Ôi 8/12, ta nkual ƀon têh Đà Lạt, HĐND n’gor Lâm Đồng khóa 10 lĕ ntơm ƀư rƀŭn tal 8 gay uănh lah nău kan ƀư tĭng hun hao wăng sa rêh jêng n’hanh tâm nchră, rƀŏng trong ndơ̆ ăp trong mkra rgâl du đêt nău jêr tâm trong kan ƀĭt joet, mât uănh ngih dak.

Năm 2022, wăng sa rêh jêng bah n’gor Lâm Đồng hun hao dăng tay, geh âk săk rnglăy têh ta lĕ rngôch ăp nău kan. Lĕ rngôch 18/18 rnoh ndơ ƀư dơi geh n’hanh rlău nkôp đah trong nchrăp n’gluh an. Tâm nĕ, uĕh ngăn lah rnoh hao jêng wăng sa geh tât 12,09%, rlău ngai nkôp đah trong nchrăp n’gluh an lah 6 tât 7%; lŏ mir hun hao đăp mpăn, công nghiệp-tăch rgâl hao âk, pâl nđaih rhŏ an ngăch; prăk geh tăch n’gluh hao âk nkôp đah trong nchrăp; sŏk an tơm prăk nchrăp lĕ năm geh 13.100 rmen prăk.

Lam ntŭk rƀŭn

Trong kan n’hŭch ach o nâp nâl geh âk săk rnglăy uĕh, đăp mpăn nău rêh jêng, mât njrăng bri dak dơi nâp nâl. Ntoh ngơi ntơm rƀŭn, wa Trần Đức Quận, Ủy viên Ban chấp hành Trung ương đảng, Bí thư n’gor ủy, Kruanh HĐND n’gor Lâm Đồng an lah, bôl wăng sa rêh jêng dơi geh âk nău uĕh yơn hôm e geh âk nău nkân, jêr tâm trong kan ntĭm rđău, ƀĭt joet an dơi uănh lah, tâm nchră, ntĭm nkô̆ nău n’hanh trong mkra.

Ta rơh rƀŭn aơ, ăp đại biểu mbra ƀư an rgop nău đah 27 nău mbơh, unh mĭn tay mbơh an 28 nghị quyết khlay, n’hanh nsơr ty mbơh an ăp nău nchrăp ƀư, nău rgop an tâm nchră geh trong têh hvi, geh nău jru hvi tât nău hun hao bah n’gor kơt: nău nchrăp ndâk ƀư trong cao tốc gưl Bảo Lộc-Liên Khương tĭng trong kan ndrel nsum êng; nău rgop an tâm nchră njrăng n’gang kol trong hăn ta nkual ƀon têh Đà Lạt.