Tĭng nău mbơh ta nar pah kan, jêh 5 năm mbơh ƀư, ƀư tĭng, trong kan mât uănh ngih dak mpeh mât uănh, njrăng n’gang hun hao bri dơi ƀư tâm ban, săk rnglăy. Bah năm 2017 tât aƀaơ, ăp ngih pah kan dơi kan lĕ saơ, wơt dơn, ƀư sam ƀŭt rhăch nău rmal rlău 6.500 nău tih pháp luật tâm nău kan bri, tâm nĕ rmal prăk rlău 6.100 nău. Nkôp đah lvang 2012-2016, rnoh nău tih hŭch rlău 44%.

Trong kan tăm bri lĕ geh săk rnglăy âk, jêh 5 năm, lam n’gor tăm geh rlău 12.400ha, tâm nĕ tăm bri sŏk si rlău 10.100 ha hôm ƀa ƀă tăm bri nking n’gang phŭt sial, bri dŏng. Ntoh ngơi ta nar pah kan, wa Trần Tuấn Anh, Kruanh Ban kinh tế trung ương đă, Ban thương vụ n’gor ủy Dak Lak an n’hao nău rđău bah Đảng đah trong kan mât uănh, njrăng n’hanh hun hao bri. Tâm nĕ an uănh mĭn lah tay tât nău tơm, nău kan bah nuĭh djôt bôk tâm ăp nău kan geh tât tih pháp luật mpeh bri. N’gor Dak Lak an ƀư tĭng rjăp nău groi nđôi, uănh lah đah ăp nău nchrăp ƀư nkra rgâl bri hon êng, rgâl nău ŭch dŏng neh bri. Bah meng nĕ, n’gor an geh uănh lah nchroh mbơh nu nău, khay tât gĭt năl ăp nău ntŭl rlong n’hanh nău geh mât uănh, mât njrăng, hun hao bri nâp nâl.