Kêng măng nđaơ (14/7), ta Hà Nội, Ban Thường vụ Đảng ủy Công an Trung ương tâm rgop đah Mpôl uănh nđôi mrô 893 bah Ban Bí thư ƀư rƀŭn nchră mbơh ƀư Nău ntrŭnh, trong nchrăp uănh nđôi đah Ban Thường vụ Đảng ủy Công an Trung ương.

Wa Nguyễn Trọng Nghĩa, Bí thư Trung ương Đảng, Kruanh ban Tuyên giáo trung ương, Kruanh Mpôl uănh nđôi ƀĭt joet rƀŭn nchră. Ntoh ngơi ta Rƀŭn nchră, wa Nguyễn Tọng Nghĩa mĭn lah: Nău uănh nđôi nău kan ƀa ƀơ tĭng trong nchrăp ăp năm bah N’gâng kan chính trị, Ban Bí thư, tă bah gay saơ n’hanh pơk hvi ăp trong ƀư uĕh, ƀư mhe. Nkre, jêh uănh nđôi dơi ntĭm ăp nău hôm e, mô dơi ƀư, nkô̆ nău tih di, mĭn kloh nău kan bah nơm, ntŭk kan. Wa dăn đă, tâm rnôk mbơh ƀư nău kan, Rmôt n’hanh ăp ntŭk kan dơi uănh nđôi ƀư tĭng ăp nău ntrŭnh, đă tâm trong kan uănh uănh nđôi; đăp mpăn nău way rgum ƀon lan ƀư tơm, di, kloh rah wah, dơi ƀư tĭng rjăp, bah dâng bah lơ tâm ban ŭch nău kan nsum.