VOV4.M'nông: Di Linh lah nkuâl geh lơn âk nuĭh rnoi mpôl đê̆  K'ho bah n'gor Lâm Đồng. Tâm bah ri aơ nơh, rlău ma pah kan rdâk njêng đảng, rdâk njêng lam trong kan chính trị, nău n'glăp âk đảng viên tâm nkual nuĭh rnoi mpôl đê̆ dơi Đảng bộ nkuâl Di Linh nsrôih ntrôl dăng tĭng ƀư. Ndrel đah nê, nơm geh mât uĕh nău khlay ƀư tơm hăn chŏl lor bah đảng viên nuĭh rnoi mpôl đê̆ tâm hun hao wăng sa n'hanh rêh jêng kon nuĭh, âk ƀon lan hŏ geh nău rgâl kloh, tĭng kơn rlău jêr jŏt, nsan hao rdâk njêng nău rêh hơm răm, đăp mpăn.

Ntơm bah nar dơi dâk tâm rmôt bah Đảng, đảng viên K’Hiệu, Kruanh thôn 2, xã Đinh Trang Thượng, nkuâl Di Linh (Lâm Đồng) way jêng nuĭh dâk lor bôk năp rgŏ jă ăp trong leo kan ta ntŭk. Tâm nê geh trong leo kan dăp rgum si tăm hŏ jêng suan ring tam, kơl kônh wa tâm ƀon kơt dŏng, n'hao nsĭt geh wăng sa rnăk wâl. Ntơm bah 18 năm bah năp nơh, rnôk dơi râng jrô kơi năp nti sreh tăm tay cà phê, K’Hiệu hŏ nănh sreh tơm cà phê kro ranh an săk geh đêt n'hanh rgâl tâm nê lah ntil cà phê mhe an săk geh âk. Lôch 3 năm rgâl tăm tĭng n'glôn, mir cà phê bah rnăk K’Hiệu hŏ n'hao săk geh, nsĭt geh wăng sa kloh. Ntơm bah nê, kônh wa tâm ƀon kơt ƀư. K'Hiệu an gĭt, ŭch kônh wa kơt tĭng, ri lor bôk năp he ân dâk ƀư lor, ngơi hăn nkre đah ƀư.  

“Đah nău ƀư lah đảng viên, lah cán bộ bah thôn, gâp nsrôih mât uĕh nău khlay kan bah he tâm rgŏ jă kônh wa hun hao wăng sa, mât chăm tơm cà phê, dŏng khoa học kỹ thuật tâm mât chăm, tăm tơm. Ndrel đah nê, he ân rgŏ jă kônh wa nsing nơm tâm gung trong rđău kan bah Đảng, trong kan pháp luật bah Ngih dak, rgŏ jă kon său hăn tât nhih nti n'hanh ăp trong leo tâm rlong tă bah n'gâng kan ta ntŭk rgŏ jă”.

Ntơm bah uănh khlay pah kan rdâk njêng đảng, rdâk njêng lam trong kan chính trị nâp dăng, tât aƀaơ, Đảng bộ xã Đinh Trang Thượng hŏ n'glăp dơi 64 đảng viên, lơn âk lah đảng viên nuĭh rnoi mpôl đê̆, sinh hoạt ta 7 chi bộ. Tĭng đảng viên mom K'Vinh, ta thôn 5, xã Đinh Trang Thượng, đảng viên lah nuĭh dâk leo lor tâm ƀư trong nchrăp, gung trong, trong kan bah Đảng n'hanh pháp luật bah Ngih dak. Yor kơt nê̆, K’Vinh mô rlu kơt nti, tiăr nti, tâm ôp rgâl tay ăp nău gĭt blău uĕh gay nđơn gĭt tay an kônh wa ƀon lan. Rlău ma râng hun hao trong leo kan tâm dâng, săk K'Vinh nơm way ndrel đah đảng viên tâm chi bộ nsrôih râng rgŏ jă kônh wa n'hao dăng pah kan jan sa, tâm kơl nsum hun hao wăng sa rnăk wâl, tâm tĭng ti luh, tơm- kon ntil, rong neh ƀư trong, rdâk njêng ƀon lan mhe, .....Tĭng K'Vinh, dơn geh du nuih n'hâm, nsum suan bah lĕ ma ƀon ri nău ji sât ji ngot mơ ngăch ntrôl rŭch, nău rêh mơ dơi rgâl, nsan hao nău rêh mơ hơm răm.   

