Bôk nău kan mât rong ndrôk yor Hội chữ thập đỏ nkuăl ƀon têh Buôn Ma Thuột, n’gor Dak Lak mbơh tơih tâm ăp năm ba năp lĕ nsĭt tay nău geh săk rnglăy na nê̆ rnôk ntop kơl âk rnăk hun hao bah ach o.

          VOV4.Mnông-Năm 2017, yuh H’Râu H’Đơk ta Buôn Ky, phường Thành Nhất, nkuăl ƀon têh Buôn Ma Thuột, n’gor Dak Lak geh hội chữ thập đỏ kơl an 1 mblâm ndrôk me deh kon. Tât aƀaơ, ndrôk me lĕ deh 2 mblâm ndrôk kon. Mhe aơ, yuh lĕ geh tăch du mblâm ndrôk dăm rlău 15 rkeh prăk sŏk prăk ƀư ndrung rong sŭr. Hôm ndrôk kon mhe deh yuh ndơ̆ an rnăk jêr jŏt êng mât rong. Yuh H’Râu nkoch: Nău wăng sa ăp nar lơ ma đăp mpăn, năm e nơh, rnăk vâl yuh dăn luh rnoh rnăk ach o.

          “Lah ueh Hội chữ thập đỏ nkuăl ƀon têh an rong ndrôk aƀaơ rnăk vâl lĕ bah ir ach o. Rnăk vâl mbra mât rong tay, an păng deh kon, bol ma jêr jŏt an geh nsrôih đŏng”.

          Lôch tă âk mông nar mât chăm, ndrôk bâh rnăk vâl yuh H’Phiết Niê, ta ƀon K’Mrơng P’rong A, xã EA Tu, nkuăl ƀon têh Buôn Ma Thuột lĕ deh kon. Yuh H’Phiết an gĭt:

          “ Ndrôk aơ ngih dak pă an gâp, jay gâp ach o ngăn jêng lah bu an kon gâp du mblâm ndrôk sĭt rong, jay gâp lah rnăk ach o, jay gŭ mô geh đŏng aƀaơ geh 1 mblâm ndrôk, rnôk ndrôk deh gâp rhơn ngăn, ngih dak an kon gâp rĭ gâp rong, gâp mât”.

          Wa Phạm Khánh Quyên, kruanh Hội chữ thập đỏ nkuăl ƀon têh Buôn Ma Thuột, n’gor Dak Lak an gĭt, tâm bar pe năm ba năp, ntŭk kan lĕ pă an 50 mblâm ndrôk me kơl an ăp rnăk jêr jŏt, dŭt âk lah rnoi đê̆, geh trong hun hao wăng sa. Trong kan geh pơk hvi tĭng trong kan, tâm rnôk ndrôk deh kon, rnăk dơn ndrôk mbra geh ndơ̆ 1 mblâm ndrôk kon an rnăk jêr jŏt êng. Gay ma ndrôk geh mât ueh. Ntŭk kan nkuăl ƀon têh lĕ tâm rgop đah n’gâng kan thú y ƀư nti nău kan mât rong ndrôk an ƀon lan.

          “ Nău kan aơ lĕ kơl an dŭt âk nuĭh ƀon lan. Dŭt âk rnăk lĕ geh kơl an ăp rnăk ach o hun hao jêng rnăk bah ach o, hôm đê̆ rnăk dăch ach o lĕ mô hôm ach o. Ăp rnăk aƀaơ lĕ hun hao wăng sa dŭt ueh, n’hanh kơt lah tŏng sa tŏng n’gut, mô hôm geh knơm ta nău kơl kan bâh ngih dak. Săk rnglăy bâh nău kan pă ndrôk mât rong aơ hôm nha geh mât n’hanh ăp gâl kan hội hộm nha dôl uănh nđôi. Ăp khăy ntŭk kan lĕ đă cán bộ jŭr gay ma uănh nđôi ndơ̆ mbơh nău kan an ăp rnăk ach o hôm e.

          Nuĭh rblang: Thị Đoắt