Gay ƀư kơt tĭng ndrel rêng rnoh khlay bah ndrôm săm ƀŭt “Nsôih, ƀư nâp lơh njrăng rdâng nau sa khâm, mpŭng lir, rgop nau ndâk Đảng ndrel Ngih dak nơm nar lơn ƀư nâp, kloh” bah Tổng Bí thư Nguyễn Phú Trọng tâm ăp gưl kan Đoàn ndrel Đoàn viên, druh ndăm tâm rmôt ăp ntŭk kan Trung ương, kêng măng 13/3, ta Hà Nội. Rnâng kan Đoàn khối ƀư nau tâm nchră “Mom ndăm rmôt ăp ntŭk kan Trung ương nsôih njrăng, rdâng nau sa khâm, mpŭng lir”. Tâm rơh tâm nchră, Groi Giám đốc Học viện chính trị Quốc gia Hồ Chí Minh Lê Văn Lợi mbơh kloh, aơ lah rơh tâm nchră ntoh nau kơl an nau nsôih bah mom ndăm Rmôt ăp ntŭk kan Trung ương đah nau lơh njrăng nau sa khâm mpŭng lir.

Ăp nau tâm nchră hŏ rgum tâm ăp nkô̆ nau kơt lah: Ndơn saơ ăp nau kan sa khâm, nau tih, lŏ ƀư rjăp nau nsôih tâm nau njrăng rdâng nau sa khâm, mpŭng lir yor Đảng ndrel Ngih dak rgŏ jă ndrel ntrŭnh ƀư lah du nau kan mô dơi mô geh. Ƀư kloh ăp nau rgop bah mom ndăm ăp rmôt kan bah ntŭk kan Trung ương tâm nau njrăng, rdâng sa khâm, mpŭng lir tâm rơh rlau aơ. Bah nê nchrăp ăp nau kan, nau ƀư gay ma ƀư ueh lơn tay nau kan, nau nsôih bah mom ndăm bah rmôt ăp ntŭk kan Trung ương tâm nau kan “mô dơi sa khâm, mpŭng lir”./.