VOV4.M’nông:   Krêp dêh đah nău kan ntĭm ta ngih sam ƀŭt ta nkuăl nkual jru ngai Krông Bông, n’gor Dak Lak, nai Nguyễn Viết Lân an âk mông nar gŭ mĭn njêng, joi gĭt đah nău rêh n’hanh nău kan bah kruanh Hồ Chí Minh. Đah nô, mĭn joi gĭt mpeh Wa mô knŭng gay ƀư an gĭt wât bah săk nơm ma hôm gay tiăr nti êng, nsrôih nti n’hanh ƀư tĭng Wa tâm ăp nău jêt ăp nar.

Jêh âk mông nar ntĭm ta jrô nti, nai Nguyễn Viết Lân, nai môn Tin học, Ngih sam ƀŭt THPT Krông Bông, nkuăl Krông Bông, n’gor Dak Lak an âk mông nar ta thư viện ngih sam ƀŭt mô lah lăp mạng mĭn joi gĭt đah Wa Hồ. Nô Lân nkoch, bôl ntĭm Tin hocj yơn nô dŭt ŭch mĭn joi gĭt mpeh lichj sử. Bah rnôk hôm e jêt, ăp nău nkoch mpeh Wa Hồ dơi me bơ̆, nai nkoch tay lĕ an nô ăp nău rngot êng. Ăp nău nkoch mpeh ntĭm nti bah Wa lĕ lăp tâm nô nău rŏng ntĭm nti n’hanh nkual neh căn cứ cách mạng Krông Bông jêng ƀon tơm tal 2 ma nô krêp dêh pah kan bơi 10 năm bah năp.

“Gâp way mĭn gĭt mpeh lịch sử mpeh Wa, ăp lịch sử ma geh tât Wa ri gâp ŭch da dê n’hanh mĭn joi gĭt. Ăp nkô̆ nău mhe gay ndơ̆ tâm ăp nkô̆ nău ntĭm gâp an uĕh n’hanh ƀư an kon hŏk đêt dil. Mpeh nău ƀư Đoàn ri tâm rnôk gâp ƀư gâp m’hâm ƀư ndơ̆ ăp nkô̆ nău ngăn, ƀư an kon hŏk ŭch, bah nĕ wăch ăp kon hŏk, bah ăp oh klach râng ăp rơh tâm rlong nsum, ăp rmôt nsum, bah nĕ an kon hŏk tâm êp dăch uĕh lơn”.

Nai Nguyễn Viết Lân (ta n’gul) sŏk ndơ rnê rhơn Druh ndăm gĭt blău ƀư tĭng nău Wa năm 2022

Tốt nghiệp Đại học Sư phạm Huế, năm 2014, nai Lân dơi săch dŏng sĭt ntĭm ta nkuăl Krông Bông. Yô̆ kon hŏk nkual jru ngai hôm e âk môt tŏng, jêr jŏt, nô djôt nău ŭch, nău gĭt gay ntĭm kon hŏk. Nô lăp mạng mĭn joi sam ƀŭt gay nău ntĭm uĕh tay, wăch rgum. Ăp mông nti, nô nsrôih tâm ôp đah kon hŏk, nta an ăp oh uĕh nuih n’hâm, dơi nti êng, mĭn ƀư mhe n’hanh kơl ăp oh joi saơ nău răm, nău ŭch ăp nău nti. Kon hŏk hŏk Hoàng Thị Kim Ngân, jrô 11A7, ngih sam ƀŭt THPT Krông Bông nkoch:

“Oh saơ nai Lân lah du hê dŭt gơih tâm nău ntĭm nti, lĕ nuih n’hâm, boăt nthoi đah ăp băl kon hŏk gay ntĭm an ăp băl kon hŏk. Nai lĕ nsrôih ntĭm dŭt n’hâm gay an mpôl oh dơi wât. Nai djăt mro ăp nău rgôp bah kon hŏk tay. N’hanh oh jêh rnôk ma oh djăt nău nti bah nai Lân n’hanh djăt nai Lân ntĭm ri oh geh tay dŭt âk nău gĭt mhe an săk nơm n’hanh nsrôih lôch uĕh an săk nơm lơn”.

