Ndơ̆ hên hăn ta trong bê tông ueh lâng, rgŏ ăp nor yôk đah mău nđir jêng bâh tơm cà phê hvi, mir tơm sa play ueh jêng, yuh Ka Lèm, nuĭh K’Ho, ta ƀon Đăng Rách, xã Gung Ré, nkuăl Di Linh, n’gor Lâm Đồng an gĭt, bâh geh trong hăn nsong dơh nơih, ndơ dŏng, ndơ tuch tăm nchoăn rdeng dơh nơih, ƀon ngai geh dăch lơn đah nkual nklang jêng nău rêh wăng sa bâh nuĭh ƀon lan lĕ hun hao dŭt ueh đah ntơm nơh. Ăp rnăk ăp jay gơih nđơr pah kan, mô hôm geh nău mĭn kâp knơm ta nău kơl an bâh Đảng n’hanh ngih dak.

" Đảng, Ngih dak lĕ mât kơl an oh yuh bu ur, tâm nĕ geh oh yuh bu ur rnoi đê̆ lah êng tâm nău pah kan jan sa gay ma ăp nar lơ ma hun hao. Gĭt nău pah kan jan sa n’hao nău rêh jêng bâh rnăk vâl, ƀon lan ntop kơl jut jăng ach o an nâp nâl. Lah ueh Đảng, ngih dak lĕ mât kơl tât nău rêh ƀon lan rnoi đê̆, ntĭm nti trong pah kan gay ma n’hao nău rêh rnăk vâl n’hanh ƀon lan".

Xã Gung Ré rlău 4 rbăn ha neh tuch tăm, tâm nĕ geh 1.600ha cà phê, rlău 200ha ba lŏ lah 2 tơm tăm tơm. Ăp năm ba năp, Gung Ré hôm nha geh hun geh rhiăng ha tơm sa play êng kơt lah bơ, sầu riêng, mắc ca, chanh rse, dâu tằm n’hanh âk rnoh neh tăm biăp êng ăp ntil. Bâh geh uănh khlăy rgâl tơm tăm tĭng trong nâp nâl n’hao nău geh khlăy ndơ tăch rgâl, ndơ̆ ăp ntil tơm tăm mhe geh nău dơi pah kan n’hanh nău ueh pah kan tuch tăm, nkre lah dŏng ăp nău kĩ thuật mhe tâm nău pah kan, nău geh ta du rnoh neh tuch tăm bâh Gung Ré lĕ geh bơi tât 150 rkeh prăk/ha/năm, hao 30 rkeh prăk/ha đah 2 năm ba năp. Rnoh rnăk ach o lĕ hŭch jur hôm 5%.

Tĭng wa K’Keo, Bí thư chi bộ thôn Hàng Làng, nău rêh bâh ƀon lan geh rgâl na nê̆ lah geh nău mât kơl ntuh kơl an bâh Đảng n’hanh ngih dak mpeh ăp nău kan.

"Ủy ban Nhân dân xã dŭt mât uănh, cán bộ hăn tât ta ƀon gay ma ôp khâl, rgŏ jă, ntĭm nti kơl an, leo ƀư an ƀon lan gĭt trong kan bâh nĕ geh nău tâm gĭt vât bâh ƀon lan ăp nar lơ ma hao. Ƀon lan geh tŏng ndơ sông sa n’hanh nău rêh ăp nar lơ ma geh n’hao lơn đah ba năp nơh. Ƀon lan dŭt lah ueh Đảng, ngih dak, ngăn lah cán bộ ta ntŭk lĕ dŭt mât uănh ntĭm leo an ƀon lan ta ƀon tâm nău pah kan jan sa gay ma dơi geh kơt nar aơ”.

Wa Trịnh Văn Dũng, Kruanh UBND xã Gung Ré an gĭt, xã geh rlău 1.600 rnăk vâl, bơi tât 7 rbăn nuĭh, tâm nĕ dŭt âk lah rnăk ach o geh rlău 45%. Ndrel đah nău mât kơl, an lor bâh Đảng n’hanh ngih dak tâm nău mbơh tơih ƀư âk nău kơl kan, bôk nău kan, nău nchrăp ntuh kơl nan nkual rnoi đê̆, bâh nău tâm rnglăp, nsum soan, du nuih n’hâm bâh lĕ trong kan chính trị n’hanh nuĭh ƀon lan lĕ njêng soan dăng lĕ rngôch, kơl an ăp xã geh njoat hun hao rlet rlău nău jêr, rgum hun hao nău wăng sa n’hanh đăp mpăn chính trị. Năm 2016, Gung Ré geh kơp dơn lah xã geh tâm di nkual ƀon lan mhe. Wa Trịnh Văn Dũng lah na nê̆.

 “Lĕ rngôch trong kan chính trị lĕ lăp mbơh tơih, rgŏ jă nuĭh kan ndrel tât râng đah ƀon lan pơk hvi ăp nău kan trong kan ueh, nău kan di gay ma geh nău kan njêng nău ueh mhe n’hanh pơk hvi nău kan. Sŏk nău kan tơm khlăy lah nuĭh ƀon lan, nuĭh sŏng dăng tât bư leo nău kan n’hanh dơn nău kan jêng lah ƀon lan lĕ geh nău rgâl mhe ueh. Ăp nău kan trong kan hun hao tuch tăm, nău pah kan jan sa tuch tăm, rgâl mhe ntil tơm tăm, geh dŏng nău mhe tâm KHKT geh mbơh tơih săk rnglăy. Tât aƀaơ nău geh bâh ƀon lan lĕ geh hao bâh 38 rkeh prăk hao tât 48 rkeh prăk/hê/năm. Nĕ lah ăp nău rgâl mhe na nê̆, nău rêh bâh ƀon lan lĕ geh mât đăp mpăn, nău ntuh kơl hun hao wăng sa rnăk vâl lĕ hao”.

Aƀaơ, Gung Ré lĕ geh ntơm njêng ăp rnoh tâm rgop pah kan jan sa n’hanh tăch rvăt ntil ndơ geh ƀư. Ta ntŭk lĕ geh ntoh ăp nău kan rong ka dak nđik, hun hao ndrôk tăch sa poăch ueh nsĭt tay nău geh âk lơn. Ngăn lah, xã dôl hun hao wăng sa, pâl nđaih ta n’hâm bri, pâl nđaih ntŭk rêh jêng ndrel đah nău ueh văn hóa bâh nuĭh K’Ho. Bâh ăp nău dơi geh lĕ geh ndrel đah ăp nău mpŏng kan di, nău tâm ban nău mĭn kan bâh lĕ trong kan chính trị n’hanh ƀon lan, knơm an lah Gung Ré mbra dơi geh nkô̆ mpŏng xã nkual ƀon lan mhe ta năm 2024.