Du rut nău nchih “Lư săk ta nâm n’hâm bri” Nău nchih tal bar:

https://vov4.vov.vn/mnong/nau-mhe-ntuk-reh-jeng-thoi-su-xa-hoi/du-rut-nau-nchih-lu-sak-ta-nam-nham-bri-nau-nchih-bok-nap-nde-jao-don-bri-gay-tik-nsek-425095.vov4

Công ty TNHH du ntŭk kan mât njrăng bri Nam Tây Nguyên dôl mât 27.277 ha bri tâm 3 xã Quảng Trực, Quảng Tâm ndrel Dak Ngo bah nkuăl Tuy Đức. Geh tât neh bri ndrel neh gŭ ta aơ, âk cán bộ rđayu kan gưl xã, nkuăl hŏ geh bu mhal, ân luh bah đảng, mô lah geh nŭih gŭ ndrung. Rlau 3.320 ha bri yor công ty mât hŏ geh in tih dôih. Gay ma rklaih dơi nau aơ du trong ngăn nê lah nau jêr. Yor ngăn lah geh tâm srah ma nŭih rnoi mpôl đê̆, rnoi mpôl đê̆ tă bah mpeh ba lơ tât kăl bri, in neh, geh nŭih hŏ ƀư nau tăch neh đŏng. Khân păng joi ăp trong gay ma ƀư nkân mbrơi, mô lah rdâng lơi nau ntrŭnh sŏk lơi neh bri. Wa Nguyễn Văn Bình-Giám đốc Công ty TNHH du ntŭk kan mât bri Nam Tây Nguyên, nkoch:

‘Nau kan bah nơm ri geh nau ƀư tâm rkăng, păng ê kloh. Ri ma păng hôm ăp nau geh ta nê. Jêh ri nŭih ƀon lan geh nau nê, nau blau nau gĭt mô geh âk, du đê̆ nŭih bu nsŭk đă, ri ma âk nau kan geh tât jêng mô ueh”.

Tâm neh tăm bah Công ty Nam Tây Nguyên hŏ năl lah 365 rnăk in 2.400 ha neh gay ma tăm tơm jŏ năm ndrel ndâk ngih. Nau êng lah rnôk aơ hôm rlau 320 ntŭk, bơi tât 1000 ha mir tơm tăm ê năl moh nŭih. Ntơm năm 2018 tât aơ, côngty ƀư 12 nau kan ndâk, hun ha bri đah nau ký nau kan nsum ma 263 rnăk, rnoh 680 ja. Kơt nr, knŭng rlau 20% tâm rnoh 3.320 ha neh geh in bah công ty aơ geh ƀư đah nau kí ton nau ntuh kơl tuch tăm, tăm bri ndrel jao neh mir tăm. Nkah tât nau rklaih du đê̆ rnăk kăl si, in neh bri tăm tơm si, ndaka ngih bah nkuăl, wa Lê Quang Dần, Groi Giám đốc N’gâng kan tuch tăm ndrel hun hao ƀon lan n’gor Dak Nông, ngơi:

‘Mpeh nau kan aơ, n’gor hŏ rđau rjăp ngăn. Tâm nau ntrŭnh bah pháp luật ndrel nau rđau kan bah Ban Bí thư, bah Ban văng sa Trung ương tâm rnôk mêt uănh mpeh nau kan tuch tăm tâm neh tăm bri bah n’gor. Êp nê, n’gor kŏ ntrŭnh nau gay ma rklaih nau hôm nkol bah nau kan tăm bri, tâm nê geh nau in neh bri. Phung hên đă ăp nŭih tơm bri, tâm nê geh công ty Nam Tây Nguyên ân geh kơp ndâk ăp nau kan dŏng neh aơ. Nkre geh nau kan nchrăp lăp tâm nau mât njrăng bri, tâm di nau ntrŭnh bah pháp luật”.

Rnăk wa Khưu, geh rnăk tâm thôn 8, xã Bù Gia Mập, nkuăl Bù Gia Mập (Bình Phươvs) yơn lŏ ƀư mir tâm neh bah Công ty Nam Tây Nguyên (Dak Nông). Wa Khưu lah rnoi S’Tiêng, gŭ ur rnoi Bunong ndrel rêh tâm aơ jŏ âk jêt năm hôm:

‘Phung hên hŏ rêh, tuch tăm ta aơ ntơm bah jŏ năm hôm. Kon gâp deh ta aơ ƀa hin hŏ geh ur kon. Phung hên ŭch Ngih dak, ŭch n’gor Dak Nông ndrel Bình Phước pơk trong ân hên đăp mpăn tuch tăm. Lah ƀa hin ntrơn ntŭk gŭ êng mô geh moh nau kan gay ma rêh”.

Rnăk wa Điểu Bức, rnoi Bunong kŏ ƀư mir ta aơ ntơm năm 1996, ăp mir aơ yor me mbŏ khân păng kăl e lơi an. Năm 2012, n’gâng kan nkuăl Tuy Đức sŏk lơi nkuăl aơ, jao ân Công ty nam Tây Nguyên mât. Điểu Bức lŏ ntrơn ntŭk êng gay ma rêh. Tât năm 2016, wa Điểu Bức lŏ ndrel ma rnăk vâl nơm plŏ tâm nkuăl neh tiểu khu 1500, 1504 aơ lŏ ƀư mir:

‘Phung hên 69 rnăk ta aơ lah rnoi Bunong, S’Tiêng, gĭt đŏng ta aơ hên mô di lah gŭ tâm n’gor Dak Nông. Yơn ŭch mhâm ƀư 2 n’gor ân geh rklaih ân hên đăp mpăn nau rêh, neh ntu phung hên knŭng geh tâm nkuăl aơ dơm. Gâp ŭch hên geh đăp mpăn nau pah kan tuch tăm kơt tăm điều, tăm tơm geh rnoh văng sa. Nŭih ƀon lan rnôk aơ mô geh mĭn tât nau kăl bri, in neh bri ôh, knŭng tăm tâm neh hŏ geh jao dơm”.

Du nau kan gay ma mât bri ma Công ty NTHH du ntŭk kan Nam Tây Nguyên ƀư ntơm năm 2018 đah ăp rnăk ta aơ lah ƀư nau tăm bri văng sa. Ngăn lah hŏ ký tâm bih nau kan ma âk rnăk aơ, tăm 107 ha điều tâm tiểu khu 1500 ndrel 1504. Công ty kŏ manh 9 nŭih tâm rnăk vâl aơ mât 500 ha bri chăt êng tâm dăch ma bri tăm bah khân păng. Du năm công ty trok ân khân păng 150 rkeh prăk.

Nau kan tâm boh tăm bri văng sa ndrel manh mât neh bri ma Công ty Nam Tây Nguyên ƀư đah rnoi S’Tiêng ndrel Bunong tâm nkuăl tâm êp 2 n’gor Dak Nông, Bình Phước knŭng lah nau kan gay ma rdâng gay ma mât bri bah năp măt. Nau aơ mô dơi ƀư âk ma âk rbăn nŭih êng tâm Dak Nông. Rklaih ân lôch nau in neh ƀư mir, ndâk ngih tâm n’gor aơ dôl ma jêr rklaih rdâng./.