VOV4.M’nông: Ăp n’gor Tây Nguyên geh rlau 2000 nglau n’gâr dak đah rnoh hao tât âk rbăn ha. Nau dŏng ăp nglau n’gâr dak ân rong tui ka ndrel ăp ntil ƀư nau kan geh tât dak nglau dôl geh kol rnôk ƀư dŏng ăp nau dŏng bah Luật Thuỷ lợi năm 2027, Nau ntrŭnh 67 ndrel nau ntrŭnh mrô 96 năm 2018. Âk rbăn ha ma dak geh lơi dơm ndrel mô geh ân manh gay rong tui ka.

Wa Nguyễn Trọng Nhi mât nglau n’gâr dak Vạn Xuân geh rnoh hvi nklăp 5ha tâm Khối 9, nkuăl têh Dak Mil, nkuăl Dak Mil, n’gor Dak Nông tât rnôk aơ, hŏ 20 năm. Păng rêh rnơm tâm nau rong ka ta aơ. Yơn ntơm năm 2018 tât rnôk aơ công ty trong dak tâm Dak Nông mbơh mô dơi kí nau kan ân manh măt dak yor kol ăp nau ntrŭnh bah Luật mât dak, nau ntuh kơl bah Nhi geh kol. Nau mât, dŏng nglau dak ntơm geh nau ntoh luh ăp nau tâm pit, âk nŭih lơh ka yơn păng mô dơi rdâng yor mô tŏng pháp lý. Nau kan têk jong tât 4 năm, wa Nhi đă Ngih dak ơm geh nau kan rklaih ân ăp nau kol gay ma păng dơi geh đăp mpăn ntuh kơl:

‘Đă tă bah jŏ hôm, yơn kol Luật. Kí ân hên nau kan, gâp mơ janh ntuh kơl, yơn rnôk aơ ngăn lah kâp rnơm tâm nglau n’gâr dak, mât nglau n’gâr dak yơn mô janh ntuh kơl. Mô janh kí ton nau kan geh jêng nau tâm rlăch, ngăn lah kloh mpeh pháp lý ro gâp mơ dĭng janh ntuh kơl”.

Wa Bùi Phong Danh, Groi Giám đốc ntŭk ƀư nau kan tâm nkuăl Dak Mil, công ty TNHH du ntŭk kan dŏng trong hoch dak n’gor Dak Nông, mbơh, lam nkuăl geh 43 nglau n’gâr dak đah rnoh nklăp 22 rkeh m3, măt dak rlau 300 ha. Ăp nglau n’gâr dak kŏ mô dơi geh kí nau kan ân manh măt dak đah nŭih ƀon lan yor kol bah Luật dak lêng 2017 ndrel nau ntrŭnh mrô 67 năm 2018. Tĭng wa Danh, nau kol ta aơ lah nau ntrŭnh mpeh nau dŏng neh tâm nau ntrŭnh pă săm ƀŭt geh nau dơi uănh ƀư nau kan tăch rgâl. Tâm rnôk ăp nglau n’gâr dak rnôk aơ kŏ ê geh nau dơi dŏng neh ân Công ty tơm ngăn:

‘Năm 2017 n’gor geh du rnoh ntrŭnh ân manh măt dak lah 250 rbăn/m2/năm. Nkuăl ri kŏ geh âk nŭih ŭch manh, yơn kol lah jêh Luật Thuỷ lợi, nau ntrŭnh mrô 67, nchâp ân nau mât rong tui ka dơi geh pă săm ƀŭt kơp dơn. Ma ŭch pă dơi nau kan ri ân geh săm ƀŭt neh, yơn nau kan ân geh n’gor ê jao ân công ty ri ma công ty mô geh nau dơi”.

