Kêng măng 29/2, wa Nguyễn Thị Kim Thúy Groi Chủ nhiệm Ủy ban Rêh jêng bah Quốc hội, Kruanh mpôl hăn uănh nđôi bah Ủy ban Rêh jêng lĕ geh nar pah kan đah UBND n’gor Dak Lak lĕ ƀư tĭng nău kơl, pháp luật mpeh tâm ban bu ur bu klô ta n’gor năm 2023; săk rnglăy ƀư tĭng Luật ur sai n’hanh rnăk wâl lvang 2015-2023.

Năm 2023, trong kan tâm ban bu ur bu klô geh tay nău uănh tât bah ăp gưl, nău kan, ƀon lan n’gor Dak Lak n’hanh dơi geh săk rnglăy uĕh. Ăp rnoh an mpeh tâm ban bu ur bu klô geh âk nău rgâl nkôp đah năm 2022, lơn lah ăp rnoh an mpeh ntĭm nti, njrăng n’gang tâm lơh rnăk wâl. UBND n’gor Dak Lak lĕ ntrôl dăng nkoch trêng, ntĭm nti, mbơh rblang nău ntrŭnh bah Đảng, nău kơl, pháp luật bah Ngih dak mpeh ăp nău kơl rnoi nuĭh, Luật ur sai n’hanh rnăk wâl, ăp săk rnglăy bah gŭ ur sŏk sai ơm n’hanh ur sai êp rnoi deh; ndâk njêng nău way ơm mpeh ur sai n’hanh rnăk wâl gay kơt dŏng an ƀon lan; ƀư tĭng uĕh nău ntrŭnh mpeh ur sai, nău dơi bah me bơ̆ đah kon jêh ntlơi ur sai. Wa Nguyễn Thị Kim Thúy, Groi Chủ nhiệm Ủy ban Rêh jêng bah Quốc hội, Kruanh Mpôl hăn uănh nđôi kơp dơn n’hanh uănh lah prêh ăp săk rnglăy ma n’gor Dak Lak dơi geh, nkre, dăn đă n’gor an geh ăp trong mkra na nê̆ lơn gay mbơh ƀư nău kơl, pháp luật mpeh tâm ban bu ur bu klô, Luật ur sai n’hanh rnăk wâl.