VOV4.M’nông: Ăp nar dŭt khay 4 mhe rlau Trường Sa geh ueh ngăn yor tâm ntŭk aơ bah 47 năm bah năp, lơ 29/4/1975, rmôt bah Đội 1 đặc công Hải quân ndrel du gưl rmôt đặc công Quân khu 5 knŭng tâm gleh khay hŏ lơh ngăch, ƀư jêh nau kan geh nau khlay ngăn-rklaih ân nkuăl gôl dak Trường Sa, rgop nau geh dơi, dăng ngăn bah rnoi mpôl. 47 năm rlau aơ, tahen ƀon lan Trường Sa nsum nuih n’hâm, ndrel ndâk nkuăl gôl dak nar lơn ma sâm geh, ăp kơn cán bộ, tahen Hải quân tâm ndơn mât nau ƀư tơm bah nkuăl neh dak bôk chông rlong sial.

Tâm nklang dak lêng, tâm nâm nâm mănh êr dôl mpăr bah năp n’gâng tơm bah nkuăl gôl dak Song Tử Tây, djăt nau mprơ quốc ca ƀư nuih n’hâm ntô̆ n’hao bah nŭih kon neh Việt. 10 nau răk nchăm bah tahen ƀon lan tâm tahen ƀon lan Việt Nam geh ăp tahen tâm Song Tử Tây răk ăp, ntoh nuih n’hâm rlet âk nau jêr tâm nkuăl dak lêng, mât ân nau ƀư tơm bah nkuăl dak lêng bah neh dak nơm.

Song Tử Tây lah nkuăl gôl dak bôk năp geh rklaih tâm ăp nar khay 4 năm 1975. Ƀư tĭng ăp nau ueh ơm bah tahen dak lêng, ăp năm rlau aơ, ƀon lan tâm nkuăl gôl dak Song Tử Tây mro tâm rnglăp, ndrel nsum ndâk njêng, mât neh dak dak lêng. Trung tá Phạm Quốc Hùng, Chính trị viên rmôt tâm lơh 2 nkuăl gôl dak Song Tử Tây mbơh:

‘Gâp mro uănh năl bol ma tâm boh nau kan ri kŏ nsôih kơl an neh dak ndrel ƀon lan, mât nâp nkuăl dak lêng đăp mpăn ndrel hun hao”.

47 năm hŏ rlet rlau, ăp rơh tahen ơm dak lêng nthoi tâm mât nau ƀư tơm bah nkuăl gôl dak ta Trường Sa mro nkah nau tâm lơh ngăch rklaih Trường Sa bah rơh mbơ̆, nô hăn lor mô nghoach nting mham gay ma mât nau ƀư tơm bah nkuăl dak lêng neh dak. Nê mô êng ntoh nuih n’hâm tâm lơh janh dăng, ma hôm lah nau ŭch đăp mpăn bah tahen dak lêng Việt Nam tâm nau mât neh dak tâm dak lêng. Trung tá Ngô Văn Hưng, rđau nkuăl gôl dak Trường Sa lah rjăp:

‘Nau kan tâm lơh lah nau kan chính tị tơm khlay, vay ƀư bah rmôt kan. Rmôt kan hŏ n’hao nau tâm lơh ân cán bộ tahen ntoh n’hao nuih n’hâm njrăng, mra tâm lơh hô, ndâk nau nchrăp mât rmôt kan ndrel ndơ dŏng gay ma ntĭm nti, rklaih ân geh nau dơi ăp nau kan mro mrăng geh nau nchrăp, nchrăp ueh mpeh kon nŭih, ndơ dŏng rnôk geh nau đă tâm lơh lah dơi ƀư nkre nau tâm lơh ân geh nau dơi, rgop nau mât nau ƀư tơm bah neh dak nơm”.

Trường Sa, ntŭk ngai bah neh dak, mô knŭng geh cán bộ, tahen măng nar mât uănh, ma hôm geh ăp rnăk vâl geh nau ueh m’ak. Đah ăp ƀon lan, khân păng rhơn yor măng nar kơl mât an dak lêng. Yuh Nguyễn Thị Mỹ Dung, nŭih ƀon lan tâm Trường Sa nkoch: Ntŭk bôk trong sial aơ, nau rêh ueh ndrel ma nau tâm boh tahen ƀon lan hŏ du gưl kơl an kônh wa bah oi nau jêr, tahen ƀon lan du nuih n’hâm nsum ty, nsum n’hâm gay ma mât nâp nau đăp mpăn:

‘Rnơm nau kơl an bah Đảng, Ngih dak, Quân chủng Hải quân, nuih n’hâm bah lam dak rƀŏng tât Trường Sa, nau rêh tâm gôl dak geh âk nau rgâl ngăn mpeh nau ơm, nuih n’hâm, nau ueh jâng ntŭk gŭ, pơk trong ân nau rêh ueh lơn, ăp kon geh hăn nti. Bol ma mih nar mô ueh, jêr yơn lah tahen tâm nkuăl dak lêng du nuih n’hâm, tâm rnglăp rlet rlau nau jêr, rdâng bôk đah n’hâm soal, ndâk njêng Trường Sa nar lơn ma sâm geh ueh lăng lơn”.

Ntơm bah nkuăl gôl dak rmeh sial, duh nar, mô tŏng dak sât ri rnôk aơ rnơm geh nau kơl an bah Đảng, Ngih dak, tahen ndrel ƀon lan lam dak, Trường Sa geh rgâl âk ngăn, nar lơn ma ueh, ma ăp tŏng, nâp nâl lơn. Ăp ntŭk gung trong ngih vâl geh ndâk khoa học, trong hăn geh tŏ bê tông dĭng lĕ, kloh. Tâm neh choih ndrel san hô geh âk màu ndrih bah tơm si bàng, phong ba, tơm đung, nhàu, play mhung...Nau ueh mpeh byăp ndrih, điện dŏng, sóng điện thoại hŏ ƀư nau tâm êp lơn đah Trường Sa ndrel neh kơh. Wa Lương Xuân Giáp, Kruanh HĐND nkuăl Trường Sa mbơh: Bol ma hôm âk nau jêr, yơn ăp cán bộ, tahen ndrel ƀon lan nkuăl gôl dak mro gĭt kloh nau kan bah nơm:

‘Bol ma tâm moh nau kan tahen ndrel ƀon lan Trường Sa kŏ pah kan rjăp ân Đảng, neh dak, ƀon lan ndrel Xã hội chủ nghĩa, tâm rnglăp, tâm dăch du nuih n’hâm, nsôih rklaih nau jêr, ƀư jêh ăp nau kan geh jao, lah ntŭk nsing ân nŭih ƀon lan joi sŏk ka mât nâp ma dak lêng, mro nkah, mra tâm lơh khit săk, mât nâp nkuăl n’har bri bah neh dak”.

Rlet âk yan mih, nar, mô ueh bah trôk nar, Trường Sa hôm ntoh tâm nklang dak lêng du nuih n’hâm nâp mpeh nau mĭn rjăp ndrel nau rêh rjăp bah tahen ndrel ƀon lan Trường Sa tâm nklang dak lêng. Rlet âk nau jêr, nau kan, tahen ndrel ƀon lan nkuăl gôl dak Trường Sa hôm ƀư nâp nâl ăp nar ân nkô̆ nau ndâk njêng nkuăl gôl dak nar lơn nâp nâl./.

Nŭih rblang: H’Thi