Ôi 7/4, Mpôl pah kan bah Bộ Y tế tă bah Thứ trưởng Bộ Y tế Trần Văn Thuấn ƀư kruanh mpôl hăn hŏ tât khâl n'hanh pah kan đah Nhih dak si nkual Tây Nguyên mpeh pah kan but săm ji n'hanh ndranh rvăt dak si tâm nhih dak si ngih dak. Mbơh đah mpôl hăn pah kan, wa Nguyễn Đại Phong, Giám đốc Nhih dak si nkual Tây Nguyên an gĭt, tâm lvang năm 2019-2022, Nhih dak si hŏ tĭng kơn tĭng ƀư  ăp kôp ăp trong nkra gay ndơ̆ rnoh săk tam but săm ji nar lơn ma uĕh. Ntoh lư lah dŏng công nghệ thông tin, rgâl dơh glêh siƀŭt but, săm ji; Rgâl mhe trong rhŏ dŏng, n'hao nuih n'hâm uĕh lŏng nuĭh kan dak si, ntop kơl ăp nhih dak si bah dâng; N'hao du đêt ndơ ntrŭp dŏng, kỹ thuật mhe nsĭt tay nău tam ngăn ngăn nchroh n'hanh săm ji.

Lah ta rơh pah kan, Thứ trưởng Bộ Y tế Trần Văn Thuấn an lah Nhih dak si nkual Tây Nguyên ân geh tay ăp trong kơl tâm di, njêng ntŭk pah kan tâm rnglăp, kloh rsang n'hanh way tâm rgop kan nsum đah ăp nhih dak si bah lơ gay ntĭm nti bah ngai gay n'hao blău ti kan n'hanh kân jâng rmôt nai dak si. Mpeh  pah kan ƀư ndranh rvăt dak si, ndơ dŏng kan dak si, Thứ trưởng an gĭt, aƀaơ hŏ geh âk trong kơl droh rklaih kŏ kol, nău khlay lah nhih dak si geh tŏng nău dơi ƀư lĕ n'hâm suan đŏng lah mô dơm.