Gay ma Tết Nguyên đán Giáp Thìn 2024 “ăp rnăk ăp jay geh Tết da dê” n’gor Kon Tum ntêm geh âk nău mât kơl ndơ Tết an ăp rnăk dơi kơl, nuĭh geh kan đah cách mạng, nuĭh âk năm deh, rnăk ach o, rnăk dăch ach o, nuĭh pah kan geh nău rêh jêr jŏt, ăp nuĭh dơh geh nău tât tâm nău rêh jêng...Tâm nĕ, n’gor mbra sŏk tơm prăk ngih dak rlău 8 rmen prăk kơl an rlău 16.780 rnăk ach o, dăch ach o rhơn năm mhe, vơt tết đah rnoh kơl an ăp rnăk ach o 600 rbăn prăk, ăp rnăk dăch ach o geh 300 rbăn prăk. Ndrel đah nĕ UBMTTQ Việt Nam n’hanh mpôl kan ăp gâl kan lĕ rgum âk rbăn nklâm ndơ gay ma kơl ndơ Tết an nuĭh ƀon lan.

Nô A Định, Bí thư chi bộ nkre kan kruanh thôn Đăk Bung, xã Đăk Rơ Nga, nkuăl Đăk Tô an gĭt: Chi bộ thôn Đăk Bung geh 14 đảng viên, gay ma mât đăp mpăn Tết tât đah ăp nuĭh, ăp jay, ăp đảng viên tâm Chi bộ geh pă uănh nđôi rmôt rnăk lĕ geh uănh năl ƀư tĭng tâm nău rêh bâh lĕ rngôch 161 rnăk đah 885 nuĭh bâh thôn gay ma mât kơl tết an ăp rnăk ƀon lan.”Ta năp Tết, mpôl hên lĕ ƀư uănh nđôi ăp rnăk ach o n’hanh ăp rnăk jêr jŏt gay ma kơl kan, kơl an ƀon lan geh du Tết ueh răm đăp mpăn hơm răm, ăp nuĭh geh tết da dê. Mpôl hên saơ nău mât bri geh dŭt âk nău ueh an ƀon lan, yor ƀon lan geh dơn ăp nău kơl an bâh nău mât bri, ƀon lan geh tay nău rhơn gay ma sa Tết ueh răm lơn. Ăp năm, Công ty TNHH- một thành viên Lâm nghiệp Đăk Tô lĕ tâm rgop đah thôn uănh ăp rnăk ach o, jêr jŏt gay ma nchih rnoh kơl phe n’hanh ăp ndơ dŏng an ƀon lan, công ty dŭt mât uănh ƀon lan ta rơh lễ, tết, ăp năm pă ndơ an ƀon lan da dê”.

Bơi 230 rnăk rnoi nuĭh Bana ta ƀon Dơk Rơng-ƀon Thhon ƀon mhe ta xă Glar, nkuăl Đăk Đoa, n’gor Gia Lai wơt năm mhe 2024 răm m’ak rnôk yan săk geh, rnoh khlay ndơ lŏ mir hao khlay, lơn lah cà phê. Lĕ rngôch rnăk wâl ƀon lan tâm ƀon geh mỉ cà phê, tiêu, chanh rse... rnăk đêt geh đêt sào, rnăk âk ri 4-5 ha... Năm bah năp, bơi 20 rnăk ƀon lan geh prăk rlău 1 rmen prăk bah tơm cà phê n’hanh knŭng kơp bah jêh pĕ cà phê, nuĭh ƀon lan tâm ƀon lĕ rwăt mhe rlău 50 bôk ndeh măy khlay prăk. Tâm năm mhe, nuĭh ƀon lan Dơk Rơng nsing nơm pah kan jan sa geh prăk âk. Bu ranh ƀon Vut, lah: “Năm tât, nuĭh ƀon lan mbra nsrôih rgâl nău mĭn đah trong ƀư, mât chăm tơm tăm, an mât chăm uĕh gay cà phê lơ săk geh. Nuĭh ƀon lan dŭt rhơn, rnôk dơi tăng, aƀaơ lĕ geh ntil cà phê săk geh âk lơn, bah năp đaơ cà phê TR4 kônh wa rhơn hôm, aƀaơ geh tay ntil mhe lah cà phê n’ha play rba, cà phê Xanh lùn săk geh âkl, dơi njrăng n’gang tu ndrŭng uĕh jêng kônh wa dôl nsrôih tăm ăp ntil mhe aơ. Kônh wa nsing nơm ntil mhe mbra geh âk lơn, nău rêh hơm, răm, tŏng ăp lơn”.

