VOV4.M’nông – Ôi 8/4, ta Ngih Quốc hội, Mpôl groi nđôi chuyên đề “Nău ƀư tĭng pháp luật mpeh wơt nuĭh ƀon lan n’hanh mkra nău phong, mbơh nău tih bah nar 1/7/2016 tât nar 1/7/2021” yor Groi Kruanh Quốc hội Trần Quang Phương ƀư kruanh rmôt geh nar pah kan đah N’gâng kan Lao động Thương binh n’hanh xã hội. Mpôl groi nđôi đă năl, uănh lah kloh đah ăp nău mô di dơi dơn nău kơl an nuĭh geh soan đah cách mạng; geh trong mkra mbơh nău tih tâm nău aơ gay ƀon lan đăp mpăn. Tâm nău mbơh, N’gâng kan Lao động Thương binh n’hanh xã hội an gĭt, lĕ wơt rlău 14 rbăn 300 nuĭh ƀon lan. Nău ƀư wơt nuĭh ƀon lan dơi ƀư tâm rgop đah nău nchih săk wơt nuĭh ƀon lan n’hanh dŏng phần mềm mât uănh wơt nuĭh ƀon lan, mkra nău phong mbơh nău tih bah N’gâng kan, geh boăt nthoi đah ntŭk dữ liệu ngih dak mpeh phong mbơh nău tih bah Thanh tra Chính phủ. Ăp nuĭh mpôl groi nđôi đă ƀư kloh ăp sam ƀŭt phong tâm nău kan tă bah N’gâng kan Lao động Thương binh n’hanh Xã hội dơn uănh, rgum dŭt âk ta nău kan kơl an nuĭh geh soan đah cách mạng n’hanh bảo hiểm xã hội, geh tât bơi 90%.

Nuĭh rblang: Y Sưng Phê Ja