Ta nar pah kan đah Ban Bí thư Trung ương đoàn TNCS Hồ Chí Minh Kruanh Quốc hội Vương Đình Huệ uănh lah prêh nău Trung ương Đoàn săch bôk nău trong kan năm 2023 n’hanh bôk nău Khay druh ndăm hăn ndrel đah “rgâl mrô”. Aơ lah nău kan khlay, jăch ndăn, tâm di trong hăn nsum bah rnôk mhe, ndơ̆ dak he rgum lăp jru hvi tâm nău hun hao nsum bah lam ntŭr neh. Mpeh trong kan Đoàn n’hanh ntrong leo druh ndăm rchong năm tât, Kruanh Quốc hội đă, Trung ương Đoàn TNCS Hồ Chí Minh an mĭn njêng tay, mât uănh jru lơn tay ntoh ngơi ntĭm rđău bah Tổng Bí thư Nguyễn Phú Trọng ta Đại hội Đoàn lam dak rơh tal 12; nan ê̆ rgâl tĭng nău kan na nê̆. Kruanh Quốc hội Vương Đình Huệ đă:

“Đoàn TNCS Hồ Chí Minh an wât jru lơn tay ntŭk gŭ, nău tơm n’hanh nău kan bah nơm, n’hao nău wât lĕ đah nău kan, mô rlu nsrôih, nsrôih tiăr nti n’hao nău nti, nău rêh cách mạng, rdâk hao nău ŭch tâm druh ndăm gay ƀư tĭng nău kan têh, hăn lor tâm nău ndâk njêng n’hanh mât njrăng neh dak. N’hao ntĭm nti an rơh mom đah nău mĭn cách mạng, nău rêh văn hóa, n’hao nuih n’hâm rŏng dak, ntô̆ n’hao rnoi nuĭh, lơn lah mât uĕh nău ŭch, nău rŏng ndâk njêng neh dak ndrŏng uĕh n’hanh gĭt wât na nê̆ nău kan, lĕ đah nău kan bah nơm tâm ndâk njêng n’hanh mât njrăng neh dak”.

Ndrel đah nău hun hao nău cách mạng công nghiệp 4.0, nu nău wăng sa, chính trị, rêh jêng, druh ndăm dôl rgâl dŭt ngăch. Kruanh Quốc hội Vương Đình Huệ đă Mpôl druh ndăm an mĭn ƀư mhe na nao, mô rlu rgâl mhe nkô̆ nău, trong ƀư gay dơi mkra nău ŭch, nău mpŏng bah druh ndăm, sŏk druh ndăm lah ƀư tơm mĭn nkra mhe ăp nău kan, ƀư ăp nău kan yor nău geh tâm di bah druh ndăm. Rmôt kan Đoàn n’hanh druh ndăm lah ăp nuĭh hăn lor bôk năp tâm nău ƀư tĭng nău ntrŭnh ntrôl dăng rgâl mrô ngih dak; hun hao wăng sa mrô tĭng tâm khoa học n’hanh công nghệ, rgâl mhe mĭn ƀư mhe.

Tâm pơh aơ đŏng, Trung ương Đoàn Druh ndăm Cộng sản Hồ Chí Minh n’hanh Tổng Công ty Bưu điện Việt Nam (Vietnam Post) ƀư ký ton kan ndrel lvang 2023-2026 đah ăp nkô̆ nău rgum tâm nău ƀư ntop kơl rgâl mrô an đoàn viên, druh ndăm. Ntoh ngơi ta ký ton, nô Bùi Quang Huy-Bí thư bôk năp Trung ương Đoàn an gĭt, Trung ương Đoàn mĭn lah rmôt druh ndăm lah rmôt n’gâng tơm ntrôl dăng nău ƀư ntop kơl rgâl mrô an đoàn viên, druh ndăm:

“He ký ton nar aơ lah ký ton ta lĕ 3 gưl, gưl Trung ương, gưl n’gor, gưl nkuăl. Nău aơ ƀư ăp nkô̆ nău ký ton đah 2 ding mbra ngăch lăp ngăn ngên jêh ký. Jêh bôk nău kan gâp mpŏng 2 ding mbra mbra tâm rgop ăp nkô̆ nău lĕ ký n’hanh dơi uănh kơp săk rnglăy nkô̆ nău pah kan tĭng rơh, nău nĕ kơl he n’hao săk rnglăy trong kan tâm rgop đah 2 ding”.

Tĭng tâm ton kan ndrel, lvang 2023-2026, 2 ding mbra rgum tâm rgop mbơh ƀư ăp nău ntop kơl rgâl mrô an đoàn viên druh ndăm n’hanh năp ăp nău blău tăch rgâl tĭng tâm mrô, lơn lah druh ndăm thôn ƀon. Wa Nguyễn Hải Thanh Kruanh Hội đồng Thanh viên Tổng Công ty Bưu điện Việt Nam an git:

“Bưu điện Việt Nam hăn ndrel tay đah Đoàn TNCS Hồ Chí Minh tâm ăp nău ƀư đăp mpăn rêh jêng, nău kan nsum mpôl kơt ntop kơl n’hŭch, mô sŏk prăk rdêng ăp ndơ ntop kơl, kơl prăk rdêng an ăp ndơ rdêng njêng nău kan bah druh ndăm thôn ƀon; tâm rgop ƀư ăp bôk nău kan, ndơ ƀư druh ndăm têh tâm ban lam dak, jŭt n’hŭch ach o, đăp mpăn nău rêh jêng nâp nâl... rgop ndâk njêng bôk nău kan rƀŏng tĭng lam dak mpeh ndâk njêng thôn ƀon mhe, ndâk njêng nkual ƀon têh uĕh blău”.

Tâm rnôk ƀư tĭng tâm ton, Vietnam Post tâm rgop đah Trung ương đoàn ntĭm nti an rmôt druh ndăm ta lam dak n’hao  nău wât mpeh rgâl mrô, nkre năp ăp nău blău khlay an tăch rgâl ta ăp trong tĭng tâm mrô kơt: dŏng ăp ndơ marketing mhe, nău blău livestream tăch ndơ, ndâk njêng nkô̆ nău rup ndah ndơ tâm di marketing, mât uănh n’hanh rhŏ an năch rwăt... Vietnam Post mbra ntop kơl đoàn viên druh ndăm ta lam dak pơk ndrơng ndơ ta ntŭk tăch rgâl điện tử Posmast.vn.