dak. Ân geh nau ntŭng kăl si, lơh khuch bri tih dôih, 374 nŭih cán bộ, công chức, viên chức hŏ geh uănh gay ma geh mhal tih tĭng nau khuch. Wa Ngô Văn Ninh, Chánh văn phòng, nŭih mbơh nau bah UBND n’gor Lâm Đồng mbơh, n’gor dôl ƀư tĭng ndâk ăp nau kan dăng, rjăp ngăn gay ma mât njrăng bri. Wa Ngô Văn Ninh, ngơi:

            ‘Nau kan tih Luật neh bri ri jêr ngăn. Bol ma n’gor hŏ geh âk nau ntrŭnh đă yơn nau kan ê geh njrăng rdâng, ê geh n’huch ri ê geh dơi rđil nau đă. Tâm rơh tât, n’gor ƀư rjăp nau kan mât njrăng bri. Rơh aơ nsôih rklaih ngăn ăp ntŭk kan, ăp nŭih ân geh nau tih tâm lam n’gor. Ndrel ma nê lah ntrŭt dăng nau tăm 50 rkeh tơm si, êng năm aơ tăm 6,6 rkeh tơm si. Uănh nsum nau kan mât njrăng bri bah n’gor rđau rjăp ngăn”.

            Tâm Dak Nông, ăp rmôt kan n’gâng kan hŏ ƀư rjăp nau nchâp rklaih ân rjăp mpeh nau ntrơn đah ăp ntŭk in neh bri tih dôih bah rlau 35 ha bri njok trong Quốc lộ 28 rlet xã Quảng Sơn, nkuăl Dak Glong.

            Ntŭk geh nchâp đă ân geh nsĭt lơi neh lah neh geh in tâm njok trong Quốc lộ 28 tâm Công ty TNHH du ntŭk kan mât njrăng bri Quảng Sơn. Aơ geh uănh lah ntŭk duh ngăn mpeh nau ntŭng kăl si, in neh bri tih dôih tâm n’gor Dak Nông rnôk aơ. Ăp rmôt kan hŏ uănh năl geh 133 ntŭk ndâk ăp nau kan, tăm tơm di tih dôih tâm neh bri đah rnoh 35,41 ha.

            Tâm nkuăl aơ, bôk khay 3/2022, nkuăl Dak Glong hŏ ƀư nau nchâp đah 13 nŭih, sŏk kân 3,4 ha neh bri. Nchrăp ntơm lơ 7/6 tât lôch khay 6/2022, nkuăl mra ƀư nau nchâp đă gay ma ntrơn luh du lĕ ăp nŭih hôm e, sŏk lơi lĕ rlau 35 ha neh gay tăm tay bri. Wa Lê Đình Tuấn, Groi Kruanh UBND xã Quảng Sơn mbơh, nau kan nchâp đă geh ƀư tĭng nau ntrŭnh bah pháp luật.

N’gâng kan tâm nkuăl mra ƀư jêh nau ntrŭnh tĭng nau ntrŭnh bah pháp luật. N’gâng kan tâm nkuăl hŏ ƀư jêh săm ƀŭt, mbơh ân ăp nŭih tih, ƀư nau tâm nchră ndrel mro nkoch trêng, bonh đă ƀon lan rưih, ntrơn lơi ăp ntŭk nơm geh nau tih:

            ‘Rnoh neh bri 35 ha geh ƀư nchâp đă ntrơn leo bah rơh aơ kŏ rêh jêr ngăn. Yơn lah, aơ lah nau rêng gay ma nkuăl lŏ ƀư nau rklaih đah ăp rnoh neh bri ndrel neh bri dôl geh ƀon lan in sŏk, êng 35 ha aơ, ri hên kŏ nchâp đă gay rưih lơi ăp ntŭk ƀư tih êng, nkre ƀư tĭng nau ntrŭnh 2159 bah UBND n’gor mpeh nau rklaih ăp nau khuch geh tât nau kan mât njrăng bri ndrel neh bri”.

            Ăp rnoh neh jêh rnôk nchâp dă trok mplơ̆ lơi geh jao ân Công TNHH du ntŭk kan mât njrăng bri Quảng Sơn mât, tăm tay bri. Tĭng wa Đinh Văn Nam, Kruanh Công ty, rmôt kan hŏ ndâk nau kan gay tăm tay bri nkre tâm yan mih năm aơ:

            ‘Yor lah neh tâm nkuăl aơ geh rnọh khlay ri ma nau tăm tay bri gĭt lah nau jêr đŏng yơn kŏ mra nsôih gay ma rgum ăp tu tơm gay ƀư nau mât ndrel tăm tay bri. Nau kan in pit neh jêh aơ ngăn lah mra geh đŏng yơn nau khlay lah nau tâm rgop nsum đah ăp ntŭk kan, ngăn lah UBND xã Quảng Sơn ƀư ăp nau kan njrăng rdâng tă bah bôk gay ma ntrŭnh ƀư nau ndâk tay rnoh neh tăm bri”./.

Nŭih rblang: H’Thi