VOV4.Mnông- Ta năp rnoh ntưp srê Covid-19 tâm n’gor hao ngăch, nar 24/2, UBND n’gor Lâm Đồng lĕ geh săm ƀŭt ntĭm đă ăp ntŭk kan têh, UBND ăp nkuăl, nkuăl ƀon têh ta n’gor n’hao nău kan mbơh tơih răng dăng ăp trong kan njrăng. Tâm n’gul khay ba năp, rnoh nuĭh ntưp Covid-19 mhe ta Lâm Đồng hao ngăch ndal ta rlău 285% đah rlău 12 rbăn nuĭh ntưp, n’hao rnoh nuĭh ntưp Covid-19 tâm n’gor hao rlău 25.700 nuĭh. Dŭt nkah, tâm rnoh ăp nuĭh ntưp Covid-19 dŭt âk lah kon hoc n’hanh nai nti. Kanŭng kơp bâh nar 7/2 tât aƀaơ, rnoh kơp ê hŏ tŏng ăp lĕ an saơ geh dŭt đê̆ 1.700 kon hoc n’hanh rhiăng nai nti geh năl ntưp Covid-19. UBND n’gor Lâm Đồng đă ntŭk kan ntĭm nti Lâm Đồng way geh uănh nđôi, uănh năl nău mbơh ƀư pah kan njrăng rdâng nuh srê ta ngih ntu, ăp ntŭk kan ntĭm nti ta ntŭk, rmal răng dăng ăp nuĭh mô geh ƀư tĭng ăp trong kan njrăng, rdâng nuh srê Covid-19 tĭng nău ntrŭnh. UBNDF n’gor Lâm Đồng lĕ ntĭm đă ntŭk kan dak si Lâm Đồng ngăch chuh vacxin Covid-19 ngăch lơn, ngăn lah ngăch chuh ntop nglai 1, n’hanh 2 an ăp nuĭh bâh 12 bnămn deh let lơ n’hanh chuh nkah tay, ntop tay an nuĭh bâh 18 năm deh let lơ, nđâp ma ăp nuĭh ƀon lan hăn bâh ntŭk êng tât. Đăp mpăn tâm khay 2/2022 aơ, lĕ rngôch nuĭh bâh 12 năm deh let lơ geh chuh vacxin tŏng ăp da dê.

Nuĭh rblang: Thị Đoắt