VOV4.M’nông: Mhe aơ, pah kan đah rđau kan n’gor Khánh Hoà, Thủ tướng Chính phủ Phạm Minh Chính kŏ lah rjăp: Ndâk njêng nkuăl gôl dak Trường Sa jêng ntŭk kan văng sa tơm khlay, văn hoá, rêh jêng tâm dak lêng bah lam dak, lah nkuăl mât njrăng rjăp, rgop nau mât nau ƀư tơm bah dak lêng, dôl dak bah neh dak. Ăp năm rlau aơ, geh nau kơl an bah Đảng, Ngih dak ndrel tahen, ăp ntŭk ƀư nau kan kơl an nau rêh ndrel pah kan tâm gôl dak Trường Sa hŏ geh nkra, tâm nê geh pil măt nar ndrel trong điện sial.

Thiếu tá Nguyễn Văn Chiến, ƀư nau mât trong điện tâm gôl dak Trường Sa Đông mbơh, geh nau kơl an bah Đảng ndrel Ngih dak, nau rêh bah cán bộ, tahen ndrel ƀon lan nkuăl gôl dak Trường Sa, n’gor Khánh Hoà dôl ma nar lơn geh n’hao prêh. Mra dơi lah, Trường Sa lah nkuăl bôk năp tâm lam dak geh mpoh ang đah ŭnh măt nar kloh. Rnơm geh ŭnh nar nâp nâl aơ, ăp nau kan tâm gôl dak hŏ geh nơih lơn bah năp nê. Thiếu tá Nguyễn Văn Chiến, lah:

‘Gâp hŏ 8 tơ̆ sa tết tâm gôl dak lêng, ntrong điện bah năp nơh nding tâm máy mpoh ang điện, ê geh điện kloh ri ma nau pâl m’aih, nau rgŭm, njroh mprơ ri mô geh âk ôh, yor lah knŭng dŏng điện. Jêh aơ, đăp mpăn tă bah nau ƀư kan ân tât ntrong điện ŭnh nar, ri ma nau rêh bah cán bộ tahen tâm nkuăl gôl dak nar lơn ma ueh lơn”.

Bah năp nơh, tâm rnôk ngai ma neh kơh, ăp gôl dak Trường Sa ngăn lah dŏng máy rtoh nchuăt ma dak pring gay ma pă ang điện dŏng kan, mpoh ang ndrel pah kan bah tahen ndrel ƀon lan tâm lam dak. Ŭnh điện aơ mpoh ri khuch roh prăk lŏ mô geh đăp mpăn, ƀư rtoh sĭk ndrel lơh khuch ntŭk ntu, ri ma knŭng đê̆ mông dŏng tâm măng ndrel dŏng rnôk geh nau ŭch ngăn. Yơn 10 năm plơ̆ ma aơ, ăp gôl dak Trường Sa hŏ ntuh kơl nkra trong điện ŭnh nar kloh, ndăn geh n'hâm soan, nar tâm Trường Sa gay ma njêng điện kơl an nau rêh ndrel nau kan kŏ kơt lah nau mra tâm lơh.

Mô êng kơt nê, ntrong điện ŭnh nar kloh ta Trường Sa mro geh ntuh kơl, mĭn, rlong ndrel ma ƀư ueh, gay ma điện tâm Trường Sa aơ lơn ma ang lơn. Thượng uý Dương Tuấn Hải, ƀư trong điện tâm gôl dak Đá Đông A mbơh, gôl dak hŏ geh nglăp ndrel leo lăp dŏng trong pă điện kloh 3 pha tă bah dŭt năm e:

‘Điện aơ dăng ngăn, trong 3 pha đăp mpăn, rlong dŏng gay ma geh leo dŏng ân ntrong kan têh lơn, prêh lơn rđil trong điện di pha. Tĭng nau kơp ri du mông nkra geh đah n’hâm soan ndrel trong pol tâm gôl dak ri du mông nklăp 24 kw. Lah bri mih ndrel mô geh du nar, trong điện geh têm tâm 3 nar mô kâp ntop, rnôk aơ du nar dŏng nklăp 5kw”.

Trong pă điện kloh đah nau dăng ueh, mât đah máy tính, kŏ ŭch geh tahen leo dŏng ân geh joi ndrel kơt ntop ntĭm nti nau blau kan, ân geh dŏng trong ân đăp mpăn, săk tam. Nô Trần Văn Đức, nŭih ƀư nau kan tâm trạm gôl dak Đá Tây A nkoch:

‘Gâp ntơm nơh pah kan tâm nkuăl jru ngai, rnôk aơ ri pah kan đah ntil ndơ dŏng nchih ma nau ngơi Anh, nau dak ba dih, âk ntil jêr đŏng. Yơn (rmôt kan tâm neh kơh) lah geh nŭih hăn rdâl (ndơ dŏng) ri mô năn ôh, ri ma gâp ân geh kơt nti, joi uănh nau kan ân blau lơn. Mhe tâm dŏng ri jêr, rnôk aơ ri leo dŏng màn hình Inveter nglăp dŏng hôm, mât dŏng uănh ƀa ƀơ”.

Mhe aơ, ntoh nau tâm nar pah kan đah rđau kan tơm bah n’gor Khánh Hoà, Thủ tướng Phạm Minh Chính lah rjăp, ân geh ntrŭnh ăp ntrong kan hun hao văng sa dak lêng ndrel mât nau ƀư tơm gôl dak, ndrel ma nau mât neh dak, rnă njrăng, mât đăp mpăn chính trị ndrel đăp mpăn nau rêh tâm ăp nau ntrŭnh, ntrong kan, nau rgum, nau nchrăp, nau hun hao văng sa rêh jêng, ndâk njêng nkuăl gôl dak Trường Sa jêng ntŭk kan văng sa, văn hoá, rêh jêng tâm gôl dak bah lam dak, lah nkuăl njrăng rdâng nâp, rgop nau mât nau ƀư tơm bah dak lêng, gôl dak bah neh dak:

‘Hun hao Trường Sa jêng ntŭk kan tơm, văng s,a văn hoá, rêh jêng tâm gôl dak bah neh dak, lah nau ƀư nâp, mât đăp mpăn nkuăl gôl dak dak lêng bah neh dak, tâm nau ryơk pháp luật bah nơm ndrel tâm nau ryơk pháp luật dak ba dih, ngăn lah UNCLOS 1982, ndrel jêh ƀư jêh nau rgum ri kơl an nkre ân nau ntrŭnh ƀư nau kan, ê lor rgum tâm nau kơl an nau mât rong kan, jêh ri kơl an ân ƀon lan lŏ hăn tât nê gay ma râng nau hun hao văng sa rêh jêng, đăp mpăn nau rêh jŏ jong ndrel ngăn lah ƀư nâp nau rnă njrăng đăp mpăn tâm nkuăl gôl dak Trường Sa aơ”./.

Nŭih rblang: H’Thi