Nkuăl têh An Khê lah du nkuăl têh lĕ geh Thủ tướng Chính phủ kơp dơn lah ntŭk ƀư lôch nău kan rdâk njêng nkual ƀon lan mhe. Lôch geh ƀư lôch 19/19 nău mpŏng nkual ƀon lan mhe, nkuăl têh An Khê lĕ geh njoat rgâl nơm đah rnoh ngăch jêng nkuăl ƀon têh, hun hao ngăch ndrŏng, rnoh geh pah kan lvang năm 2016-2020 geh 12,75%/năm. Nău wăng sa geh nău rgâl mhe ueh. ăp di tích lịch sử n’hanh ntŭk kan way ơm văn hóa mô rlu geh mât rbăy n’hanh hun hao...nô Hồ Văn Hay, ta ƀon Pơ Nang, xã Tú An, nkuăl têh An Khê, n’gor Gia Lai nkoch.“Rnăk vâl gâp dŭt âk lah pah kan tăm tơm tăm, tăm tao, tăm bum n’hanh nău geh rnăk vâl gâp ăp năm geh bâh 50-60 rkeh prăk, tŏng gay ma dŏng tâm rnăk vâl đŏng, an oh kon hăn nti tŏng ăp, uănh nsum nkre ma tâm di mô ir lah pah pĭt ngăn, rêh đăp mpăn đŏng. Tâm năm mhe gâp mbra nsrôih pah kan n’hanh năm mhe aơ njoăl an ƀon lan geh dăng lơn săk soan pah kan gay ma bah lĕ nău ach o n’hanh nsrôih mât rbăy nău ueh êng an ƀon lan”.

Dak Găn lah xă nkual jru ngai ta nkuăl Dak Mil, n’gor Dak Nông. Di Tết năm aơ Đảng ủy, n’gâng kan ƀon lan n’hanh ăp rmôt kan chính trị, rêh jêng bah xă rgum âk trong rgŏ jă ăp tơm nuĭh gay mât uănh Tết an nuĭh ƀon lan n’hanh kônh wa rnoi mpôl đêt ta ƀon. Wa Y Srao, Kruanh hội chữ thập đỏ xă Dak Găn an gĭt,ânwu mĭn bah xă lah mô an rnăk nuĭh yor nău rêh jêr jŏ ma mô geh Tết. “Hội chữ thập đỏ tâm rgop đh gưl ủy, n’gâng kan ƀon lan n’hanh ăp rmôt kan nsum mpôl rgum rgŏ jă, tâm rgop gay mât uănh Tết an nuĭh ach o, ăp rnăk wâl dơi kơl n’hanh an ndơ an kônh wa ta ăp ƀon tâm xă. Mpôl hên nsrôih gay nuĭh ƀon lan wơt Tết hơm răm, mô an geh rnăk mô geh Tết. Nkhêp di năm mhe mbah rhơn lĕ rngôch kônh wa ngăch dăng, ƀư sa hao, tâm rnglăp lơn tay tâm ntŭk gŭ rêh, nĕ lah nău ma gâp mpŏng ŭch ngăn”.

