N'gor Quảng Nam lah ntŭk dơi âk mpưm năch tâm n'hanh bah dih dak sơch  lah ntŭk tât ntơm bah rnôk Chính phủ pơk mpông lĕ rngôch nău kan pâl nđaih. Ntĭk uĕh săk geh bah he, n'gor Quảng Nam uănh khlay nkoch n'hơ âk drăp ndơ pâl nđaih nđĭr uĕh nkre đah mât ndray n'hanh ntô̆ n'hao rnoh khlay văn hóa rnoi mpôl đê̆ ta nkual yôk prêh, n'har bri, rgop ntrŭt ntrôl n'gâng kan pâl nđaih hun hao, n'hao geh nău rêh ƀon lan

Ntơm bah n'gul khay 3 mhe aơ, rnôk Việt Nam nthoi tay ăp trong mpăr hăn dak bah dih n'hanh pơk lĕ rngôch ăp nău kan pâl nđaih, n'gor Quảng Nam hŏ wơt hang rbăn tơ̆ năch pâl nđaih dah bah dih. Rlău 2 năm tât khuch nuh srê Covid-19, wa Debbie Baker năch pâl nđaih Hoa Kỳ mơ geh rnôk plơ̆ tay Việt Nam. Păng sơch nkual yôk n'har bri Đông Giang, n'gor Quảng Nam lah ntŭk rlu jâng. Wa Debbie Baker nkoch, ăp ndơ pâl nđaih nđĭr uĕh, pâl nđaih rlong hăn dŭt ŭch tâm rnôk dja.

“Gâp dŭt di nuih n'hâm rnôk tât Việt Nam, gâp rŏng Việt Nam n'hanh kon nuĭh ta aơ. Ăp nar gŭ ta aơ lah mông nar dŭt uĕh đah gâp, lơn lah rnôk dơi uănh saơ lễ hội văn hóa uĕh êng, bri dak uĕh reh. Ƀon lan ta aơ dŭt dêh bên, rŏng năch. Gâp dŭt ŭch ndơ sa bah ƀon lan ta aơ."

Bah năp rơh nuh srê Covid-19 ntoh luh, ăp năm ăp nkuâl mpeh yôk yang n'gor Quảng Nam kơt Phước Sơn, Tây Giang, Đông Giang… wơt hang rhiăng tơ̆ năch pâl nđaih. Âk ntŭk tât dơi năch pâl nđaih tâm n'hanh bah dih dak gĭt tât kơt Đỉnh Quế, bri drăp ndơ ntlơi an tay Pơ Mu, Ƀon pâl nđaih ƀon lan Bhơ Hôồng…

Âk tơ̆ hăn tât nkuâl Tây Giang, yuh Lương Thị Hương, Kruanh Văn phòng trong nchrăp kan Children Of Việt Nam hŏ nkoch n'hơ âk pâl nđaih dak bah dih hăn tât ta aơ rlong uănh saơ ăp lễ hội săk ntơr uĕh êng bah nuĭh ƀon lan Cơ Tu. Tĭng yuh Lương Thị Hương, rlău ma n'hâm sial nđik uĕh, kon nuĭh dêh bên ri bri dak âk mpưm, dơi mât ndray kơt ơm ta nkuâl Tây Giang lah ndơ dŭt uĕh gay hun hao pâl nđaih bri dak.

“Nău gâp dŭt nkah uĕh lah bu mât ndray dơi bri krŏng Pơ Mu, khân păng nchih mbrô tĭng tơm n'hanh jao an nuĭh ƀon lan mât njrăng êng. Rlău ma nê, gâp dŭt nkah uĕh đah lễ hội bah nuĭh ƀon lan ta aơ, nău kadŏ Tâng tung da dá dŭt wăch rgum âk năch pâl nđaih, gâp hŏ râng âk tơ̆ n'hanh mpôl hên tâm lăp nsum đah khân păng tâm nău kadŏ nê".

