VOV4.M’nông:   Rmôt tahen N’har bri Kon Tum tâm rgop đah rmôt tahen n’har bri Tây Ninh mhe ƀư wơt kơl, ndơ̆ sĭt dak nơm lôch uĕh oh Y Liên geh rlăm hăn Campuchia đah nău ton nău kan n’gơih prăk khay âk. Ăp nău lĕ geh đah oh Y Liên an saơ dôl geh dŭt âk nău jŭ ndơm nuĭh mom ơm mô wât nău, mô gĭt nău rêh n’hanh mô njrăng.

          Jêh rlău 2 nar dơi tahen n’har bri wơt kơl bah Campuchia ndơ̆ sĭt đah rnăk wâl, nuih n’hâm bah oh Y Liên lĕ đăp mpăn. Wơt mpôl hên tâm jay sat ta thôn Kei Joi, xă n’har bri Đăk Xú, nkuăl Ngọc Hồi, n’gor Kon Tum, ăp nuĭh tâm rnăk wâl, ngăn lah u che, me bơ̆ n’hanh ăp oh bah Y Liên nkoch nău răm bah nơm. Nô A Van, bơ̆ bah Y Liên lah kơt aơ.

“Gâp rhơn, gâp nhim mô gĭt m’hâm nhim tay, luh dak măt. Nhĭm mô luh nhĭm, gơm mô luh gơm. Oh nô n’har bri lah lơi hôm geh rngot tay”.

Nău răm bah Y Liên n’hanh nuĭh rnăk wâl bah oh

Trong leo tât nău oh Y LIên, 16 năm deh, rnoi Xơ đăng jay ta xă n’har bri Đăk Xú, nkuăl Ngọc Hồi, n’gor Kon Tum geh rlăm tăch an Campuchia ntơm geh bah nău ƀư rlâng bah kon se. Bôk năm 2022, Y Liên dŏng kak bah nuĭh bên gay tŏng năm pah kan jêh nĕ tĭng êng nuĭh bên hăn n’gor Bình Dương ƀư phung pah kan.

Tâm nar aơ Liên bên đah du hê bu klô geh tài khoản mạng xã hội Facebook lah Lê Ngọc Nhất. Nhất nsŭk jă Liên hăn Campuchia pah kan “Nău kan n’gơch, prăk khay 20 rkeh/khay” an du công ty Trung Quốc n’hanh ton lah mô dơi ƀư ri Nhất mbra trok prăk gay Liên sĭt Việt Nam

Nar 18/4/2022 Y Liên ndrel 5 nuĭh êng geh 2 hê bu ur, 3 hê bu klô mô gĭt săk, mô tâm bên dơi ndơ̆ hăn Campuchia du hê pah kan du ntŭk êng mô dơi tâm ôp n’hanh Nhất n’gang lĕ ăp trong tâm ôp ƀư Y Liên mô dơi tâm ôp đah nuĭh aơ. Hôm mô lĕ nău klach mpeh ăp nău lĕ rlău, Y Liên an gĭt na nao klach đah nuih n’hâm tâm rnôk pah kan tâm ăp công ty bah nuĭh Trung Quốc ta Campuchia.  

“Tăng bu lah mô dơi kan ri bu mbra djôt tăch, nklăch tâm thùng djôt hăn dak lêng jăng an rbư sa. He knŭng dơi gŭ tâm công ty dơm nău luh lăp ri bu mô an he hăn. Âk ntŭk geh rnôk pah kan măng bah 11 mông măng tât 11 mông nung nar”.

Dơi pah kan ta jay lah nău ŭch ngăn bah Y Liên tâm rnôk gŭ ta Campuchia.

Yor nău kan mô săk rnglăy, bah khay 4 tât khay 7/2022, Y Liên lĕ geh tăch rlău 6 công ty n’hanh ăp rơh geh tăch kơt nĕ rnoh prăk hao bah 1.800 đôlar tât 3.500 đôlar. Aơ lah rnoh prăk ma công ty tal 6 đă Y Liên an trok rnôk geh nău ŭch rlu kan sĭt Việt Nam. Nău krit lơn lah lĕ 6 công ty ma Y Liên kan ta Campuchia ndrel nău ŭch tâm ban da dê, nĕ lah đă pah kan ƀư ăp app gay ƀư bên, rlăm sŏk prăk n’hanh nsŭk nsôr nuĭh tĭng nơm hăn Campuchia:

