N’gâng kan ntĭm nti uănh năl bôk năm nti 2024-2025 lah Kỷ cương dơn kan, rgâl mhe mô rlu, n’hao nău dơi nti đah âk nkô̆ nău kan tơm khlăy. Gay ma mbơh ƀư nău kan năm nti 2024-2025 ngăch ndăn, na nê̆, săk rnglăy, n’gâng kan ntĭm n’hanh nti đă UBND n’gor, nkuăl ƀon têh bâh Trung ương n’hao nău kan ntĭm đă, uănh nđôi, ntrŭt đă mât đăp mpăn ndơ dŏng, ndơ ntĭm nti ta năp năm nti mhe. Nkre lah, geh trong kan ngăch ndăn ndâk nsơm mpôl kan nai nti hôm nha geh âk nău mô dơi bâh ta ntŭk tĭng nău dơi kan. Rdâk njêng, mbơh tơih ƀư tĭng trong kan kơl an ăp kon hoc rnăk ach o, dăch ach o, kon hoc ta rnoh dơi kơl, kon hoc geh nău rêh jêr jŏt, mô dơi, nkual njônh ngai, ntŭk ngai ngŏt, kon hoc ƀon lan rnoi đê̆, geh tŏng săm ƀŭt, ndơ dŏng nti n’hanh ăp nău khlăy êng, mô an kon hoc geh nău rêh jêr jŏt ma mô geh hăn ta ngih nti.