Tâm ba năp nơh, pĭch đang neh, rlâm lŭ ta Tây Nguyên geh âk nău khuch khat hô đah săk soan, drăp ndơ bâh ƀon lan. Nkô̆ nău ƀư jêng geh âk rơh đang pĭch rlâm neh ta ăp ntŭk tâm ba năp nơh, ngăn lah ta Tây Nguyên lĕ geh groi kruanh n’gâng kan tài Nguyên n’hanh môi trường Lê Công Thành mbơh rblang ta rơh rƀŭn nchră chính phủ ăp khay ta khay 7.

Mbơh tơih du đê̆ nkô̆ nău đang, pĭch, Groi kruanh n’gâng kan tài nguyên n’hanh Môi trường Lê Công Thành mbơh rblang, đah ăp nor yôk, ntŭk sop ơm, ndrel đah nău rgâl mât măt neh bri jêng neh tăm tơm mô lah ƀư lâng ƀư jay, trong...neh mô hôm chăt, jêng tât mbra geh đang, pĭch rnôk geh mih têh. Nău tât bâh pĭch rlâm neh lah yor mih n’hach âk nar, mih têh, geh đang neh jay, yôk, sop, neh đang nkô̆, măt neh n’gơ... rnôk geh ăp nău kơt aơ, nuĭh ƀon lan an geh uănh nđôi nău mbơh bâh mih rchoh neh, pĭch đang neh, mbơh an n’gâng kan n’hanh ăp ntŭk gĭt. Ăp mpôl kan ta ntŭk an geh uănh nđôi n’hanh ƀư ntrơn ntŭk gŭ lah geh nău tât têh, an geh mât njrăng săk nơm lor. Groi kruanh n’gâng kan Tài Nguyên n’hanh Môi trường Lê Công Thành mbơh njrăng, khay mih mhe tât, nchroh mih sial hôm nha âk, mbra jêr ma njrăng. Thủ tướng Chính phủ lĕ geh công điện ntĭm đă na nê̆ an ăp n’gor ta Tây Nguyên geh uănh nđôi, ndâk nsơm tay.