VOV4.M'nông: Bri mât Yok Đôn geh rnoh hvi rlău 115.000 ha, gŭ njok hvi bar n'gor Dak Lak- Dak  Nông n'hanh kâng n'har đah n'gor Mundulkiri, Dak Campuchia. Ta aơ lơn âk lah bri lha tư̆ rŭng tâm khay wai kro phang hôm way kuăl lah bri rŭng "lha paih". Aơ lah bri mât gưl neh dak ta dak he hôm mât ndray dơi ntil bri mha êng dja. Gay mât njrăng đăp mpăn ăp ntôr bri "lha paih" dơh ŭnh sa tâm khay wai, bri mât Yok Đôn n'hanh ăp mpôl kan ta ntŭk hŏ n'hanh dôl an ƀư ăp kôp âk trong nkra njrăng n'gang, puh n'hât ŭnh sa bri.

        Đah trôk nar Tây Nguyên dôl lăp tâm khay wai kro phang. Ta nâm ăp n'hâm bri krŏng ta Bri mât neh dak Yok Đôn, âk dăp lha paih rŭng ta ăp ndru ngâr, gle, pih ja lok...hŏ khĭt kro. Wa Nguyễn Hữu Tạo – Groi Hạt trưởng Hạt kiểm lâm Vườn quốc gia Yok Đôn nkoch, rnôk khay dja pih rêp dŭt dơh ŭnh ƀoh. Ntơm bah bôk khay wai kro phang, ntŭk kan hŏ nsrôih an ƀư pah kan njrăng n'gang, puh n'hât ŭnh sa bri hôm. Ndrel đah kuaih trong n'har hang rbăn met nking ŭnh trĕ, nti njrăng n'gang, puh n'hât ŭnh sa bri, ntŭk kan hôm nkhah wăr, su kloh lor pih rêp bah ơm đŏng.

       “Tâm bri mât aƀaơ geh 17 trạm, đội n'hanh mpôl hên dôl rđău đă gŭ kâp ndăng măng nar, đăp mpăn ƀư tât lĕ rngôch ăp neh bri mât, tĭng ƀư su kloh lor pih rêp, rgum rkeh si ôm kro dơh ŭnh sa. Mhâm ƀư nău su pih rêp an ŭnh sa rôk lôk tâm neh, mô khuch tât tơm si, đăp mpăn an bri hao jêng nđĭr uĕh."

        Tâm nklang bri mât neh dak Yok Đôn aƀaơ geh bơi 30.000 rnăk ƀon lan gŭ rêh, mpeh 7 xã bah ăp nkuâl Buôn Đôn, Ea Súp (n'gor Dak Lak) n'hanh nkuâl Cư Jút (n'gor Dak Nông). Lĕ rngôch kônh wa lah nuĭh rnoi mpôl đê̆, nău rêh hôm nsing âk tâm bri. Wa H’Khưa Hđơt (nuĭh Rđe), ta buôn Jang Lành, xã Krông Na, nkuâl Buôn Đôn an gĭt, rnăk păng ndrel đah 19 rnăk êng ƀa ƀă dơn mât njrăng 500ha bri krŏng mpeh Bri mât gưl neh dak Yok Đôn. Tâm khay wai, kônh wa hŏ tâm pă ƀư jêng 5 rmôt tâm pleh hăn treng nđôi mât njrăng bri nkre đah ăp trong nkra njrăng n'gang, puh n'hât ŭnh sa bri.

      “Ntơm bah nar ăp cán bộ kiểm lâm jao an nău mât njrăng bri, nuĭh ƀon lan hăn bah kơi khân păng, ƀư jăp đŏng, mô an geh nău ŭnh sa bri, ăp nuĭh dơn mât njrăng bri tĭng bah kơi ăp cán bộ ƀư pah kan mât njrăng bri đŏng, mô an geh nău ŭnh sa bri. Ntơm bah nar ăp cán bộ kiểm lâm sĭt đah ƀon lan ri ntĭm nti an ƀon lan mô dơi ƀư mir ba, rŭn in neh bri, ntơm bah nê nuĭh ƀon lan dŭt gĭt mât njrăng bri đŏng.

        Bri mât gưl neh dak Yok Đôn lah ngoăy tâm ăp nkual bri dŏng mha êng dŭt têh hvi lam dak đah rlău 115.000 ha, gŭ njok hvi ta bar n'gor Dak Lak n'hanh Dak Nông, kâng n'har đah n'gor Mundulkiri, dak Campuchia. Ta aơ geh rlău 220 ntil si gle tâm nê geh âk ntil si mpêt khlay; nklăp 340 ntil mpô mpa gŭ rêh tâm bri, lơn lah rveh, kău, krŭp, bây, prok mpăr...

        Wa Phạm Tuấn Linh – Giám đốc Vườn quốc gia Yok Đôn nkoch, nău tâm boh kan nsum ăp kôp đah ăp mpôl kan kiểm lâm, n'gâng kan ta ntŭk n'hanh ăp rnăk dơn mât njrăng hŏ tĭng ƀư jăp pah kan mât njrăng bri. Tâm âk năm rlơ̆ aơ, bri mât gưl neh dak Yok Đôn mô an geh ŭnh sa bri têh. Khay wai dja, bri mât kan nsum đah ăp mpôl kan geh tât an ƀư lĕ n'hâm suan ăp trong nkra njrăng n'gang ŭnh sa bri, muĭh kuaih rlău 120 km trong mbor nking bah ŭnh ƀoh, nchih pla hang rhiăng păng mbơh njrăng lor, njêng 17 rmôt dâk kan lor tĭng ƀư nău kan groi nđôi, gŭ kâp, nkoch trêng, rgŏ jă nuĭh ƀon lan mât njrăng bri.

      “Ŭch mât njrăng bri mô lah njrăng n'gang puh n'hât ŭnh sa bri ri mpôl hên ntrŏng năl pah kan njrăng n'gang lah nău khlay tơm. Mpôl hên hŏ ƀư nkoch trêng an rlău 4.000 tơ̆ nuĭh ƀon lan râng n'hanh 5 nhih nti gay nuĭh ƀon lan, kon se nti gĭt dơi nău khlay bah bri, ntŭk gŭ rêh bri. Kan nsum đah UBND 7 xã nkual nklang bri an ƀư nău way tâm rgop kan nsum ƀư rsong hăn, mât njrăng, nking nchăng rmal ngăch ăp nău tih lơh khuch tât tâm bri. Ndrel đah nê lah đă 17 trạm, rmôt ta ntŭk nsrôih rsong hăn, nking nchăng ăp nuĭh mô lah ƀon lan way luh lăp tâm bri ndjôt nkre ŭnh long geh ma nău ƀư jêng ŭnh sa têh”./.

Nuĭh rblang: Điểu Thân