Mô knŭng lah nai dŭt n’hâm, nai mom Nguyễn Viết Lân hôm lah cán bộ đoàn ngăch prăl. Nô aƀaơ lah Bí thư chi đoàn nai, Ủy viên Ban chấp hành Đoàn ngih sam ƀŭt n’hanh Kruanh Hội liên hiệp druh ndăm ngih sam ƀŭt THPT Krông Bông.

Nai Lân ndrel Chi đoàn khâl n’hanh an ndơ Mê̆ Việt Nam anh hùng

Wa Dương Kim Thạch, Hiệu trưởng Ngih sam ƀŭt THPT Krông Bông an gĭt, bôl hôm e mom, nău rêh wăng sa jêr jŏt n’hanh dôl an gŭ jay nsum, kon jêt, ur pah kan ngai jay yơn nai Lân hôm e dăp nău kan êng nơm gay jêh lôch uĕh ăp nău kan nsum. Nai geh âk nău blău ơm tâm ntĭm nti, ntop kơl ăp nai êng mpeh công nghệ thông tin, ngăn lah tâm rnôk ngih sam ƀŭt an ntĭm n’hanh nti trực tuyến gay njrăng n’gang chôt srê Covid-19. Wa Dương Kim Thạch an gĭt:

“Nai Lân lah nai mom ngăch prăl, mĭn ƀư mhe n’hanh dŭt n’hâm tâm ăp nău ƀư, ntrong leo mpeh mpôl druh ndăm, dŭt lĕ đah nău kan. Nai hăn rgŏ jă ăp nuĭh lŏng bôk tôr, ăp băl kon hŏk ăp jrô, jêh nĕ băl mpôl, nuĭh kan ndrel gay ntop kơl ndơ sông sa, prăk gay ƀư ăp rơh hăn ƀon kơl ăp mon đah ao răm yan puh. Ndơn măt Đoàn ngih sam ƀŭt kơt lah Hội hăn khâl, an ndơ an mê̆ Việt Nam anh hùng. Lơn lah kơt năm mhe rlău nai an âk mông nar an bôk nău kan tâm rlong mĭn joi gĭt mpeh nău mĭn nău rêh Hồ Chí Minh, geh giải 2 lam dak”.

Nai Nguyến Việt Lân ƀư rgop bôk nău kan kơl nuĭh ta ngih sam ƀŭt

Ŭch mĭn joi mpeh nău rêh n’hanh nău kan bah kruanh Hồ Chí Minh, nai mom Nguyễn Viết Lân lĕ rgum êng an nơm ăp sam ƀŭt khlay mpeh wa. Knơm nĕ lĕ kơl nô dơi geh âk nău uĕh kơt Giải nhất Hội tâm rlong mĭn joi 110 năm Wa Hồ hăn joi trong kơl neh dak N’gor đoàn Dak Lak ƀư năm 2021; 2 năm mro geh giải têh ta rơh tâm rlong “Druh ndăm nti n’hanh ƀư tĭng nău mĭn, nău rêh, pah kan Hồ Chí Minh” bah N’gâng kan ntĭm nti tâm năm 2020-2021. Nô lah ngoăy tâm 45 druh ndăm dơi rnê rhơn đah nuĭh Druh ndăm gĭt blău ƀư tĭng nău Wa n’gor Dak Lak năm 2022. Nô Lân nkoch, tă bah râng ăp rơh tâm rlong, kơl nô geh dơi gĭt tay đah Wa, bah nĕ n’hao lơn nău kan bah săk nơm, nsrôih nti kơt Wa bah ăp nău jêt ăp nar./.

                              Nuĭh rblang: Y Sưng Phê Ja