“Lah du đảng viên he ân rêh tĭng ăp điều lệ bah đảng ndơ̆ luh. Nsrôih joi gĭt, kơt nti ăp Nghị quyết bah Trung ương, bah n'gor, bah nkuâl gay n'hao nău gĭt êng chính trị. Ndrel đah nê, ân geh nuih n'hâm rlăch ndăng tâm nău mât njrăng gung trong, trong nchrăp, trong kơl bah Đảng, pháp luật bah Ngih dak. Lơn lah, săk he nơm way hăn dâk lor tâm nău kan, leo lor tâm mbơh ngơi gŭ dâk tâm rŏng đah ƀon lan đah ăp nuĭh wăr kiău ma".

Mô dơn geh cán bộ đảng viên ta thôn, ƀon, lĕ ma ăp đảng viên lah kruanh rđău kan UBND ăp xã, thị trấn bah nkuâl Di Linh mât uĕh nău khlay ƀư tơm, leo lor ma ăp nău kan ngăn ngăn n'hanh na nê̆. Ntĭt kơt đảng viên K’Ly, Groi kruanh UBND xã Tân Thượng, nkuâl Di Linh. Saơ trong leo tăm tơm măng tây nsĭt tơm geh wăng sa đăp mpăn, tâm di đah nău way kan tuch tăm bah kônh wa tâm xã, K’Ly hŏ ntơm rlong tăm geh nău dơi lôch nê rgŏ jă kônh wa kơt tĭng ƀư nkre. K’Ly an gĭt, ŭch rgâl nău mĭn mât chăm bah nuĭh ƀon lan ri he ân ƀư lor ma nău kan ngăn ngăn, hŏ lah cán bộ đảng viên ri lơn ma dâk hăn lor bôk năp ăp nău kan.

“Aƀaơ xã Tân Thượng hŏ di rnoh rdâk njêng ƀon lan mhe gưl neh dak. Gay di lah xã ƀon lan mhe, nkô̆ nău n'hao nău geh, jut jăng ji ngot, n'hŭch ach o lah dŭt khlay. Yor kơt nê̆, gay wăng sa bah kônh wa hun hao đăp mpăn, nâp jong, rlău ma tơm tăm lah cà phê, xã rgŏ jă nuĭh ƀon lan tăm rlŭ, rgâl neh mir kro ranh jêng ăp ntil tơm tăm geh rnoh khlay wăng sa âk kơt bơ, sầu riêng, mắc ca… Nkre, gay nuĭh ƀon lan geh prăk ăp nar dja, săk gâp nơm leo lor tăm tơm măng tây gay nuĭh ƀon lan kơt nti n'hanh ƀư tĭng. Aƀaơ tơm măng tây trong tăch luh đăp mpăn, rnoh khlay bah 70.000đ tât 100.000đ/kg, âk nuĭh joi rvăt tât tâm mir yơn mô geh ndơ ma tăch. Let năp tay, gâp mbra nsrôih pơk hvi trong ntĭt leo dja gay âk kônh wa geh tơm wăng sa ăp nar, đăp mpăn nău rêh”

Aƀaơ lam nkuâl Di Linh geh rlău 4.360 đảng viên, tâm nê geh 868 đảng viên lah nuĭh rnoi mpôl đê̆. Tâm bah ri aơ nơh, ndrel đah ăp đảng viên ta 2 xã Đinh Trang Thượng n'hanh Tân Thượng, ăp đảng viên nuĭh rnoi mpôl đê̆ ta ăp xã Sơn Điền, Gia Bắc, Đinh Lạc bah nkuâl Di Linh way ƀư jăp nău kan bah he đŏng. Rmôt đảng viên hŏ jêng ăp nuĭh bôk trong leo lor, way dâk leo ăp nău kan, rgop uĕh tâm n'gâng kan hun hao wăng sa- rêh jêng kon nuĭh nsum bah ƀon tơm dor yôk Di Linh dja./.

Nuĭh rblang: Điểu Thân