VOV4.M’nông: Ôi lơ 14/10, n’gor Lâm Đồng hŏ mbơh nau ntrŭnh đă bah Kruanh UBND n’gor mpeh nau nchrăp mra rdâng đah nau tât bah mih dak lip ndrel rluh neh tâm nkuăl. Bah năp nau tât jêr bah mih dak lip, nchrăp tâm ăp nar tât, tâm n’gor Lâm Đồng geh mih têh, sial dăng, nau tât mra geh dak lip, băm ndrel rluh neh tâm âk nkuăl. Gay n’huch hô ngăn nau khuch mpeh neh tơm tăm, drăp ndơ ndrel mât ân đăp mpăn ân nŭih ƀon lan.

Kruanh UBND n’gor đă Rnâng kan rđau nau njrăng, rdâng trôk nar lơh ndrel joi kơl an nŭih mâp rmanh, ăp n’gâng kan, ntŭk kan, rmôt kan ndrel UBND ăp nkuăl, nkuăl ƀon têh tâm n’gor ndal ntrŭnh ƀư ăp nau kan rdâng đah trôk nar lơh. Ngăn lah, uănh tât nau kan njrăng rdâng n’ăp măng nar, năn rđau đă, nchrăp ntrŭnh nau kan rdâng tĭng nau kan “4 ta ntŭk” “3 nau mra”, năn ntrơn nŭih ƀon lan tă bah nkuăl geh nau mra khuch bah mih dak lip, rluh neh ntrơn leo ntŭk đăp mpăn./.

VOV/Nŭih rblang: H’Thi