N'gor Dak Lak n'glôch jêh Lễ hội cà phê Buôn Ma Thuột tâl 8, du lễ hội geh rnoh ƀư dŭt têh n'hanh geh âk rgâl mhe. Ta rơh dja, Dak Lak an saơ ngăn trong uănh jong n'hanh nău nsing nơm bah he ma bôk nkô̆ bah lễ hội“Buôn Ma Thuột- Ntŭk rgum tât bah cà phê lam ntŭr neh". N'hanh ăp ntil nău hŏ an saơ, ăp du rơh lễ hội lah ăp tơ̆ Dak Lak nsrôih ntrŭt ntrôl wăng sa n'hanh bun dăp văn hóa cà phê. Du blah mir văn hóa rsuel rklê, âk săk ntơr, dôl njêng suan ntrôl an Dak Lak tĭng kơn hăn tât rnoh kan têh bah he.        

Wa Đỗ Như Ý, ta nkual ƀon têh Hà Nội lah ngoăy tâm hang rmưn năch pâl nđaih rlong lĕ du bông Lễ Hội cà phê Buôn Ma Thuột tâl 8. Đah păng, Lễ hội cà phê rơh dja hŏ an tay nău nkah uĕh tâm ăp nău ƀư. Păng nkah đah cà phê Buôn Ma Thuột n'hanh nău tâm lăp nsum bah bri dak, kon nuĭh n'hanh văn hóa bah nkual neh:

"Gâp râng lễ hội cà phê Buôn Ma Thuột ntơm bah rnôk ntơm nti njroh mprơ, tât lễ hội trong nkual ƀon têh, măng njroh mprơ, lễ hội ánh sáng. Gâp hŏ ngêt cà phê ta trong Phan Đình Giót… Gâp saơ lah lễ hội năm aơ dŭt têh uĕh, dŭt rhơn mƀak, trôk nar nđik uĕh, kon nuĭh dêh bên, cà phê kah n'hanh ndjôt săk tơm Tây Nguyên kranh dăng.

Tâm rnôk năch pâl nđaih bah ngai jêr chuêl 5 nar lễ hội âk mpưm nău njroh mprơ, ŭnh chrêk lơp, âk săk ntơr n'hanh nuih n'hâm dêh bên năch bah tơm me cà phê, ri ăp nuĭh tơm leo ƀư lễ hội n'hanh ăp nău kan n'grŏ tĭng ta lam ăp nkuâl, thị xã tâm n'gor, dôl ndăn rhôp ƀô n'hŭm hôm nkân tay đŏng. Wa Hồ Sỹ Trung, tơm mir cà phê V’Ori, nkuâl Krông Pak, n'gor Dak Lak an gĭt, aơ lah lor bôk năp ăp jrô kan ta nkuâl ƀư n'grŏ tĭng nar Lễ hội cà phê Buôn Ma Thuột tâl 8, yơn hŏ njêng dơi ăp nău nkah têl jêr chuêl. Máy mpli cà phê n'gân ta Di tích lịch sử quốc gia Đồn điền cà phê Cada hŏ rhŏ dŏng lĕ suan dăng gay rhŏ an năch hăn uănh pâl cà phê dŭt ơm ta Việt Nam, khâl njăr trong mpơl tay lịch sử cà phê rlău 100 năm bah nkual neh dja. wa Hồ Sỹ Trung mpŏng, ăp nar lễ hội mhe aơ mbra mô dơn nkân tay kơt du nău nkah uĕh, ma hôm ntop tay nău rŏng đah cà phê, wăch rgum tay mpôl druh ndăm nsum ti hun hao n'gâng kan ndơ tăch, rdâk njêng văn hóa cà phê an Dak Lak:

"Ăp nar dŭt âk mpưm n'hanh dŭt rhơn mƀak lôch rlong saơ video farm (phim quay mir tăm cà phê) lôch nê ngêt cà phê hăn uănh saơ rêng ƀư tâm trong hăn cà phê Việt ăp băl mom hôm tât thư viện cà phê n'hanh gĭt rnoh khlay bah đồn điền cà phê kara tơm luh cà phê Việt rêng lam nău nê tât lĕ rngôch ăp băl mom gay mbra geh tay du trong rƀŏng n'gâng kan jŏ jong...."

Tâm n'hoch nuĭh âk mpưm tât đah Lễ hội cà phê Buôn Ma Thuột tâl 8, wa Nguyễn Văn Lạng, Kruanh Ủy ban nhân dân ơm n'gor Dak Lak, lah nuĭh hŏ saơ rlău lĕ 8 rơh lễ hội. Lah ngoăy tâm  ăp nuĭh tor luh jêng Lễ hội cà phê, wa Nguyễn Văn Lạng uănh năl, tât tâl 8 dơi ƀư, Dak  Lak mô dơn tât rnoh ƀư lễ hội têh lơn; âk mpưm, âk ntil, way rnâng kan lơn, ma hôm geh tâng jru nsum mpôl kloh rvah n'hanh nsing nơm lơn.

  Lễ hội dja mô dơn srĭnh ăp nău kan têh khlay bah n'gâng kan cà phê ma păng hôm nkre đah ăp nău kan êng ƀa ƀă mpơl suan dăng bah Dak Lak bu hăn tât lah saơ dơi nê lah nkual ƀon têh bah cà phê nuĭh ƀon lan lĕ dĭng nuĭh hăr mpeh cà phê lĕ dĭng nuĭh mbra jêng nuĭh rnâng kan nkoch mbơh mpeh cà phê jêng lah nsum mpôl ndrel râng khân păng n'hao êng săk nkoch n'hơ đah năch pâl nđaih n'hanh lam ntŭr neh.

