Ta rơh rƀŭn nchră tal 10, HĐND n’gor Lâm Đồng khóa 10 uănh năl, nău kan pă an rdâk njêng ngih gŭ êng ta Đà Lạt hôm nha mô  đê̆. Âk nuĭh ƀư tih mpeh mât đăp mpăn rdâk njêng geh âk yơn lah ê hŏ geh nău dơi uănh năl, rmal ngăch. Geh nuĭh lĕ geh rmal yơn hôm nha geh ƀư tih ƀư an âk nuĭh dŭt ji nuih. Tâm nĕ, nău rluh rlâm taluy, rlâm ntŭk rdâk njêng ƀư geh 2 hê nuĭh khĭt n’hanh 5 nuĭh êng rmanh geh ta phường 10, nkuăl ƀon têh Đà Lạt ta dŭt khay 6 mhe nơh lah du nău ntĭt.

Wa Trần Văn Hiệp, kruanh UBND n’gor Lâm Đồng an lah, nău kan nchrăp kan, rdâk njêng nkuăl ƀon têh an geh mât ueh. N’gâng kan n’hanh ntŭk kan têh an geh nchră n’hanh ndơ̆ mbơh nău ntrŭnh kan na nê̆ an ăp nkual, ngăn lah ta ăp ntŭk sop prêh, tâm ƀah taluy prêh. Wa Trần Văn Hiệp ngơi.

“Uănh ngăn ma măt rĭ saơ mbra geh nău tât, mô geh nău njrăng, klach ngăn yơn Đà Lạt hôm nha an ƀư. Hăn ta trong Mimosa, Khe Sanh geh 3-4 ngih biệt thự têh ta jâng yôk, ta jâng yôk rĭ an geh uănh năl na nê̆. Mbra geh nău tât âk ngăn. Khlăy ngăn lah an geh mplơ̆ sŏk lĕ rngôch, nđâp ma săm ƀŭt an dơi rdâk ƀư. Rluh rlâm mhe nơh lah nău an saơ njrăng ngăn. An nkhŭt bun 5 rbăn tấn neh, nhân tĭng rnoh lah hao tât rlău 8 rbăn tấn, n’hanh geh tay ăp rơh mih rĭ hao tât rlău jât rbăn tấn. Nău tih lah lĕ ma trong điện, nĕ lah ƀư bah dih n’har dơi an ƀư. Ƀư taluy rĭ mô geh tĭng nău ntrŭnh bâh n’gor, ƀư rlău 4 met, tâm ƀah đah ăp taluy kơt nĕ mô tâm di jêng an geh ăp nău tât dŭt nsoach”.

Ta rơh rƀŭn nchră HĐND n’gor Gia Lai mhe nơh đŏng, ăp đại biểu lĕ rgum opp âk nău duh ndal ta trong kan rdâk njêng ta ntŭk. Tâm nĕ, nău rdâk njêng homestay, biệt thự têh mô geh mbơh dăn lĕ ƀư an ƀon lan dŭt ji nuih. Yor mbrơi ƀư lôch ăp nău nchrăp kan ta ăp ntŭk lĕ jêng nău văk jêr tâm nău mbơh tơih ăp nău ntuh kơl.

Wa Nguyễn Bá Thạch- Giám đốc ntŭk kan rdâk njêng n’gor Gia Lai an lah, nău kan mât uănh ngih dak mpeh đăp mpăn rdâk njêng ta ntŭk geh nău mô mât jăp. Âk nău kan mô tâm di lĕ ƀư lôch mhe geh saơ, jêng tât jêr rmal. Nău gĭt vât nău mĭn ƀư tĭng nău ntrŭnh bâh ƀon lan mô jăp, âk nuĭh gĭt tih yơn ndra ma ƀư tih, ƀư jêr, ntoch jong mông nar rmal hành chính.

Mpeh nău ƀư mbrơi ăp nău nchrăp kan, jêng tât geh âk nău jêr tâm trong mât uănh đăp mpăn rdâk njêng n’hanh khuch tât nău mbơh tơih trong kan ntuh kơl nsum, wa Nguyễn Bá Thạch an gĭt nău ngăn, aƀaơ, rnoh nchrăp kan, pă nău kan na nê̆ ta n’gor mhe geh ba dâng 30%, đê̆ lơn đah nău geh nsum ta lam dak.

 “Đă ăp ntŭk, ăp nău nchrăp kan mô hôm nha kŏ khan, jêng lah uănh nđôi gay ma nklơi jăng, pă dăp rnoh prăk gay ma njêng nău kan na nê̆, mât đăp mpăn ăp gâl kan tơm khlăy. Tâm rnôk ê hŏ tŏng rnoh kan n’hanh mông nar gay ma  nkŭm lĕ nău nchrăp kan na nê̆ ta ntŭk rĭ rdâk njêng dâl nău kan mât uănh gay ma mât đăp mpăn rdâk njêng ta ntŭk.