Rơh thi tốt nghiệp THPT 2023 hŏ tât dăch, rnôk dja, ăp nhih nti THPT ta Gia Lai dôl n’hao dăng mbơh nti, nkoch trêng ntop kơl kon se nti gay rƀah gĭt nău  way tâm rơh thi khlay bơi tât. Nai ntĭm n’hanh kon se nti ta ăp nhih nti dôl n’hao ngăch ôn luyện, rdâk nkah tay nău tă nti gĭt gay kơl ăp kon se tĭng kơn lăp tâm rơh thi đah nuih n’hâm nâp dăng, geh nău dơi têh.

Rơh thi tốt nghiệp THPT năm 2023 bôk năp mât đăp mpăn kơt năm 2022, yơn lah nău way thi geh du đêt ntŭk mhe ăp nuĭh râng thi ân gĭt na nê̆. Nai ntĭm Lê Thị Minh Huế, chủ nhiệm jrô 12A5, Nhih nti THPT Mạc Đĩnh Chi, nkuâl Chư Păh, an gĭt:

        “Gay kơl ăp kon se nti gĭt kloh lơn mpeh ăp ntŭk mhe tâm nău way thi tốt nghiệp năm aơ ri nai chủ nhiệm ma âk trong ƀư, bôk năp lah tâm mông sinh hoạt 15 mnĭt bôk mông nti, mông sinh hoạt chủ nhiệm bôk pơh hôm ma ăp trong ƀư kơt rmôt Zalo gay mbơh tât ăp kon se gĭt ăp ntŭk mhe tâm rơh thi dja gay ăp kon se tĭng ƀư di nău way”

        Oh Nguyễn Thị Anh Thơ – jrô 12A7, Nhih nti THPT Mạc Đĩnh Chi, nkuâl Chư Păh mpơl nău.

        “Tĭng gâp joi n’hanh dơi gĭt ăp ndơ dŏng dơi ndjôt lăp tâm jrô thi nê lah mâng nchih, bút chì, mâng treh,, máy tính ndjôt ti mông geh nău dơi nchih siƀŭt, mô dơi ndjôt lăp tâm jrô thi ăp ndơ dŏng rhôp nău, rhôp rup, lơn lah điện thoại ndjôt ti”.

        Ndrel đah nău mbơh gĭt gay kon se nti rƀah gĭt nău way thi, ăp nhih nti ta Gia Lai dôl rgum ôn thi tốt nghiệp. Ăp rmôt rnâng kan rdâk njêng nkô̆, bôk nău kan, tâm pă ntil kon se nti gay geh trong ôn tập tâm di. Nai ntĭm Đỗ Văn Hiếu, nai ntĭm nhih nti THPT Đinh Tiên Hoàng, nkuâl Krông Pa an gĭt:

        “Mpeh môn văn, mpôl hên tâm pă mbor kon se nti, học lực giỏi, khá, yếu, lơn lah kon se nti học lực yếu kém, geh nău rêh jêr jŏt ri mpôl hên uănh khlay âk lơn, kơi ntop ntĭm nti âk lơn gay ăp kon se trok tay ntŭk blŏng, gay ăp kon se geh nău nsing nơm tâm rơh thi bơi tât”.

        Nai ntĭm Trịnh Văn Bình, Groi Hiệu trưởng nhih nti THPT Đinh Tiên Hoàng mbơh, nhih nti hŏ ƀư ôn tập an kon se nti nkah tay nău tă gĭt hŏ nti, ntĭm leo ƀư ăp ntil đề thi, gay ăp kon se nsing nơm lăp tâm rơh thi:

        Kêng dŭt khay 5 ri nhih nti mbra ƀư rơh rlong thi tốt nghiệp THPT ta nhih nti, nhih nti mbra đăm gĭt nău way thi an ăp kon se lor rnôk lăp tâm rơh rlong thi tốt nghiệp THPT. Nsrôih bôk năm aơ mbra geh dơi 98,5%. Pah kan ôn tập dơi nhih nti tâm pă ƀư tĭng nău ŭch rŏng bah ăp kon se”.

        Rơh  thi THPT gưl neh dak năm aơ, lam n’gor Gia Lai geh rlău 15.200 nuĭh đăng ký râng thi; tâm nê geh bơi 14.300 nuĭh nti giáo dục phổ thông, 483 nuĭh nti giáo dục thường xuyên, hôm ƀa ƀă lah ăp nuĭh râng thi dah rŏng êng bah dih. Tâm lĕ rngôch  rnoh nuĭh đăng ký râng thi geh rlău 14.000 nuĭh đăng ký sơch lăp nti đại học, cao đẳng. N’gor Gia Lai hŏ geh trong nchrăp đah 41 ntŭk thi tơm.

Tâm bah ri aơ, Bộ Giáo dục n’hanh Đào tạo hŏ n’gluh an dŏng si ƀŭt ntĭm nti ăp Sở Giáo dục n’hanh Đào tạo, Cục Nhih nti - Bộ Quốc phòng mpeh ƀư rơh thi tốt nghiệp trung học phổ thông năm 2023, tâm nê nkoch na  nê̆ mông nar bah rơh thi dja.

        Tĭng nê, rơh thi tốt nghiệp THPT năm 2023 dơi ƀư tâm ăp nar 27, 28, 29 n’hanh 30/6/2023, tâm nê, nuĭh râng thi mbra ƀư siƀŭt lăp thi tâm kêng măng 27/6, ƀư bài thi tâm bar nar 28 n’hanh 29/6 n’hanh 30/6 lah nar thi rnă lor. Mông nar thi tĭng môn dơi dăp rgum na nê̆ kơt bah kơi aơ: Nar 28/3, bah ôi thi môn Ngữ văn, kêng măng thi môn Toán; nar 29/3, bah ôi mbra thi 2 bài lah Khoa học tự nhiên n’hanh Khoa học xã hội; kêng măng thi môn Ngoại ngữ.

        Mpeh trong nchrăp, ƀư rơh thi tốt nghiệp trung học phổ thông 2023, Bộ Giáo dục n’hanh Đào tạo đă ăp Sở Giáo dục n’hanh Đào tạo rđău đă ăp nhih nti phổ thông ôp ŭanh tay ăp tŏng lam lĕ rngôch, pơk ŭanh gĭt nău  lư bah ăp kon se nti dôl nti jrô 12 nsing ta ntŭk rgum prăp nău lư n’gâng kan, lĕ ma nău lư êng săk kon se nti n’hanh nău gĭt lôch jêh nău dơi bah kon se  nti.

        Tĭng nău lư bah Bộ Giáo dục n’hanh Đào tạo, tât 8 mông nar 18/7, ăp Sở Giáo dục n’hanh Đào tạo, ăp đơn vị đăng ký râng thi mbra mbơh lôch jêh geh thi tốt nghiệp THPT 2023 n’hanh ăp nhih nti phổ thông ân ƀư lôch jêh kơp dơn tốt nghiệp dŭt mbrơi tâm nar 20/7. Dŭt mbrơi nar 24/7, nuĭh râng thi dơi pă an siƀŭt kơp dơn tốt nghiệp lor, học bạ n’hanh ăp ntil siƀŭt kơp dơn geh tât êng ƀa ƀă./.