Âk năm rlău aơ, nkuâl Tây Giang hŏ wơt ăp mpôl năch dak bah dih râng ăp tour pâl nđaih nsum mpôl, rlong gĭt nău rêh, văn hoá bah ƀon lan Cơ Tu. Nô Pơloong Plênh, cán bộ Jrô kan Văn hóa n'hanh Thông tin nkuâl Tây Giang, lah nuĭh buăt nthoi, rgop nău mĭn uĕh êng mpeh pâl nđaih rlong uănh gĭt. Tâm ăp tơ̆ ndrel hăn đah năch pâl nđaih hăn uănh gĭt bri geh tơm Pơ Mu, bu ndăm Cơ Tu dja ƀư năch pâl nđaih dak bah ndrât ndal rnôk dŏng nău ngơi Anh gay nkoch n'hơ mpeh văn hoá bah ƀon lan he.

"He ŭch ăp rnoh khlay văn hóa uĕh lăng mbra dơi rêng tay tât ăp mpeh neh dak n'hanh tât đah băl mpôl lam ntŭr neh. Rnôk bôk năp ri mâp dŭt âk nău kŏ kol, nău mô tâm wă nău ngơi, hôm tât văn hóa ngêt sa bah khân păng dŭt êng bah he yơn khân păng dŭt ŭch dơi lăp tât mir, dơi nhŭp n'gâr kŭk gay chôk neh, tăm biăp tât măng sĭt su mbŭch ŭnh tâm nđŭr đah kônh wa".

Bah năp nuh srê Covid-19 ntoh luh, n'gor Quảng Nam lor nchrăp pơk hvi ntŭk pâl nđaih, mât dŏng săk geh ta nkual mpeh yôk yang nhâp nar đah bri dak yôk nor âk mpưm ndrel đah văn hóa ƀon lan ăp rnoi mpôl đê̆ săk ntơr êng. Wa Arất Blúi, Groi Kruanh UBND nkuâl Tây Giang, n'gor Quảng Nam an gĭt, pâl nđaih ta nkual mpeh yôk yang nhâp nar n'gor Quảng Nam ân ntuh kơl di rnoh gay mât uĕh lĕ săk tơm ndơ ơm geh.

“Mpôl hên ŭch rŏng Trung ương n'hanh n'gor Quảng Nam uănh khlay ntuh kơl lơn mpeh buăt nthoi ntung trong ndơ dŏng, kơl nău hăn rsong hăn soih aih, geh ăp đề án, trong kơl hun hao văn hóa, thể thao, pâl nđaih. Ân uănh khlay tât ăp rnoh khlay văn hóa mpơl săk n'hanh mô mpơl săk gay mât ndray, mpư n'hao n'hanh pơk hvi tay.”

Tâm trong rƀŏng hun hao n'gor Quảng Nam, 5 năm tât n'gor êng uănh khlay tât hun hao pâl nđaih nkual mpeh yôk yang nhâp nar. Wa Lê Trí Thanh, Kruanh UBND n'gor Quảng Nam an gĭt, hun hao pâl nđaih mpeh yôk yang n'gor Quảng Nam mô klaih luh đah nău mât ndray n'hanh hun hao bri n'hanh mât ndray văn hóa ƀon tơm ta ntŭk. Lah mât ndray n'hanh hun hao di trong rƀŏng, aơ lah ăp rnoh khlay n'gâng tơm njêng muh măt mhe an pâl nđaih Quảng Nam let năp tay.

“Hun hao tay pâl nđaih ta ăp ntŭk geh nău dơi mât dŏng mpeh pâl nđaih bri dak, pâl nđaih hưt săk n'hanh rlu rlău. Pâl nđaih bri dak nkre đah văn hóa ƀon tơm ta ntŭk bah ƀon lan rnoi mpôl đê̆ ta nkual mpeh yôk yang. Lĕ rngôch ăp ntil pâl nđaih têh n'hanh jê̆ mbra tâm lăp nsum gay njêng du suan dăng wăch rgum mhe an pâl nđaih nkual nhâp nar n'gor Quảng Nam./.”

Long Phi/ VOV miền Trung/Nuĭh rblang: Điểu Thân