VOV4.M’nông: Tâm n’gor Dak Lak, lăp tâm năm nti mhe aơ hôm geh âk jêt nŭih kon se nti, sinh viên bah dak Lào tât hăn nti. Năm nti aơ, geh bơi tât 60 sinh viên, kon se nti tâm dak Lào nti tâm ăp ngih săm ƀŭt tâm n’gor Dak Lak. Đah nau kơl an bah n’gâng kan ndrel ăp rmôt kan, ngih săm ƀŭt, ăp kon se dôl ma nsôih ntĭm nti gay njêng nau ŭch bah nơm jêng nau ngăn.

            Sinh viên Thidphaphone Duangphachanh (25 năm, tâm n’gor Attapeu, dak Lào) dôl ntui khoa Y, Ngih săm ƀŭt Đại học Tây Nguyên (Nkuăl ƀon têh Buôn Ma Thuột, n’gor Dak Lak) mbơh: Ntơm năm 2017, păng nti ngành Y Đa khoa tĭng trong geh kơl dĭng lĕ. Bơi tât 6 năm gŭ nti ta aơ, rlet âk nau jêr, nau mô gĭt mpeh nau vay ơm, nau ngơi, đah nau kơl an bah ngih săm ƀŭt, nai nti ndrel băl nti, Thidphaphone hŏ geh nau ŭch đah ntŭk gŭ nti mhe, geh nau dơi prêh tâm nau ntĭm nti, dôl ma dơi ngăn nau ŭch ƀư nai dak si:

            ‘Săch nau nti Y lah yor gâp ŭch, yor nti y lah gay ma gĭt, gay ma mât chăm nŭih ji ndrel săm nau ji. Ngăn ngên nti y lah nau jêr yơn lah nau ngơi ri jêr đŏng, ndrel ma jêr đŏng, ŭch nơm mpeh nau blau lơn, yor nti âk nau ngăn. Gâp ŭch mra sĭt dak Lào gay ma pah kan, kơl an ân nŭih ƀon lan”.

            Hôm oh Chansida Inthakhong (18 năm, tâm n’gor Sêkông, dak Lào) dôl nti tâm ngih săm ƀŭt Phổ thông Dân tộc Nội trú Tây Nguyên (N’gâng kan neh dak) tâm nkuăl ƀon têh Buôn Ma Thuột, ngơi: Bơi tât 4 năm tâm Dak Lak, păng hŏ mơng đah nau rêh bah ngih săm ƀŭt tĭng nau dơi bah tahen:

            ‘Rêh tâm ngih săm ƀŭt tĭng nau kan bah tahen, mpeh mông ƀư nau kan nau nti ri jêr đŏng, Bah năp nơh jêr yơn lah geh ngih săm ƀŭt kơl an, mpeh nau ntĭm nti, ngêt sa, chuh vắc xin rnôk geh srê Covid-19 lơh, ueh ngăn. Đah gâp lah du hê nŭih gŭ ngai ma ngih hăn nti ta Việt Nam, ngih săm ƀŭt nê gâp saơ kơt lah ngih nơm, kơl an nơm, ăp băl nti kŏ tâm dăch, vay tâm kơl an nơm âk nau kan”.

            Ƀư tĭng nau kan tâm rnglăp ndrel tâm rgop ƀư nau kan đah n’gỏ Dak Lak ndrel ăp n’gor mpeh ba dâng bah Lào, ntơm năm 2018 tât rnôk aơ, hŏ geh ma rhiăng kon se nti, sinh viên Lào hăn nti tâm ngih săm ƀŭt Đại học Tây Nguyên ndrel Ngih săm ƀŭt Phổ thông Dân tộc Nội trú Tây Nguyên tĭng nau geh kơl an prăk tă bah ăp tơm êng êng. Tâm rnôk hăn nti, ăp kon se nti bah Lào geh pơk trong nơih kơt: gŭ tâm ký túc xá mô roh prăk, pă prăk ăp khay, râng vơt tết vay ơm Bupimay bah Lào tâm Buôn Đôn, tâm n’ur mâp măt ăp rơh kon se tă nti bah Lào ta Dak Lak.

