VOV4.M'nông: Pơh bah năp nơh, Trung ương Đoàn Thanh niên Cộng sản Hồ Chính Minh hŏ ƀư n'glôch jêh nău kan khay druh ndăm 2022. Đah nkô̆ "Druh ndăm blău ƀư mhe", nău kan Khay druh ndăm năm 2022 hŏ dơi gưl n'gâng kan an ƀư jru lam hvi, wăch rgum âk mpưm đoàn viên, druh ndăm rchong nsrôih râng. Âk trong leo ƀư mhe, tâm trong dăp rgum ăp bôk nău kan, leo ƀư tâm khay druh dơi tâm nkoch gĭt, pơk hvi, nsĭt geh nău dơi tâm lam mpôl ma ăp pơh an ƀư nău kan.

Khay druh ndăm 2022 đah nkô̆ "Druh ndăm blău ƀư mhe" hŏ geh 67/67 n'gor, thành đoàn n'hanh đoàn mpeh n'gor râng, wăch rgum bơi 28.000 tơ̆ đoàn viên, druh ndăm, an ƀư ăp nău kan kơt tĭng đah lĕ rngôch tơm prăk rgum geh bơi 68 rmen prăk. Ăp pah kan rđău đă an ƀư ăp nău kan bah khay druh ndăm năm 2022 dơi tĭng ƀư năn ngăch, ntơm bah Trung ương tât tâm dâng.  

Ăp nău kan dơi an ƀư dơh soih tâm rnôk druh ndăm lam dak khuh n'gôr ƀư ăp nău kan nkah ndray 91 năm Nar njêng Đoàn TNCS Hồ Chí Minh, ƀư Đại hội Đoàn ăp gưl hăn tât Đại hội Đoàn lam dak tâl XII; grêt dăch nău mĭn rđău đă bah Đảng, Ngih dak, Chính phủ mpeh njrăng, n'gang nuh srê COVID-19; năn ngăch gay jêng ăp trong kan mhe tâm nău an ƀư nău kan tâm di đah nău tât krit nji bah nuh srê.

Âk trong ƀư mhe, blău ƀư mhe tâm dăp rgum ăp bôk nău kan, an ƀư tâm khay druh ndăm dơi tâm nkoch mbơh, pơk hvi ngăch, geh nău dơi ngăn tâm lam đoàn ma ăp pơh an ƀư nău kan. Mpôl đoàn viên, druh ndăm râng ăp nău kan tâm Khay druh ndăm âk mpưm, rơh kơn druh ndăm râng âk mpưm.

Bah meng nău hŏ dơi geh, du đêt nău kan mô hŏ dơi an rgum ƀư, mô hŏ dơi tât tĭng trong nchrăp Khay druh ndăm năm 2022, kơt: Pah kan tâm rgop kan nsum mbơh nti rƀŏng joi nău kan n'hanh nta joi nău kan an druh ndăm bah ăp gưl Đoàn hôm mpăng đêt, mô hŏ geh âk nău rgâl mhe; Mô hŏ geh trong ntĭt leo ƀư jêng nău dơi ngăn ngăn tâm pah kan ntop kơl rgâl mbrô, dŏng công nghệ tâm nău kan tuch tăm mât rong; an ƀư bôk nău kan nuĭh gĭt blău mom râng êng dăp rgum n'gâng kan tuch tăm mât rong hôm đêt, nău njêng, an ƀư mpôl râng êng dŏng công nghệ sinh học tâm mât njrăng ntŭk gŭ rêh mô nsĭt geh nău dơi tam.

        Ta rơh n'glôch jêh pah kan, âk nău nsŏng kơl bah ăp n'gor, thành đoàn ndơ̆ luh ăp nău dăn đă n'hao săk blău nău kan Đoàn tâm let năp tay. Thiếu tá Bạch Quốc Tuyên, Groi Bí Thư Đoàn Thanh niên Bộ Công an an nău rgop: Đah trong leo ƀư 5 nău kan chŏl lor, hun hao wăng sa rêh jêng kon nuĭh, mât njrăng neh dak, ân kan nsum tâm boh pah kan đah ăp n'gor, nkual ƀon têh, mât geh nău tam trong leo kan druh ndăm râng mât njrăng n'har bri:

       “Rlău ma nău he way ƀư khay 3 n'har bri ri he mbra gŭ mĭn mbra rgŏ jă bôk nău kan jong lơn. Ntĭt kơt, sơch năm ntrŏng năl lah Năm Druh ndăm Việt Nam đah n'har bri gôl dak, ri he rgum geh âk tơm ndơ lơn, âk nău kan lơn râng hun hao wăng sa rêh jêng kon nuĭh ta n'har bri. Tâl bar, mpôl hên dăn đă ăp n'gor, thành đoàn tâm boh kan nsum geh nău tam đah mpôl druh ndăm Bộ Công an tâm nău leo ƀư ăp nău kan mpeh n'har bri, gôl dak. Mpôl hên ŭch rŏng mbra geh nău nsŏng kơl đah Ban Bí thư Trung ương Đoàn an dŏng nău way trong kan tâm boh nsum đah Đoàn druh ndăm Bộ Công an đah n'gor, thành đoàn ntĭm nti nău kan bah Đoàn druh ndăm, Công an ăp n'gor, nkual ƀon têh mpeh Trung ương tâm ban kơt nău way tâm rgop kan nsum đah tâm pă leo ƀư ăp nău kan ta ntŭk ƀon lan ta ăp n'gor, thành đoàn”

          Lah ta rnôk tâm nchră, nô Nguyễn Anh Tuấn, Bí thư bôk năp Trung ương Đoàn thanh niên Cộng sản Hồ Chí Minh rnê âk ăp nău nsrôih n'hanh nău dơi geh ma ăp n'gor, thành đoàn lam dak hŏ dơi geh tâm Khay druh ndăm, tâm nê geh nău nchih nkah bah N'gâng kan Trung ương, n'gâng kan ăp n'gor, ƀon lan, njêng nuih n'hâm rhơn nđơr tâm rlong rgum an nău ƀư đại hội đoàn ăp gưl; âk nkô̆ jêr tâm Khay druh ndăm yơn hôm dơi tĭng ƀư đŏng. Yơn lah, âk ntil ndơ hôm mô hŏ dơi ƀư, hôm liăn, ân rhuăt luh nău tă ơm gĭt kan mpeh nsŏng kơl, rđău đă ƀĭt juet. Nô Nguyễn Anh Tuấn dăn đă:

         “Nău tă ơm gĭt he rhuăt luh rlău nău rđău đă bah Khay druh ndăm lah nău tâm boh đah ăp n'gâng kan lah ân dŭt uĕh. Ta n'gor ƀư dŭt jăp uĕh đŏng, lơn lah năm aơ lah năm ntơm geh Luật druh ndăm geh nău tam. Khay druh ndăm geh nău tâm dâl đah nuĭh mât bôk n'gâng kan đah druh ndăm. Ăp nuĭh râng nsŏng kơl nău dja dŭt uĕh n'hanh nău tâm dâl nê mơ jêng luh nău way đă tĭng trong kan, trong kơl, ndơ̆ luh ăp nău nkah mpeh nău kan gay Ủy ban giao nău kan đă ƀư an druh ndăm. Gâp mpŏng aơ lah nău tă ơm gĭt kan n'hanh he mbra ntik hvi uĕh lơn tâm let năp tay, lơn lah tâm nău nchrăp an đại hội bơi tât"./.

 Nuĭh rblang: Điểu Thân