VOV4.M’nông- Lah rơh ba kơi, deh têh tâm nău đăp mpăn, nô A Phun, pah kan ta ntŭk kan ntĭm nti nău kan- giáo dục thường xuyên nkuăl Tu Mơ Rông, n’gor Kon Tum way mpơl nău lah ueh ăp rơh u che kăl e, lĕ khĭt yor nău đăp mpăn, ueh lăng bâh neh dak. Ăp rơh kahgĭt rklaih đăp mpăn lĕ rngôch miền Nam dơn ngoăy neh dak 30/4, nô lĕ geh ndơ̆ rnăk vâl, ur kon tât khâl nkual di tích lịch sử cách mạng Căn cứ n’gor ủy Kon Tum ta xã măng Ri. Ta aơ tâm lvang năm 1960-1972, n’gor Ủy  Kon Tum lĕ ntĭm đă geh nău dơi 4 rơh Đại hội n’gor đảng bộ (bâh đại hội 1, nar 9/3/1960 tât Đại hội 4, nar 26/10/1971), ngluh mbơh ăp nău ntrŭnh kan khlăy, ntĭm đă tahen n’hanh ƀon lan ăp mpôl rnoi rdâng lơh đah Mỹ kơl đăp mpăn neh dak. Nô A Phun nkoch:

“Săk gâp nơm ta rơh ba kơi, dŭt lah ueh nău kan bâh ăp che, ăp bơ̆ ăp nô kăl e lĕ ƀư nsĭt tay nău rêh ueh đăp mpăn kơt nar aơ. Đah nău nsrôih kơt nti, nti tĭng nău mhe, nău bôk năp gâp mĭn lah, an geh ƀư tĭng ueh trong kan, nău ntrŭnh bâh Đảng, nău kơl pháp luật bâh ngih dak, way kơt nti n’hao nău way kan, pơk hvi nău gĭt vât ta ntŭk rêh jêng, geh gĭt dơn ăp nău kan mhe bâh khoa học aƀaơ gay ma ntop rdâk njêng ta ntŭk aơ ăp nar lơ ma hun hao, tâm di đah nău hun hao nsum bâh lam dak. Gâp du nuih n’hâm tĭng Đảng, tĭng wa Hồ, lĕ nuih n’hâm tâm rgop săk soan jê̆ bah nơm gay ma rdâk njêng n’gor ăp nar lơ ma hun hao lơn”.

Nsrôih kơt nti, dŏng tĭng khoa học kĩ thuật ta mir tơm tăm, rnăk vâl nô Điểu Nanh, ta ƀon Bu N’jang, xã Trường Xuân, nkuăl Dak Song, n’gor Dak Nông lĕ geh nău rêh sâm geh. Điểu Nanh an gĭt, năm 2011, nô geh manh prăk ngân hàng chính sách rvăt tơm ntil, phân poh, ntuh kơl tăm 8 ha cà phê, tiêu, n’hanh ăp năm tăm tâm breh tuh, mbo gay ma sŏk gleh rong jong. Bâh ntơm geh mir cà phê, tiêu an nău geh đăp mpăn, wăng sa bâh rnăk vâl nô ăp nar lơ ma nâp nâl, geh ƀư ngih jay têh ueh, rvăt ndeh ô tô n’hanh kơl mât oh kon hăn nti. Ndrel đah hun hao wăng sa, nô hô,m nha an ƀon lan manh mô sŏk prăk kon rhiăng rkeh prăk gay ma geh prăk pah kan, n’hanh kơl an 6 rnăk tâm ƀon hun hao bah ach o. Nô Điểu Nanh nkoch.

Bâh geh nău mât kơl bâh Đảng, ngih dak, nău rêh gâp aƀaơ lĕ mbơm oi đah ntơm nơh âk ngăn. Gâp pah kan jan sa, tăm ca su ca phê nău geh mbơm đŏng. Gâp geh ƀon lan knơm ŭch rŏng săch ƀư kruanh ƀon gay ma geh ntĭm mbơh kơl an ƀon lan hun hao wăng sa”.

Mô lap geh nău tât ta jâng rnôk hôm nha jê̆, nô Ya phăng Mlô, ta bôn Jok, xã Ea H’Đing, nkuăl Cư M’gar, n’gor Dak Lak lĕ hun hao rlet rlău nău jêr jŏt gay ma pah kan jan sa, mât chăm săk nơm. Nô lĕ ntơm ƀư pơk ntŭk gri tăm tơm si, kao si gay ma geh prăk, kơl an rnăk vâl. Tât aƀaơ, lôch bơi tât 8 năm njêng nău kan, nô lĕ geh ntŭk tăch đăp mpăn, râng geh ăp khay ƀư n’hanh tăch rhiăng ndơ geh ƀư, nău geh ăp năm rlău rhiăng rkeh prăk.

Mhe nơh, nô dŭt rhơn lah ngoăy tâm 50 nuĭh mom ndăm quet nte geh rnê tâm bôk nău kan “Ntoh ang nău nsrôih Việt” năm 2021 yorr Trung ương Hội Liên hiệp thanh niên Việt Nam tâm rgop đah Ủy ban ngih dak mpeh nuĭh quet nte Việt Nam leo ƀư. Y Phăng Mlô nkoch:

Săk gâp nơm rĭ an geh nsrôih yor gâp lĕ quet kơt aơ mô an mê̆ bơ̆ n’hanh rnăk vâl rvê mât an nơm. Kơt aƀaơ rĭ nău kan lĕ đăp mpăn rĭ gâp ŭch tât tay mbra dơi geh hun hao têh lên âk lơn tay. geh âk nuĭh gĭt tât ntŭk kan gâp lơn đŏng. Rnôk geh pơk hvi nău pah kan rĭ gâp mbra joi tay nuĭh kơl kan, pă nău kan an ăp nuĭh ê hŏ geh nău kan”.

Nuĭh rblang: Thị Đoắt