Ôi ntri 11/9, Tỉnh ủy, HĐND, UBND, Ủy ban MTTQ Việt Nam n’gor Lâm Đồng ƀư rgŏ jă rgop kơl ƀon lan ăp n’gor, nkual ƀon têh mpeh Bắc geh khuch khat phŭt sial lơh. Rơh rgŏ jă dơi ƀư ma trong pơk sŏng dăng nthoi tât ăp bôk ƀoh tâm n’gor.

Ntơm bôk rơh rgŏ jă, kruanh Ủy ban MTTQ Việt Nam n’gor Lâm Đồng rŏ siƀŭt kuăl jă ăp nhih pah kan, đơn vị, ăp mpôl kan chính trị rêh jêng kon nuĭh, mpôl chroh rƀŭn, ăp doanh nghiệp n’hanh âk mpưm cán bộ, công chức, viên chức, nuĭh kan, mpôl tahen, đoàn viên, hội viên n’hanh ăp rơh kơn ƀon lan tâm n’gor ntik n’hao nuih n’hâm tâm rnglăp, “tâm pêt, tâm mât”, “du mbâr rnôk ji ngot dah du nklâm rnôk hơm” ndrel nsum ti  kơl ƀon lan ăp n’gor, nkual ƀon têh mpeh Bắc geh khuch khat phŭt mbrô 3 lơh. Lôch rơh rgŏ jă, n’gor Lâm Đồng rgum geh rlău 20 rmen prăk rgop. Lĕ rngôch rnoh prăk dja mbra dơi njuăl sĭt Ủy ban Trung ương MTTQ Việt Nam gay kơl ƀon lan ăp n’gor, nkual ƀon têh mpeh Bắc geh khuch khat tă bah phŭt lơh.