Wa Lê Viết Thuận, Kruanh Công ty TNHH du ntŭk kan dŏk sŏng trong dak n’gor Dak Nông mbơh, dĭng lĕ 250 trong hoch dak tâm lam n’gor kŏ ê geh mbơh nau dơi dŏng neh. Nau mpŭng mpeh măt dak tâm aơ têh ngăn yơn công ty mô dơi ƀư êng, yor manh lah tih nau ntrŭnh. Ăp nau kol, nau mpŭng aơ mra têk jong yor nau pă nau dơi dŏng neh ân ăp ntŭk dak hoch, nglau dak du gưl lah nau jêr, du gưl lah nau mô tŏng tơm prăk. Lôch 2018 tât rnôk aơ, công ty mơ knŭng lơi tơm prăk gay ma ƀư nau veh, pâng n’gâng ân đăp mpăn ân nklăp 10 ntŭk kan gay ma nchrăp nau pă nau dơi dŏng neh, geh rnoh ê tât 5%:

‘Gay ma ƀư du ntŭk kan geh nau dơi jao neh, ntăm n’gâng ri ân geh ntơm tă bah bôk nau kan, tât nau ƀư, dăn tơm prăk yơn mô di lah geh pă lah dơi nkre ôh. Tâm rnôk ntrong mbơh ơm bah kăl e trok tâm ntrơn leo mô geh tâm ban ueh kơt rnôk aơ. Kăl e ngăn lah geh ntŭk tât rƀŭn ƀon lan ri ngăn lah nŭih bu ân neh, geh âk rnăk ê geh rgâl rnoh neh. Nau aơ ri mô geh ntrŭt nau tih ân ma bu ôh yor tă bah kăl tât rnôk aơ geh hôm kol”.

Wa Nguyễn Công Hạnh, Groi Giám đốc Công ty TNHH du ntŭk kan nau kan trong hoch dak n’gor Dak Lak mbơh, UBND n’gor ndơn nau ntrŭnh gay ma công ty nsrŭng ƀư geh nau kan ân manh rnôk ê geh pă dơi nau kan dơi dŏnh neh. Yơn tĭng nau ntrŭnh 96 năm 2018 ntrŭnh ngăn mpeh rnoh ntil ndơ, nau kan trong hoch dak ndrel kơl an prăk geh dŏng ndơ, nau kan kơl an mpeh trong dak hoch ri ân geh nchrăp ăp nau kan geh tât nau ân manh. UBND n’gor Dak Lak hŏ ndơ̆ 2 năm aơ yơn lah ê geh ăp nau ntrŭnh geh nchră luh. Ăp nau kan ân manh neh tâm 246 nglau n’gâr dak đah nklăp 2000 ha công ty mât hôm ê dơi geh ƀư, nau khuch đah tơm prăk ndrel ma nau rong tui ka mra hao tât ma rhiăng mren du năm:

‘Công ty hŏ ndâk nau kan mpeh tât rnoh njoăl UBND n’gor ndrel UBND n’gor geh nau ntrŭnh ndơ̆ ân N’gâng kan tuch tăm ndrel hun hao ƀon lan, N’gâng kan tơm prăk yơn lah tât rnôk aơ ê geh ân dŏng ƀư. Nê lah nau jêr ngăn gay ma ƀư nau jêr ngăn gay ma ƀư, yor rnôk mô geh nau kan tât rnoh ri mô dơi geh nau ntrŭnh ƀư kan ôh. Ri kơt nê lah nau khuch mpeh măt văng sa. Tal 2, rnôk ma mô geh dơi pă nau dơi ri ân geh nau ma ƀon lan mra geh nau tâm pit, lơh jêng nau roh đăp mpăn”.

Gay doh rklaih ăp nau kol bah nkuăl, pơk trong nơih ân nau kan sŏk dŏng, ƀư ueh nau săk tam bah măt dak ân nau kan rong tui ka lah êng, ăp ntil ndơ, nau kan mât trong dak êng lah nsum, ân geh nau lăp kan bah ăp n’gâng kan, ntŭk kan Trung ương./.

Nŭih rblang: H’Thi