VOV4.M’nông: Xã Quảng Khê lah nkuăl Dak Glong, n’gor Dak Nông, ngoai tâm ăp nkuăl ach o ngăn bah lam dak. Đah âk ngăn lah nŭih rnoi mpôl đê̆, nau rêh ƀon lan hôm âk nau jêr, yơn kônh wa hŏ nsum nuih n’hâm ndrel ma n’gâng kan ƀư ân dơi bôk nau kan ndâk njêng ƀon lan mhe.

Ngih jê̆ bah rnăk wa L’Prum, ƀon Phi Mur, xã Quảng Khê tăng geh âk bâr gơm, bâr ngơi. Nar aơ oh kon păng ndrel ngih vâl ƀon lan ndrel tât rhơn năm mhe. Wa nkoch, yan mhe rlau păng geh 3 tấn cà phê, tăch geh rlau 120 rkeh prăk. Oh kon hŏ têh ndrel ma geh ur sai da dê, ri ma prăk aơ knŭng tŏng ân bar hê ur sai păng rvăt ndơ ndrel ma ntuh kơl ƀư lŏ mir. Wa L’Prum mbơh, ăp kônh wa ƀon lan kŏ geh nau rêh ueh lơn rnơm nau ndâk njêng ƀon lan mhe:

“Ntơm rnôk geh trong mhe nkra jêh, geh ngih vâl đăp mpăn ri gâp saơ kônh wa ƀon lan nơm pah kan jan sa geh jêng lơn, nơih lơn kăl e, oh kon geh hăn nti kŏ ueh nơih, hăn ro tâm ƀon tât khâl kŏ ueh rlau ma ntơm. Ndâk njêng ƀon lan mhe, kônh wa phung hên pă neh ƀư trong, ƀư ăp nau kan tâm ƀon lan”.

Wa K’Krang, bu ranh ƀon Phi Mur mbơh: rnôk aơ kơt lah ăp rnăk kŏ geh ngih vâl ndâk ueh nâp da dê. Nê lah rnơm nau nsôih tâm ban nuih n’hâm tâm rnglăp tâm kơl gay hun hao văng sa. Ntoh ngăn tâm nau ndâk njêng ƀon lan mhe, rnôk ngih dak ân ndâk ngih vâl gung trong, lah kônh wa pă neh, rgop n’hâm ndrel ƀư. Kơt rnăk hên hŏ pă 60m măt trong bah năp ngih, ndrel rlau 100m rlet mir đŏng, gay ma pơk trong ân ƀon lan hăn tât mir, lŏ. Bu ranh K’Krang, ngơi:

‘Kônh wa bon lan Bi Mur rnoi Yoăn kŏ kơt lah kônh wa rnoi mpôl đê̆ tâm ntŭk tâm rnglăp du nuih n’hâm, ndrel rgop nau nkra trong hăn, ri ma trong mhe kloh ueh ngăn, hăn tât ăp xã, tât mir nơih ueh gay ma hăn ro rdeng ndoh ndoe, rdeng bum mbo...Rnoi Yoăn ndrel kônh wa ta ntŭk ri rêh nsum tâm rnglăp ngăn, mô geh nau tâm pit ôh, mô geh tâm jin tâm lah, ndrel ndâk njêng ƀon lan ân hun hao”.

Tâm nkuăl Dak Glong, ngoai tâm ăp xã ach o ngăn bah lam dak, geh nau kơl an Bôk nau kan 30A, xã Quảng khê geh âk ngăn lah rnoi mpôl đĕ. Wa Nguyễn Tiến Duẩn, Kruanh UBND xã Quảng khê, mbơh, ăp năm rlau aơ, nau kan ntih kơl bah ngih dak hŏ ndơn geh nau kơl an âk ngăn bah ƀon lan. Nau ntrŭnh bah Đảng tâm ban nuih n’hâm ƀon lan hŏ kơl an Quảng khê ƀư jêh 19 nkô̆ nau ndâk njêng ƀon lan mhe. Tât rnôk aơ lĕ 9 ƀon ndrel 3 thôn bah xã kŏ geh trong hăn, ngih vâl dŏng kan ueh. Ntơm bah xã jêr ngăn, geh rlau n’gul rnoh rnăk ach o, rnôk aơ Quảng khê hôm ê tât 7% rnăk ach o ndrel 8 rnăk êp ach o.

Wa Nguyễn Tiến Duẩn, mbơh: Dŭt năm 2020, xã Quảng Khê hŏ ƀư jêh 19/19 nkô̆ nau ndâk njêng ƀon lan mhe, đah âk nau dơi ntoh lư, tâm nê nau geh du hê bôk nŭih mhe nơh geh rlau 42 rkeh. Khay 7 mhe rlau, xã Quảng Khê ndơn bằng kơp dơn tŏng dơi ƀon lan mhe bôk năp bah nkuăl Dak Glong. Gay ƀon lan nar lơn ma rgâl mhe, đoàn druh ndăm bah nkuăl hŏ mât ueh ăp nau kan nar prao kơl an, nar pơh ndrih, ndrel ƀon lan răk kloh ntŭk ntu, tăm âk tơm si ndrih tâm trong hăn. Êp nau kơl an ntuh kơl bah Ngih dak, ăp chi bôk, rnâng kan mât njăng bah thôn ƀon ndrle nŭih geh bu rnơm tâm ƀon lan hŏ nsum n’hâm bonh đă kônh wa tâm rlong pah kan jan sa, mât ân ueh nau ndâk njêng ƀon lan nar lơn sâm geh:

‘Mpeh bôk nau kan ndâk njêng ƀon lan mhe ri geh kônh wa ƀon lan kơl an âk ngăn, ri ma tât năm 2021 xã Quảng khê hŏ geh nau dơi kơp dơn xã ƀon lan mhe. Nau ntrŭnh bah Đảng uỷ kŏ kơt lah nau ntrŭnh bah HĐND xã ri lŏ ƀư ăp nau kan gay ma ntuh kơl ân ngih vâl gung trong kŏ kơt lah bonh đă nuih n’hâm, drăp ndơ bah nŭih ƀon lan ndrel nsum n’hâm, nsum nuih n’hâm gay ma ndâk njêng ƀon lan mhe ntil mhe tâm rơh ba kơi”.

Du năm mhe lŏ tât nchrăp ton leo âk tay lơn nau rgâl tâm nkuăl neh jru ngai Quảng Khê, Dak Glong, n’gor Dak Nông./.

Nŭih rblang: H’Thi