Rlău du khay aơ, nao Cil Kồng, nai ngih sam ƀŭt THPT Lang Biang, nkuăl têh Lạc Dương, nkuăl Lạc Dương, n’gor Lâm Đồng an âk mông nar mĭn njêng, jêh giáo án n’hanh ntop tay du đêt nkô̆ nău mhe tĭng bôk nău ntĭm nti phổ thông. Nai an gĭt gay tâm di uĕh nău ŭch ntĭm n’hanh nti, ăp nai râng tŏng ăp jrô tiăr nti, nchrăp an lăp năm nti mhe 2024-2025:

Năm nti mhe aơ, ngih sam ƀŭt kơt dŏng bôk nău ntĭm nti phổ thông 2018. Nai mpôl hên lĕ nchrăp tŏng ăp nkô̆ nău gay tâm di nău ŭch ntĭm nti. Rlău ma lôch jêh ăp jrô tiăr nti kơt dŏng ndrôm sam ƀŭt giáo khoa, trong ntĭm nti, uănh lah tĭng bôk nău trong nchrŏng mhe, mpôl hên nâp nâl nău way kan, lôch jêh ăp nău ntĭm, giáo án tâm trong nchrăp lăp năm nti. Đăp mpăn nău ntĭm n’hanh nti bah ngih sam ƀŭt geh săk rnglăy uĕh ngăn.

Ndrel đah n’hao nău kan an rmôt nai, ngih sam ƀŭt THPT Lang Biang lĕ nkra ngih sam ƀŭt, ntuh kơl ndoh ndơ n’hanh rwăt năp tŏng ăp ndoh ndơ, ndơ dŏng ntĭm nti đăp mpăn tâm di nău ŭch bôk nău ntĭm nti phổ thông năm 2018. Tĭng wa Hoàng Viết Phương, Groi hiệu trưởng ngih sam ƀŭt, năm nti mhe ngih sam ƀŭt geh 14 jrô đah rlău 600 kon hŏk, tâm nĕ kon hŏk rnoi mpôl đêt geh bơi n’gul. Ndrel đah tŏng ăp uĕh ăp ndơ ntĭm n’hanh nti, ngih sam ƀŭt uănh khlay nkra nkual kon hŏk gŭ, đăp mpăn ntŭk sông sa, gŭ âm an ăp kon hŏk nuĭh rnoi mpôl đêt.

Ngih sam ƀŭt geh  nkual nội trú tĭng trong ƀư bán trú ƀon lan mât tâm di nău ŭch sông sa gŭ âm an kon hŏk gŭ ăp ntŭk ngai lah xă Lát n’hanh Đưng K’Nớ, đah nklăp bah 80 tât 100 kon hŏk. Bah meng nĕ, ngih sam ƀŭt ƀư uĕh trong kan kon nuĭh tâm rgop ntĭm nti, kuăl jă rwăt năp ăp ndoh ndơ thể dục thể thao, mung phôi rhŏ an nău ŭch gŭ âm an kon hŏk. Ngih dak uănh tât ntop kơl an ngih sam ƀŭt dŭt âk, ntuh kơl ăp ngih wâl an ntŭk kon hŏk gŭ.

 Ta Dak Lak, ta năp năm nti mhe, tâm răm m’ak dơi tât ngih sam ƀŭt. Nai, kon hŏk nkual jru ngai, nkual jêr jŏt bah n’gor geh tay nău răm rnôk nti nsơm tâm ăp ngih sam ƀŭt, jrô nti mhe dơi ndâk ƀư kloh uĕh. Wa Lê Ngọc Quyết, Hiệu trưởng ngih sam ƀŭt Tiểu học Kim Đồng, xă Cư Kbang, nkuăl n’har bri Ea Súp, n’gor Dak Lak an gĭt, Cư Kbang lah xă dŭt jêr jŏt, 95% kon hŏk lah nuĭh rnoi mpôl đêt. Mhe rlău, ngih sam ƀŭt dơi nkuăl Ea Súp ntuh kơl jay 2 dăp đah 10 jrô nti, mpông pêr, jâng gung bê tông.

 Ngih sam ƀŭt dŭt răm ăp jrô nti kơt nĕ đăp mpăn 2 ôi/nar. Ngih sam ƀŭt nsrôih lĕ năm 2024 mbra geh ngih sam ƀŭt di rnoh 1.

Đah nkual jru ngai Krong Bông, n’gor Dak Lak, bôl hôm e âk jêr jŏt, nkuăl lĕ nsrôih rgŏ jă tơm prăk gay nkra ngih jrô nti, năp rwăt ndoh ndơ rhŏ an năm nti mhe. Wa Y Thức Êban, Groi Kruanh UBND nkuăl Krông Bông, mbơh:

UBND nkuăl lĕ ntĭm rđău jrô kan ntĭm nti tâm rgop đah ăp ntŭk ta lĕ rngôch ăp ngih sam ƀŭt kơp uănh tay ndoh ndơ ntĭm n’hanh nti ta lĕ rngôch ăp ngih sam ƀŭt ta lam nkuăl. Moh nău ŭch ƀư lor, moh nău ƀư bah kơi, tâm pă tĭng nău geh lah tŏng ri ƀư lĕ lơ uĕh, mô tŏng ri mpôl hên dăp tĭng gưl kơl lor.

Ta nkuăl Cư M’gar, n’gor Dak Lak, wa Nguyễn Tự Do, Kruanh jrô kan ntĭm nti an gĭt, bah âk tơm prăk, năm aơ nkuăl lĕ ntuh kơl rlău 42 rmen prăk gay ndâk ƀư, nkra ndoh ndơ n’hanh ntop tay ndơ ntĭm nti:

Kơp uănh tay ndoh ndơ gay đăp mpăn an nău ntĭm nti. Rlău ma nĕ nchrăp ăp nău ƀư gay ndâk ƀư ngih sam ƀŭt tâm di lam dak, đăp mpăn tĭng ngăch n’hanh rnoh an ma Nkuăl ủy, UBND nkuăl lĕ n’gluh an.

Năm nti 2024-2025, đah bôk nău “Kỷ cương trách nhiệm, rgâl mhe mô rlu, n’hao uĕh uĕh nâp”, n’gor Dak Lak nsrôih lĕ rngôch thôn, ƀon geh ngih sam ƀŭt, jrô mẫu giáo; rnoh jrô nti nâp nâl geh 93%, rnoh ngih sam ƀŭt tâm di lam dak rlău 60%.