Rơh thi tốt nghiệp THPT năm aơ, n’gor Lâm Đồng geh rlău 14.600 kon hoc râng thi, Ndrel đah nău kan pă an 39 ntŭk thi, 670 jrô nti ta 12 nkuăl, nkuăl ƀon têh ta lam n’gor, Lâm Đồng lĕ nchrăp tŏng ăp nău kan mpeh ndơ dŏng, ndơ kan n’hanh rnoh nuĭh kan hao tât rlău 2.600 nuĭh tât râng kơl an rơh thi tốt nghiệp.

Gay ma mât đăp mpăn rơh thi geh ƀư đăp mpăn, nar 27/6, UBND n’gor Lâm Đồng lĕ geh công văn ndal đă ntŭk kan ntĭm n’hanh nti, UBND ăp nkuăl, nkuăl ƀon têh n’hanh ăp ntŭk kan têh rgum ntĭm đă nchrăp tŏng ăp, ueh an ăp nău kan. Tâm nĕ, mô an geh kon hoc nklơi nti yor nău hăn nsong mô lah nău wăng sa jêr jŏt, ngăn lah ăp kon hoc gŭ ngai, kon hoc rnoi đê̆, oh kon ta rnoh rnăk ach o.