Mĭn joi tơm ntil mpa rong gay n’hao nău geh, rlău 4 năm bah năp, đảng viên mom Ly Seo Lử ta thôn n’har bri Lũng Pô, xă A Mú Sung, nkuăl Bát Xát lĕ rwăt 100 tơm play rba tượng sĭt tăm ta neh yôk bri bah rnăk wâl. Nô rgŏ jă kônh wa tâm thôn tăm ndrel gay jêng nkual ndoh ndơ. Nô Ly Seo Lử, thôn Lũng Pô, xă A Mú Sung, nkuăl Bát Xát nkoch:

Ly Seo Lử: Tăm tơm prit ri way geh tu sa, tăm bum âk năm ri ƀư blak neh jêng gâp rgâl tăm tơm sa play, ta aơ lah tơm rba. Bôk năp tơm hôm e jêt gâp mât chăm, yơn bah năm tal 3 tơm geh play dŭt âk.

          Wa Ma Seo Lằng, Bí thư chi bộ thôn Lũng Pô, xă A Mú Sung an gĭt, dĭng lĕ rnoh neh play rba ta thôn 4 ha. Tâm nĕ geh âk rnoh neh ntơm geh play năm bôk năp, tal 2 n’hanh play rba mbra tăm âk gay hun hao wăng sa bah thôn.

Dơi mât uănh bah xă mbra ndơ̆ play rba Lũng Pô lăp OCOP bah xă A Mú Sung. Gâp an lah aơ du tơm jŭt n’hŭch ach o nâp nâl ta thôn Lũng Pô.

Ndrel đah nău ŭch geh ăp njoăt hăn mhe tâm hun hao wăng sa rêh jêng ta ntŭk, 2 năm bah năp, nô Chảo Láo Tả, Groi Kruanh Hội Nông dân xă Dền Sáng lah ngoăy tâm 10 rnăk hăn bôk năp râng nău nchrăp ƀư tăm chanh rse. Tât aơ tay, ndrơng chanh rse kơl rnăk nô Tả geh tay prăk.

Hăn lor n’hanh rlong tăm 40 tơm. Ntơm geh play geh prăk hao bơi 10 rkeh prăk. Dŭt mpŏng kônh wa tâm xă n’hanh ta âk xă êng lah trôk nar tâm di ri tơm aơ mbra lah tơm khlay gay jŭt n’hŭch ach o, hun hao nâp nâl

          Nô Tẩn Láo Tả, thôn Nậm Giàng, xă Dền Sáng, nkuăl Bát Xát ŭch nti ntrong kan aơ gay yan tăm mhe n’hao rnoh tơm chanh rse, hao nău geh an rnăk wâl.

         Đảng viên mom Ly Seo Lử

Rnăk wâl gâp ri rơh nĕ dăn tăm yơn tăm đah rnoh đêt. Rơh aơ ŭch uănh ăp rnăk tăm âk ri hun hao bah tơm m’hâm ƀư jêh nĕ gâp ŭch đah rnăk wâl gâp tăm tay 3-400 tơm tay gay hun hao ntop nău geh an rnăk wâl”.

Ta Bát Xát, rlău ma nkoch trêng an ntrong leo ndâk njêng wăng sa, jŭt n’hŭch ach o, ăp đảng viên ntrong leo hăn lor tâm nău nkoch trêng rgŏ jă, rgop kơl gay ndâk njêng ƀon lan mhe. Kơt kơl rnăk ach o ƀư jay gŭ, jay ăch chrach mô lah kơl thôn ƀư trong hăn. Bí thư Đảng ủy xă Trịnh Tường: Lầu A Páo lĕ n’hanh dôl rgop ndơ̆ ntrong leo ndâk njêng ƀon lan mhe ta aơ geh nău rgâl na nê̆. Yuh Tẩn Lở Mẩy ta thôn Nà Đoong nkoch:

 Jay ơm bah oh ta ri pơng truh sat lĕ hôm, Geh nô Páo tât uănh saơ jay oh truh sat jêng dăn an oh du mlâm jay jêt jêt. Oh dŭt răm.

Wa Giàng A Sáo n’hanh yuh Tẩn Lở Mẩy ta thôn Nà Đoong knŭng lah 2 tâm âk rnăk ach o tâm xă Trịnh Tường dơi kơl ƀư jay mhe. N’hanh gay dơi ƀư nău nĕ, Bí thư đảng ủy xă Lầu A Páo geh dŭt âk rgop.

Gâp ndrel ăp đồng chí cán bộ xă tât hăn uănh na nê̆ ăp rnăk ach o geh geh rup, nuĭh ngăn đah nău rêh bah ƀon lan, bah nĕ nău kơl bah ăp rmôt kan, doanh nghiệp ndâk ƀư jay an nuĭh ƀon lan.

Dơi wât nău wăng sa bah âk nuĭh ƀon lan tâm xă hôm e njê, nău ndâk ƀư geh du mlâm jay nâp gay gŭ, mô lah dơi ƀư du trong hăn nsong dơh mbra mô dơh. Bí thư Đảng ủy xă Lầu A Páo lĕ hăn lor rgop soan, rgŏ jă ăp ntŭk kan doanh nghiệp kơl ndâk ƀư ƀon lan mhe. Nô Lý Xá Xe, Groi Kruanh Ban Tuyên vận xă Trịnh Tường, nkuăl Bát Xát mĭn lah:

Đah ăp rnăk jêr jŏt đah wăng sa, ri đồng chí Páo lĕ rgŏ jă nuĭh lŏng bôk tôr, ngih pah kan ntŭk kan doanh nghiệp ta ntŭk n’hanh ƀon lan kơl ăp rnăk ndâk ƀư ngih wâl kloh uĕh, tâm di bah thôn ƀon mhe.

Mât uĕh hăn ntrong leo lor, ăp đảng viên bah Đảng bộ Bát Xát ngăn ngên lah ăp nuĭh “Trêng nkoch” ntrôl ƀư tĭng rgâl nău wăng sa ta ntŭk. 4.440 đảng viên ta lam Đảng bộ mbra lah n’gâng tơm gay ƀư tĭng ăp nău rƀŏng tât bah nkuăl tâm năm 2022 n’hanh an lĕ lvang.