Tâm rơh tâm nchră, âk nau rgop ân lah, tơm prăk ƀư nau kan bah Bôk nau kan neh dak mpeh nau hun hao văng sa, rêh jêng nkuăl rnoi mpôl đê̆ ndrel gôl yôk lvang năm 2021-2025 ê geh Trung ương mbơh ri ma âk n’gor hôm mâp nau jêr tâm nau ndâk nau dŏng.

 Du đê̆ ntŭk kan, n’gâng kan geh jao ƀư tơm ăp nau kan, yơn ê dơi ƀư nau nchrăp kan, ntĭm mbơh ƀư ndrel rgum ăp nau tă geh dơi nsum bah nau kan, nau kan jê̆...UBND ăp nkuăl ƀư Bôk nau kan aơ hôm vĭ vĕ tâm nau mĭn njêng, ƀư dŏng ăp nau ntrŭnh ăp nau ntĭm nau kan bah Trung ương ndrel n’gor, ê geh nau kan rgâl mhe lơn.

Tâm năm 2022 ăp nkuăl ê geh pă tơm prăk dŏng kan ân tâm di tă bah tơm prăk nkuăl gay ƀư Bôk nau kan aơ. Wa Trần Thanh Mẫn, Kruanh ban Dân tộc n’gor Quảng Ngãi ân lah, Bôk nau kan 9 bôk nau kan neh dak hun hao văng sa, rêh jêng nkuăl rnoi mpôl đê̆ ndrel gôl yôk mpeh “Ntuh kơl hun hao rmôt rnoi mpôl đê̆ nŭih ndrel rmôt rnoi mpôl hôm âk nau jêr jŏt” ê geh ntĭm mbơh ngăn mpeh nau ân manh, rnoh manh, năm manh ndrel prăk kon manh đah nau kơl an ăp rnoi mpôl đê̆ hôm mâp nau jêr. Rnôk aơ, n’gor Quảng Ngãi geh âk tơm prăk, yơn mô geh ƀư:

 ‘Phung hên đă, nau ân manh aơ geh dơi ƀư tĭng nau ân manh bah Ngân hàng chính sách ân manh. Kơt lah n’gâng kan ăp nkuăl rnôk aơ dôl ƀư, pă tơm prăk, ân ngân hành Chính sách manh. Nŭih geh manh geh pơk âk, pơk trong nơih ân nau hun hao”.

Geh tât nau ƀư Bôk nau kan 1 “Kơl an rklaih nau mô tŏng neh, ngih gŭ, neh tuch tăm, dak dŏng”, tâm Bôk nau kan bah neh dak mpeh nau hun hao văng sa, rêh jêng jêng nkuăl rnoi mpôl đê̆ ndrel gôl yôk, wa Trường Trung Tuyến, Groi Rnâng kan Dân tộc n’gor Gia Lai mbơh: Năm 2022 ăp nkuăl tâm Bôk nau kan hŏ ân geh mbơh moh săk nŭih geh manh lah rnăk ach o geh kơl ngih gŭ. Rnôk nê, ăp rnăk aơ geh kơl an manh prăk ngân hàng gay ndâk ngih gŭ. Tât bôk năm 2023, âk rnăk lah geh manh mô hôm tâm rnoh moh săk ach o tay ôh ri hôm ndơn geh prăk kơl an ngih gŭ. Wa Trường Trung Tuyến mbơh, nkuăl dôl ma vĭ vĕ ngăm tâm nau rklaih pă nau kơl an prăk ân kônh wa:

 ‘Rnôk aơ, khân păng hŏ manh ngân hàng hôm, ndơ dŏng ri hôm rnon, rnôk aơ hôm nkol ntŭk aơ ri jêr ngăn. Phung hên hŏ geh nau ntrŭnh njoăl ân Uỷ ban Dân tộc gay ma geh nau ơh ân nkuăl”.

Ta rơh tâm nchră, ntoh măt ăp nkuăl nkoch mbơh nau tă blau ndrel ntoh ăp nau nkol bah nau ngăn geh ntrŭnh bah ăp Bôk nau kan bah neh dak hun hao văng sa, rêh jêng nkuăl rnoi mpôl đê̆ ndrel gôl yôk. Gay ntrŭnh ƀư Bôk au kan aơ geh săk tam, wa Hầu A Lềnh, Kruanh n’gâng kan, tơm Uỷ ban Dân tộc đă ăp ntŭk kan, nkuăl ƀư nau mĭn nau ntrŭnh rjăp lơn tâm nau ntrŭnh kơl mbơh nchră nau ân UBND n’gor ntrŭnh ƀư:

“Phung hên geh nau kan ntĭm nti ân gưl nkual, gưl xã. Ăp nau kan tâm rmôt geh nau dơi bah n’gor ri ân n’gor nơm rklaih, mô kâp Trung ương. Ăp nkuăl ân n’hao nau tâm rgop, tâm pă mbơh nau kan, nau tă blau. Đă Rnâng kan Dân tộc ăp n’gor lah ntŭk kan tơm tâm nkuăl nơm ân geh mât, sĭt, ăp khay ân geh nau mbơh nau tă ƀư kan, nau kan geh ntrŭnh mhâm nau dơi, nau geh ndrel moh nau kol”.

Rnôk aơ, Kruanh n’gâng kan, Tơm uỷ ban Dân tộc Hầu A Lềnh leo bôk rmôt hăn kan bah Uỷ ban Dân tộc hŏ pah kan đah rđau kan n’gor Quảng Ngãi mpeh nau tă geh dơi ƀư Bôk nau kan bah neh dak hun hao văng sa, rêh jêng nkuăl rnoi mpôl đê̆ ndrel gôl yôk năm 2022 ndrel 3 khay bôk năm 2023. Tĭng nau mbơh, rnoh prăk ân manh bah nau kan aơ tâm nkuăl tâm năm 2022 knŭng geh bơi tât 49%, năm 2023, knŭng mhe dŏng bơi tât 5%. Ntoh nau tâm nar pah kan, wa Hầu A Lềnh mbơh pơk du đê̆ nau kan kơl an n’gor Quảng Ngãi ƀư nau kan ân geh săk tam nau aơ:

  ‘Nkuăl phung he jru, ngai, hvi. Nŭih ri âk ntil ri ma jêr đŏng. Bôk nau kan bah nơm êng ngăn đah ăp bôk nau kan bah ntŭk êng êng ri ma ân geh ƀư tĭng nau pă gưl. Aơ lah du nau kan rgum ri ma ân geh nau rgop ngăn gay ma ntrŭnh ƀư. Nau tâm rgop aơ ân geh nchră luh bah ntrong kan ndrel nau pah kan đah ăp ntŭk kan gay mhâm ƀư ndâk nau nchrăp, rklaigh ăp nau nkol ân geh tâm ban tâm di”.

Rmôt hăn kan bah Uỷ ban Dân tộc mra rgum nau mbơh Chính phủ ndrel ăp n’gâng kan, ntŭk kan uănh, ntrŭnh ăp nau kan doh rklaih nau nkol, jêr tâm nau ntrŭnh ƀư Bôk nau kan bah neh dak hun hao văng sa rêh jêng nkuăl rnoi mpôl đê̆ ndrel gôl yôk./.