Lah nuĭh hŏ  rlău lĕ 8 rơh lễ hội đŏng, nkre krêp dêh jru hvi đah nsum mpôl cà phê Việt Nam, tiến sĩ Trịnh Đức Minh, Kruanh Hiệp Hội cà phê Buôn Ma Thuột an lah, Lễ hội tâl 8 hŏ njrăng uănh khlay tât ăp nkô̆ hôr rsang rnglăy bah văn hóa cà phê, rnôk ndop âk workshop n'hanh talkshow tâm ăp nău kan khlay. Tiến sĩ Minh lah rjăp, lễ hội rơh dja nkre geh nău dơi nkoch n'hơ bah n'gâng kan Cà phê n'hanh văn hóa Tây Nguyên, nkre geh nău dơi trong rƀŏng gay ăp tơm nuĭh bah lễ  hội geh ăp njuat hăn soih aih tâm hun hao ndơ tăch n'hanh bun dăp văn hóa cà phê tâm let năp tay:

Lễ hội dja nkoch n'hơ an lam nuĭh saơ âk ntil saơ dơi nău têh hvi bah văn hóa cà phê. Ntĭt kơt ta ăp workshop, ntĭt kơt du rơh nkoch bri jê̆ nkoch mbơh mpeh ndơ mpli n'hanh kêt cà phê. Mô lah nkoch bri mpeh ngêt cà phê phin ri mhâm uănh năl. Lễ hội tĭng kơn kơl an nuĭh dŏng gĭt dơi rnoh khlay ngăn bah cà phê n'hanh hĭng ntơr tay cà phê gay ƀư pâl nđaih.

Lễ Hội cà phê Buôn Ma Thuột tâl 8, ƀư tâm âk nău mpơl dơh uĕh, đah rnoh khlay cà phê tât rnoh khlay n'hanh đăp mpăn ndrel đah ăp kho cà phê bah Dak Lak hôm dăp bêng, đah lĕ 5 nar bah lễ hội ƀư tâm trôk nar nđik uĕh da dê, đah ăp trong nchrăp kan têh bah Buôn Ma Thuột dôl tâm rơh tât lôch. Wa Trần Đức Nhật, Groi Kruanh UBND nkual ƀon têh Buôn Ma Thuột an gĭt, nkual ƀon têh tâm năm bôk năp tĭng ƀư trong leo kan mha êng hŏ dơi quốc hội uănh an dŏng đŏng, dôl gŭ mĭn rdâk njêng Buôn Ma Thuột jêng nkual ƀon têh cà phê bah lam ntŭr neh....Yor kơt nê̆, nău dơi bah lễ hội cà phê tâl 8 geh nkô̆ dŭt khlay tâm let năp tay:

Ƀư geh nău dơi lễ hội cà phê Buôn Ma Thuột tâl 8 dja lah jâng ntơm gay mpôl hên ƀư lôch jêh kơi ntop tâm đề cương rdâk njêng săk ntơ lư Buôn Ma Thuột jêng nkual ƀon têh bah lam ntŭr neh, ntrŏng dơi ntŭk lah rgum tơm ntŭk lah nău dơn kan tơm ma nkual ƀon têh Buôn Ma Thuột ân tĭng ƀư tâm let năp tay. Mpŏng lah Buôn Ma Thuột mbrơi mbrơi jêng du ntŭk tât gay rnôk nkah tât Buôn Ma Thuột bah Việt Nam lah nkah tât du nkual ƀon têh cà phê bah lam ntŭr neh.

Rlău 100 năm tơm cà phê hun hao ta Dak Lak, bơi 20 năm lễ hội Cà phê Buôn Ma Thuột dơi ƀư, tơm cà phê hŏ lăp jru tâm nău rêh n'hanh văn hóa bah ăp rnoi nuĭh tâm n'gor, rêng lam ăp nkual Tây Nguyên n'hanh lam dak. Ndrel đah lễ hội cà phê 2 năm 1 tơ̆, Dak Lak-Buôn Ma Thuột hôm jêng ntŭk rgum ƀư ăp rơh tâm rlong cà phê kah khlay bah Việt Nam, ndơ̆ cà phê kah khlay Việt Nam hăn lam ntŭr neh; hŏ rdâk njêng geh nău ndru rêh cà phê rup uĕh măt uănh êng n'hanh geh rnoh wăng sa dŭt khlay. Bah meng nê, Lễ hội chĭng gong, Lễ hội xuân bah ăp rnoi nuĭh ƀon lan Tây Bắc, Đông Bắc, Hội xuân Quan họ Bắc Ninh nar lơn ma tâm râp lăp ta nkual neh dja đŏng. Nkual mir văn hoá rsuel rklê, âk ntil đah n'gâng tơm lah wăng sa -văn hóa cà phê, dôl njêng suan ntrôl dăng ndơ̆ Dak Lak tĭng kơn tât ăp rnoh kan têh bah he: rdâk njêng nkual ƀon têh Buôn Ma Thuột  jêng ntŭk rgum tât bah cà phê lam ntŭr neh./.