Ntơm lăp năm mhe Giáp Thìn 2024, gay ma ăp nuĭh ăp rnăk ăp jay geh Tết, ăp ntŭk kan mpôl kan geh ƀư âk nău pah kan vơt tết, lĕ ndrel nsum ti đah n’gâng kan ăp n’gor Tây Nguyên mât kơl tết an ƀon lan, ngăn lah nuĭh ach o, nuĭh geh nău rêh jêr jŏt, nuĭh pah kan...an geh vơt Tết ueh răm, đăp mpăn, mô an geh rnăk ji ngot ta rơh Tết Nguyên đán Giáp Thìn 2024.

Xã n’har bri Quảng Trực, nkuăl ach o 30a Tuy Đức lah ngoăy tâm âk xã hôm nha dŭt jêr jŏt ta n’gor Dak Nông. Wa Điểu Khanh, groi kruanh UBND xã an gĭt, xã geh rnoh rnăk ach o hôm nha âk. Ngăn lah, năm 2023 mhe nơh, ta ntŭk lĕ geh ăp rơh rluh, pĭch rlâm neh neh yor nău tât bâh mih sial ƀư âk rnăk ƀon lan tup ta nău jêr jŏt. Yor nĕ, nău mât kơl tết an ƀon lan ta ntŭk geh Đảng ủy, n’gâng kan xã dŭt mât uănh, đah nău mĭn ăp nuĭh ăp rnăk geh tết da dê.“Rơh tết aơ xã Quảng Trực mpôl hên nsrôih rgŏ jă, tâm rgop bâh ăp doanh nghiệp, nuĭh lŏng nuih n’hâm gay ma mât kơl Tết an nuĭh ƀon lan, ngăn lah rnăk ach o, rnăk jêr jŏt. Mpôl hên nsrôih gay ma an ăp rnăk, ăp jay geh vơt tết hơm răm, đăp mpăn da dê”.                          

Mhe rlău, ăp Pôih tahen n’har bri ta N’gâng kan ntĭm rđău Tahen n’har bri Gia Lai lĕ ƀư bôk nău kan “Năm mhe n’har bri-Hơm răm ƀon lan” tĭng rơh ƀư ta ăp xă n’har bri Ia Grai, Đức Cơ, Chư Prông. Ta ăp bôk nău kan, ăp tahen n’har bri ndrel ƀon lan ta ntŭk n’klâm ƀănh chưng, tŭr chĭng, tâm nđŭr njroh mprơ gay tâm rnglăpo tahen-ƀon lan. Ndrel đah nĕ, ăp nuĭh lŏng bôk tôr ƀư ăp ndrơng ndơ mô sŏk prăk, tă bah nĕ an kônh wa âk nklâm ndơ lah nah bôi, phe n’hanh ndrôm sam ƀŭt, ndơ dŏng nti an kon hŏk. Tă bah nĕ kơl kônh wa dơi geh tết hơm răm lơn. Thươngj úy Siu Thương-Pôih tahen n’har bri Ia O lah mpeh nău mât uănh Tết an nuĭh ach o, kon se, nuĭh rnoi mpôl đêt ta ăp xă Ia O, Ia Chía: “Ăp năm tât tâm rơh tết tât năm mhe mpeh pôih tahen n’har bri I O, n’gor Gia Lai hăn mbah rhơn Tết, răm năm mhe ndrel đah kkonh wa, n’hanh di rơh Pôih tahen n’har bri n’hanh kônh wa dơi mâp măt. N’gâng kan ntĭm rđău tahen n’har bri n’gor ntĭm rđău pôih tahen n’har bri Ia O tâm ăp rơh wơt năm mhe an ndơ an ăp rnăk jêr jŏt. Jêh nĕ, ăp bu ranh ƀon, kônh ƀon lah ăp nuĭh ntop kơl an pôih tahen n’har bri tâm trong kan nkoch trêng. Tâm rơh Tết Nguyên đán năm aơ, Pôih tahen n’har bri lĕ an ndơ an ăp rnăk geh soan đah cách mạng, du nklâm ndơ khlay 300.000 prăk, rgop tât tết răm m’ak, gay kônh wa ndrel đah tahen n’har bri tâm rnglăp lơn tâm trong kan ndâk njêng rnă njrăng n’har bri.