Lôch 3 năm tât khuch bah nuh srê COVID-19, Lễ Giỗ Tổ Hùng Vương năm Quý Mão dơi n’gor Phú Thọ ƀư nkre đah Pơh Văn hóa – Pâl nđaih neh ndru yău năm 2023 đah âk ntŭk mhe, mpơl săk tơm văn hóa uĕh êng nkual neh ndru yău; nkre nta trong dơh an ăp n’gor n’hanh ƀon lan lam dak ƀư ăp nău kan ngăn ngăn rƀŏng tât tu tơm, nkah gĭt n’hâm suan yău ye.

Tâm drăp ndơ ơm yău văn hóa rnoi mpôl, Đền Hùng n’hanh Nar Giỗ Tổ Hùng Vương lah nău ntĭt bah nuih n’hâm rŏng dak n’hanh suan dăng tâm rnglăp lam rnoi nuĭh. Nău way mbah Hùng Vương hŏ jêng săk tơm văn hóa, nău way ngêt dak kah gĭt tu tơm bah nuĭh Việt Nam he. Bol moh ndơ ƀư, ah ntŭk gŭ, ăp nuĭh kon neh Việt rƀŏng tât mpeh tu tơm, rƀŏng sĭt mpeh yău ye đah nuih n’hâm chon mbah, nkah gĭt. Năm 2023, Lễ Giỗ Tổ Hùng Vương n’hanh Pơh Văn hóa – Pâl nđaih neh ndru yău dơi n’gor Phú Thọ ƀư ntơm bah nar 20 - 29/4/2023 (jêng lah nar 1 - 10/3 năm Quý Mão) ta nkual ƀon têh Việt Trì, Nkual têl ơm yău kăl e Đền Hùng n’hanh ăp nkuâl tâm n’gor.

Gâl Lễ dơi n’gor Phú Thọ rđău đă ƀư đăp mpăn răp jăp huêng khlay, rgum tơm, geh nău nsum mpôl, rgum tâm ăp nău kan tơm. Lễ giỗ Đức Quốc Tổ Lạc Long Quân n’hanh mpoh nhang nkah gĭt Tổ Mẫu Âu Cơ; Lễ giỗ Tổ Hùng Vương n’hanh n’hơr kao ta Bức phù điêu “Wa Hồ nkoch bri đah cán bộ, tahen hăn chŏl lor”; Lễ mpoh nhang ta ăp ntŭk têl ơm yău mbah Hùng Vương, ăp danh nhân, danh tướng rơh Hùng Vương ta n’gor. Lễ mpoh nhang nkah gĭt ăp Vua Hùng bah ăp nkuâl, nkual  ƀon têh tâm n’gor.

Bah meng ăp nău way ơm, ăp nău kan gâl pâl rlưn năm aơ geh âk ntŭk mhe, nkre êt lhăt đah pâl nđaih, njêng ăp rêng kan pơh Văn hóa – Pâl nđaih, mpơl săk tơm văn hóa uĕh êng nkual neh ndru yău. Ntoh lư lah bôk nău kan ntơm pơk “Lễ hội Đền Hùng n’hanh Pơh Văn hóa – Pâl nđaih neh ndru yău năm 2023” n’hanh “Pơh lễ drăp ndơ ơm yău ntlơi an tay văn hóa mô mpơl săk dơi UNESCO nchih săk” tâm 8 mông măng nar 21/4/2023 ta Quảng trường Hùng Vương; Tâm nchră dak bah dih “Rgum nchră pâl nđaih, văn hóa, drăp ndơ ơm yău ntlơi an tay n’hanh hun hao nâp dăng Việt Nam”; Tâm rlong re n’hanh wah duk đar dâk nklang n’glău Công viên Văn Lang; Tâm rlong chưng play Cúp Hùng Vương; tâm rlong pah play ăp rmôt dăng lam dak tâm rlong cúp Hùng Vương; hội chợ Pâl nđaih Tây Bắc năm 2023; Hội chợ pla n’hơ tăch rgâl công thương nkual Đông Bắc - Phú Thọ năm 2023; Liên hoan Văn hóa ndơ sa me neh ndru yău; Hội trại văn hóa n’hanh Liên hoan njroh mprơ nsum mpôl rhŏ Giỗ Tổ Hùng Vương.

Rlău ma ăp nău kan văn hóa, thể thao, pâl nđaih ăp năm, năm aơ hôm ƀư ăp nău kan săk ntơr êng, nkre tâm lăp nsum đah ăp nău kan văn hóa way ơm n’hanh têh uĕh mhe geh suan rêng lam hvi kơt: Pla n’hơ “Drăp ndơ ơm yău ntlơi an tay văn hóa, pâl nđaih ăp nkual kinh đô Việt Nam”; Lễ hội ao dai kon se Việt Nam “Rƀŏng sĭt tu tơm”; an uănh nsoh ao dai rnoi nuĭh Việt Nam; Tâm rlong ndeh wah jâng ăp câu lạc bộ Việt Trì pơk hvi; leo ƀư mpôl famtrip “Njăr trong hăn pâl nđaih săk ntơr Trung du”… Bah nê, kơl năch dơi rlong ŭanh saơ nău way ơm ƀư lễ mbah Hùng Vương n’hanh ăp ndơ geh ƀư pâl nđaih ntĭt êng nkre đah văn hoá nkual me neh ndru yău.

Lơn lah, năm aơ n’gor Phú Thọ rgŏ jă tay, ntrŭt nsôr ăp rnăk ta n’gor nchrăp êng mâm piăng đăp mpăn huêng khlay, răm mƀak gay nkah gĭt, nuih n’hâm uĕh lŏng bah yău ye bah rnoi nuĭh tâm nar 10/3 âm lịch. Nar Giỗ Tổ Hùng Vương nar 10 khay pe âm lịch ăp năm hŏ jêng ntŭk tâm tuă huêng khlay bah ăp nuĭh ƀon lan dak Việt, ndjôt săk tơm rnoh khlay văn hóa way ơm rŏng dak, mpơl nău nkah gĭt jru ăp Vua Hùng n’hanh ăp rơh nuĭh gĭt blău hăn lor bôk năp hŏ geh n’hâm suan rdâk njêng neh dak n’hanh mât ndray neh dak; nkre rdâk tay nău tâm rnglăp têh lam rnoi nuĭh Việt Nam tâm rdâk njêng n’hanh mât njrăng neh dak.