            Wa Nguyễn Ngọc Phan, Hiệu trưởng ngih săm ƀŭt Phổ thông Dân tộc Nội trú mbơh, năm nti aơ ngih săm ƀŭt geh 45 kon se nti bah Lào dôl nti. Ndrel đah tơm prăk yor Ngih dak, ngih săm ƀŭt kŏ nsôih rgum dăn ăp ntrong rgop kơl gay ma n’hao lơn tay nau nâp blau bah nau kan ntĭm nti ân kon se:

            ‘Dĭng lĕ tơm prăk ntĭm nti bah ăp oh lah yor ngih săm ƀŭt, đah nau tơm bah ngih săm ƀŭt, bah cán bộ, nai ntĭm nti gay ma nsum ty ndâk njêng tơm nŭih ƀư dơi ân nau hun hao nau ntĭm nti tâm nkuăl pe dak hun hao kŏ kơt lah nau tâm boh đah bar dak. Tâm rơh tât ri phung hên mra nsôih ndrel ma n’gor Sêkông kŏ kơt lah ăp n’gor mpeh ba dâng dak Lào pơk trong nơih, hun hao tâm nau kan ntĭm nti nar lơn ma ueh lơn”.

            Tĭng wa Lê Văn Nghĩa, Kruanh rmôt tâm boh Việt Nam-Lào n’gor Dak Lak, ƀư tĭng nau tâm boh ueh lăng, tâm dăch tâm dơh đah 2 dak Việt Nam-Lào, Dak Lak uănh năl ngoai tâm ăp nau kan tơm lah ƀư ueh nau kan ntĭm ntiăp kon se nti, sinh viên Lào hăn ntĭm nti tâm n’gor. Tỉnh hội Dak Lak hŏ tâm rgop kơl, mêt uănh nau ntĭm nti, pơk trong nơih ueh ngăn ân ueh ân bơi tât 60 kon se nti bah Lào dôl ntĭm nti tâm ăp ngih săm ƀŭt tâm n’gor Dak Lak. Ƀư tĭng ăp nau tă dơi geh, 2 N’gor Hội mra lŏ ƀư ân ueh nau nchrăp kan nsum, ndâk ăp nau kan ƀư ân n’hêl lơn tay đah 2 ding. Mât ân nâp nau tâm mbơh nkoch, tâm mâp ndrel tâm rgop ngăn gay ma ntrŭnh ƀư ân ueh nau kan ntĭm nti, tâm nchră nau tâm rgâl kon se hăn nti:

            ‘Phung hên kơl an, pơk trong nơih ntơm kon nŭih, ntŭk ntu ƀư kan, pơk trong nơih ueh ngăn gay ma mât chăm, ntĭm nti, mbơh ntĭm ăp mon Lào tâm n’gor. Phung hên hŏ dăn nau kơl an bah Rnâng kan n’gor uỷ, rđau kan ndrel rđau nau kan tâm rnglăp njêng đah ƀon lan n’gor Dak Lak ndrel ăp mon kon se hôm ƀư tâm nau kan nê ăp mom mra geh du ngih rgum nsum ueh lăng tâm n’gor Dak Lak gay ma mât nau ueh ơm ndrel pơk trong ân ăp mom đăp mpăn hăn nti. Phung hên mra rgŏ jă nau rgop kơl an prăk gay ma kơl an ƀư ueh nau nchrăp tâm rgop tâm nau kan bah 2 n’gor Dak Lak ndrel Sêkông. Bar n’gor aơ mra lŏ tâm rgop uănh, mêt n’ôi ân săk tam ngăn nau mât chăm, ntĭm nti bah ngih săm ƀŭt Phổ thông Dân tộc Nội trú Tây Nguyên (N’gâng kan neh dak) ndrel Ngih săm ƀŭt Đại học Tây Nguyên đah ăp kon se nti, sinh viên bah dak Lào dôl ntĭm nti tâm 2 ngih săm ƀŭt aơ”.

            Năm nti mhe 2022-2023 ntơm lăp. Ndrel ma kon se nti bah Việt Nam, ăp kon se nti bah Lào dôl tĭng nti tâm Dak Lak lŏ hăn ndrel gay ma ntơm lăp nti tĭng nau ŭch, nau nsôih ntĭm nti gay ma sĭt ƀon nơm ndâk njêng ƀon lan nơm nar lơn ma ueh lăng lơn./.

                                    Nŭih rblang: H’Thi