“He an ôp wơt năch, hăn joi nuĭh đă bu ŭch he. Ŭch ngăn hôm bu djăt tĭng he. He đă khân pơng ndơ̆ prăk ri bu mbra ƀư. Bu djăt tĭng he he đă khân ƀư ƀư n’ăp ma 100 rkeh prăk. Bu mô hôm prăk tay ri he kuăl khân pơng hăn manh. Khân pơng mô dơi manh ri he hăn joi nuĭh êng geh prăk. Nuĭh kơt nuĭh he ŭch prăk ri mbra nsŭk nsôr ŭch đah khân pơng lah hăn đah aơ pah kan prăk khay âk. He joi nuĭh ta Việt Nam hăn Campuchia kan he mbra geh nklăp bah 300 đôlar tât 500 đôlar du hê”.

Lah bu ur rnoi Xơ đăng mhe 16 năm deh, mô bên nău kan, mô dơi ât njê dŏng săk rlăm prăk n’hanh joi nuĭh, nar 17/7/2022, Y Liêm manh điện thoại bah du hê nuĭh Việt pah kan ndrel kuăl ntŭng đă rnăk wâl choay. Tă trong kan ta ntŭk, Pôih tahen n’har bri Đăk Xú dơi gĭt nău mbơh đah nu nău bah Y Liên jêng lĕ mbơh N’gâng kan ntĭm rđău Tahen n’har bri Kon Tum.

Cán bộ Pôih tahen n’har bri Đăk Xú ôp khâl, ntrŭt đă Y Liên n’hanh rnăk wâl.

Đah nău nsrôih wơt choay Y Liên, tă bah ăp trong way kan, Njrăng n’gang ma túy n’hanh nuĭh tih, N’gâng kan ntĭm rđău tahen n’har bri n’gor Kon Tum tâm rgop đah rmôt tahen n’har bri Tây Ninh lĕ dơi ndơ̆ Y Liên sĭt Việt Nam tâm nar 20/8/2022. Tâm rnôk wơt choay Y Liên dôl pah kan tâm du công ty ta trong 702, Bãi Si Hai, n’gor Sihanouk, Campuchia tă bah mpông n’har bri Quốc tế Mộc Bài, n’gor Tây Ninh nklăp 470 km mpeh Việt Nam. Nău mbơh tâm rnôk wơt choay nuĭh, Thiếu tá Bùi Công Huân, cán bộ Đội đặc nhiệm njrăng n’gang ma túy n’hanh nuĭh tih, N’gâng kan ntĭm rđău Pôih Tahen n’har bri Kon Tum, an gĭt:

“Tâm rnôk wơt choay nuĭh sĭt dŭt njê. Tâm ôp đah nuĭh Công ty khân pơng mô an nuĭh dŏng điện thoại n’hanh dŭt jêr năl nuĭh ntŭk gŭ. Tâm rnôk pah kan tah ri nuĭh rmanh way đă pah kan dŭt n’hâm, mông pah kan bah 12 tât 18 mông/nar. Rlău ma ngêt sa, gŭ âm mpôn êng. Rmôt mât njrăng geh phao, geh ndrăk jêng nuĭh rmanh mô dơi luh bah dih, mô dơi gĭt năl trong dŭt jêr an rmôt wơt choay nuĭh”.

Jêh rlău 2 nar dơi wơt choay, plơ̆ sĭt đah rnăk wâl ta thôn Kei Joi, xă n’har bri Đăk Xú, nkuăl Ngọc Hồi, n’gor Kon Tum, Y Liên lĕ mbrơi mbrơi sĭt tay nuih n’hâm. Dơi geh nău ntrŭt nsôr bah ăp kônh tahen n’har bri kơt u che, me bơ̆, oh lĕ nsing nơm nkoch tay lĕ rngôch nar khay geh rlăm tăch n’hanh pah kan tâm 6 công ty bah nuĭh Trung Quốc ta neh Campuchia. Nău Y Liên ŭch nkoch ngăn rnôk ntĭnh ntăn lah uĕh ăp kônh pôih tahen n’har bri n’hanh ŭch lơi geh nuĭh rlăm hăn Campuchia pah kan n’gơch prăk khay âk kơt Y Liên./.

 Nuĭh rlang: Y Sưng Phê Ja