VOV4.M'nông: Tâm rlău 4 mông dơm, kơp ntơm bah 2h 8 mnĭt tât 6h 4 mnĭt kêng măng nar 23/8, ta nkuâl Kon Plông, n'gor Kon Tum hŏ geh mbro 7 tơ̆ n'gơ neh. Ăp rơh n'gơ neh srêt, geh tâm di đah rơh nkrŭl dak bât Thủy điện Thượng Kon Tum dôl âk nuĭh khoa học ŭanh lah ngoăy tâm ăp nkô̆ ƀư jêng ăp rơh n'gơ neh ta nkuâl Kon Plông, n'gor Kon Tum. Nău lư bah UBND nkuâl Kon Plông an saơ mô hŏ năl geh khuch khat hô tă bah ăp rơh n'gơ neh lơh.

Lôch ôp uănh bah n'gâng kan ăp xã bah nkuâl, dơn geh du rnăk ƀon lan ta thôn Đăk Chờ, xã Đăk Ring geh khuch bah rơh n'gơ neh dơm. Na nê̆ ta chor jay mpeh bah kơi hŏ jŭr djơh bah rnăk ƀon lan geh ngói tŭp. N'gâng kan xã Đăk Ring hŏ đă nuĭh hăn ôp uănh kơl rnăk nkra bah khuch khat dĭl. Rlău ma nê UBND nkuâl mô hŏ năl geh du hê nuĭh n'hanh drăp ndơ khuch khat tă bah rơh n'gơ neh./.

Nuĭh rblang: Điểu Thân