UBND n’gor Lâm Đồng ntĭm đă ăp nkuăl, nkuăl ƀon têh Đà Lạt n’hanh Bảo Lộc an geh uănh năl, uănh nđôi tay lĕ rngôch ăp nkual ƀon lan gŭ, ngih nti, ntŭk kan dak si, ntŭk kan pah kan,  ntŭk gŭ tahen ta nkual dăch dak me, dak bât, ntŭk jâng yôk gay ma ngăch saơ, mbơh njrăng ăp ntŭk mbra geh rluh neh, dak rchoh, dak băm.

Ngăn lah, UBND n’gor Lâm Đồng đă ăp ntŭk ta n’gor nsrôih ntrơn, ntrơn ăp rnăk ƀon lan, nuĭh pah kan tâm ntŭk kan, n’gâng kan ta nkual jâng yôk, nkual geh ntŭk sop prêh, nkue nkuăch, mbra geh rluh neh gay ma mât đăp mpăn tât săk nuĭh n’hanh drăp ndơ. Nkre lah, leo kan ƀư tĭng trong kan mât pă kơl, mât đăp mpăn ntŭk gŭ nde n’hanh nău rêh an ăp rnăk ƀon lan geh ntrơn du. Êng ta nkual yôk Bảo Lộc, an geh trong kan kâp chăm lĕ măng nar tâm rnôk lah mih hôm nha têh mbro, geh trong kan ndâk nsơm gay ma plơ̆ tay an hăn nsong ngăch ta trong geh nău tât.