Nkhêp nkah ndray 78 năm nar Way ơm Công an ƀon lan Việt Nam (19/8), ôi ntri (16/8), ta Hà Nội, Bộ Công an kan nsum đah Bộ Y tế n’hanh Nhih dak si Nhi Trung ương ƀư Nar rgum lam ƀon lan mât rnă njrăng neh dak, đăp mpăn rnă njrăng nhih dak si.

Nhih dak si Nhi Trung ương way geh hang rmưn kon se ji n’hanh me bơ̆ gŭ tâm jâng gung hvi rlău 6ha. Mô hŏ kơp, rlău 2000 cán bộ, nuĭh kan dak si luh lăp ăp nar. Nău dja rŭ hôch geh ma nău roh đăp mpăn rnă njrăng. Hŏ geh ăp rơh roh ntŭng rmuănh, mplư rlăm geh ta aơ n’hanh dŭt hô lah rơh ndeh êng bah dih dah ma nchuăt rkhul êng đah aƀaơ bơi  jât năm. Gay đăp mpăn rnă njrăng, tâm bah ri aơ, Nhih dak si Nhi Trung ương hŏ n’hao dăng kan nsum đah công an phường Láng Thượng n’hanh phường Ngọc Khánh, quận Đống Đa. Rlău ma manh mpôl way kan mât rnă njrăng, nhih dak si hôm geh 6 nuĭh kan dơi pă an siƀŭt nghiệp vụ an ninh way pah kan groi nđôi, rƀŏng trong pah kan mât đăp mpăn an nhih dak si đŏng./.