VOV4.M’nông: Ntơm bah rnôk srê Covid-19 ntoh, cán bộ, tahen biên phòng n’gor Dak Lak mro nsôih rlet rlau nau jêr, mât êng nau kan bah nơm gay ma ƀư ueh nau kan bar ntil kan “Nkre mât nâp đăp mpăn nkuăl n’har bri neh dak nkre njrăng rdâng srê ji”. Nau aơ lơn ma ueh tay rup gui rahen biên phòng tâm nkuăl n’har bri Dak Lak.

Tâm nklang bri duh nar bah khay 3 Tây Nguyên, tâm chốt thôn Nhạp, xã Ia Lốp, nkuăl Ea Súp, n’gor Dak Lak, cán bộ, tahen Đồn biên phòng Ea H’Leo hôm ƀu rjăp ơm nau kan mât đăp mpăn, njrăng rdâng nâp srê ji Covid-19. Trung tá Nguyễn Thanh Tú, Groi kruanh rmôt trinh sát, Đồn biên phòng Ea H’Leo ƀư nau kan tâm Thôn Nhạp, nkoch: Geh rnôk srê ntoh luh hô ngăn, kon păng dôl lah sinh viên tâm nkuăl ƀon têh Hồ Chí Minh dôl ma ntưp srê Covid-19 mô geh nŭih gŭ kơl. Ur păng ta ngih ri vay ji kuet mro, yơn lah păng ndrel ma tahen ri măng nar mât ƀư nau kan, âk khay mô sĭt tâm ngih gay ma ƀư nau kan geh jao:

‘Kŏ rvê ngăn yor lah kon gâp kơt nê ma nơm kŏ mô geh nŭih tâm rnăk vâl kơl an. Nau ƀư nkhah bah kon nơm ri mhâm, hăn ngih dak si ri mhâm, mhâm nau bu săm, mhâm nau bu ƀư ri nơm mô gĭt ôh, nơm mô geh gŭ ta nê ri rvê ngăn. Yơn lah gay ndơn dơn nau kan bah nơm lah gŭ ta aơ mô geh lah du du tơ̆ ôh, gâp kŏ bonh đă ur kon mhâm ƀư ân nsôih rlet rnôk aơ yor nau jêr nê lah nau jêr nsum”.

Ngih păng ngai ma ntŭk kan rlau 40km, yơn yor nau kan Trung uý Hà Văn Tân, cán bộ tahen rmôt bonh đă ƀon lan tâm Đồn Biên phòng Ea H’Leo geh rnôk tât n’gul năm mô sĭt ngih. Trung uý Tân nkoch: Rnôk ur păng ntưp srê F0, kon khân păng 17 khay ri njoăl ngih u păng. Bol ma nkah nklâng ma ur, kon, yơn păng gŭ nsôih gŭ ƀư nau kan:

‘Ngăn lah ur gâp ri păng gĭt đŏng, tâm pă nau kan ma nơm. Gâp kŏ nkah đŏng ma ur kon bol ma mô lăng ngai, yơn geh rnôk bah năp srê tât 3 khay mô sĭt. Đah săk gâp ntơm bah rnôk hăn nti ri gĭt lah nuih n’hâm ƀư nau kan tahen ri nsôih ma bonh đă săk jăn nơm gay ma ƀư jêh nau kan geh jao”.

Tâm rnôk tahen ƀư nau kan tâm nkuăl n’har bri, Trung uý Nông Văn Lợi, Đồn biên phòng Ia Rvê ndơn geh bu mbơh lah bơ̆ păng tâm Bình Dương geh ntưp srê ndrel lĕ khĭt tâm rnôk srê dôl ma ntưp hô ngăn. Trung uý Lợi nkoch: Tăng kah bơ̆ khĭt ri nơm rngot ngăn. Yơn rnôk nê srê nuh dôl ma jêr ndrel nơm dôl ma pah kan ri mô dơi sĭt ôh:

‘Tâm rnôk ƀư nau kan njrăng rdâng srê Covid-19 ndơn geh nau mbơh lah bơ̆ gâp khĭt ta Bình Dương. Nau mĭn kŏ rve eđŏng, kŏ geh nau rngot hô ngăn, yơn lah geh oh nô, geh Rđau kan bah ntŭk kan kuăn điện ôp khâl, bonh đă gâp. Đah ma nơm pah kan hŏ jŏ đŏng ta aơ ri kŏ geh nau mĭn nâp, kŏ năl lah nau kan geh kơt nê ri nơm mô dơi sĭt khâl rnăk vâl ôh ri kŏ kuăl điện thoại mbơh ân rnăk nơm yŭ yai”.

Bar năm rlau aơ, ƀư nau kan bar ntil kan, ăp đồn biên phòng tâm Dak Lak hŏ ƀư rlau 500 rmôt kan dah bơi tât 33 rbăn tơ̆ cán bộ, tahen râng kan, nkân njrăng nkuăl n’har bri. Nkre lah, mât ân ƀa ƀơ tâm 9 ntŭk kan nkân njrăng srê Covid-19. Bha nau kan mêt uănh, nkân njrăng, mêt uănh, ri tahen Biên phòng Dak Lak hŏ saơ, nhŭp ndrel ma mhal 18 nau tih, đah 57 nŭih tih tâm nkuăl n’har bri.

Tĭng Trung tá Nguyễn Văn An, Kruanh Đồn Biên phòng Ia Rvê: Ƀư nau kan bah N’gâng kan, rmôt kan hŏ nkân njrăng ăp nau in lăp tih dôih, nkre mô ân geh srê Covid-19 ntưp rêng:

‘Cán bộ, tahen bah đồn mro uănh nau kan mât nau ƀư tơm đăp mpăn nkuăl n’har bri geh nsum ma nau njrăng, rdâng srê Covid-19 ndrel geh năl nau kan njrăng rdâng srê kơt njrăng rdâng phung rlăng. Ndri ma, hên mro tâm bonh đă, kơl ntĭm nti ga n’hao nau gĭt, nau mĭn, nau kan rklaih nau jêr. Bol ma nau rêh ndoh ndơ, ntŭk ƀư kan tâm nkuăl n’har bri ri jêr ngăn, bri duh nar, ngih gŭ nklă nklel. Yơn đah ăp cán bộ tahen kŏ ƀư nuih n’hâm nau kan ueh nau kan geh jao”.

N’gor Dak Lak geh 7 đồn biên phòng geh jao nau mât rlau 71 km trong nkuăl n’har bri tâm dăch ma n’gor Muldulkiri, Campuchia. Nkuăl n’har bri tâm Dak Lak geh trong hăn, trong teng âk ngăn, ƀư âk nau tât bu ntŭng hăn ro, in lăp tih dôih ƀư ntưp srê Covid-19 bah n’har bri. Yơn, đah nau nsôih bah cán bộ, tahen biên phòng ndrel nau nsum ty rgop n’hâm bah n’gâng kan ndrel ƀon lan ƀư tơm tâm nkuăl n’har Dak Lak mro geh nâp nâl./.

Nŭih rblang: H’Thi