Kêng măng 13/11, Sở Nông nghiệp n’hanh Phát triển Nông thôn Lâm Đồng an gĭt hŏ geh siƀŭt njuăl UBND n’gor dăn đă geh trong ntop kơl du gâl deh prăk kon bah ngân sách ngih dak an ăp nuĭh, ăp mpôl manh tơm prăk gay ntrơn jay bil tâm trôm nkual ƀon têh Đà Lạt. Aƀaơ Đà Lạt geh rlău 2.900 ha jay bil mbrach lam 10 phường trôm nkual ƀon têh, âk rlău 60% neh tăm biăp, kao bah nkual ƀon têh.

Ta năp nău ngăn geh dja, Lâm Đồng hŏ geh đề án ntrơn lĕ rngôch jay bil tuch tăm luh bah trôm nkual ƀon têh Đà Lạt. Tâm nê, nău ŭch tât năm 2025 hŭch 20% rnoh hvi neh n’hanh hăn tât năm 2030 mbra mô hôm geh jay bil tâm trôm nkual ƀon têh Đà Lạt. Gay tĭng ƀư dơi nău dja ân geh rnoh prăk manh thuk đah rnoh prăk tât 4.820 rmen  prăk gay ntrơn, ntop kơl rgâl si tăm tâm jay bil jêng tăm bah dih nar. Yor kơt nê̆, Sở NN&PTNT Lâm Đồng dăn đă n’gor Lâm Đồng đă Ngân hàng Ngih dak Việt Nam ta Lâm Đồng gŭ mĭn, dŏng bôk nău kan an manh n’hanh ntrŭt nsôr hun hao tuch tăm dŏng công nghệ mhe, tuch tăm kloh uĕh gay rƀŏng tât ăp ngân hàng thương mại nta trong dơh an manh tơm prăk, đăp mpăn tĭng ƀư đề án ntrơn jay bil luh bah trôm nkual ƀon têh Đà Lạt.